(அஸ்ரப் ஏ சமத்)
பலஸ்தீன் ஆக்கிரமிக்கப்பட்டு 75 ஆண்டுகள் பூர்த்தியாவதை முன்னிட்டு, பலஸ்தீனுக்கான இலங்கை ஒருமைப்பாட்டுக் குழுவினால் ஏற்பாடு செய்யப்பட்ட விசேட நக்பா தின நிகழ்வு கடந்த 15 ஆம் திகதி திங்கட்கிழமை கல்கிஸ்ஸை கடற்கரையில் நடைபெற்றது.
இலங்கைக்கான பலஸ்தீனத் தூதுவர் கலாநிதி சுஹைர் ஹம்தல்லாஹ் சைட் தலைமையில் இடம்பெற்ற இந் நிகழ்வில் ஒருமைப்பாட்டுக் குழுவின் தலைவரும் முன்னாள் பாராளுமன்ற உறுப்பினருமான பிமல் ரத்நாயக்க, முன்னாள் அமைச்சரும் பாராளுமன்ற உறுப்பினருமான இம்தியாஸ் பாக்கீர் மாக்கார் மற்றும் சவூதி அரேபியா, இந்தோனேசியா, ஓமான், மலேசியா, ரஷ்யா, எகிப்து, ஈரான், பங்களாதேஷ் ஆகிய நாடுகளின் தூதுவர்கள் உட்பட பலர் கலந்து கொண்டனர்.
இதன்போது இலங்கை மற்றும் பலஸ்தீன் நாடுகளின் தேசியக் கொடிகள் தாங்கிய பலூன்கள் பறக்கவிடப்பட்டதுடன் விசேட உரைகளும் இடம்பெற்றன.
பலஸ்தீன தூதுவர் டாக்டர் ஸுஹைர் ஹம்தல்லாஹ் ஸைத் இங்கு உரையாற்றுகையில், பலஸ்தீன மக்களுக்கு ஏற்படுத்தப்பட்ட பேரழிவான நக்பாவின் 75வது ஆண்டு நிறைவை நாம் நினைவுகூருகிறோம். இத்தனை ஆண்டுகளாக பலஸ்தீனியர்கள் தங்களுக்கு நீதி கோரி போராடி வருகின்றனர். எனினும் நீதியைப் பெற்றுக் கொடுப்பதில் சர்வதேச சமூகத்தின் ஒத்துழைப்பு போதுமான வகையில் கிடைக்காமை கவலைக்குரியதாகும் என்றார். அத்துடன் இலங்கை மக்கள் தொடர்ச்சியாக பலஸ்தீனுக்கு வழங்கி வரும் ஆதரவுக்கும் நன்றி தெரிவித்தார்.- Vidivelli