(எம்.எப்.அய்னா)
குருணாகல் வைத்தியசாலையின் பிரசவ மற்றும் மகப்பேற்று பிரிவின் சிரேஷ்ட வைத்தியராக கடமையாற்றிய சேகு சிஹாப்தீன் மொஹம்மட் ஷாபி உயர் நீதிமன்றில் தாக்கல் செய்துள்ள அடிப்படை உரிமை மீறல் மனுவை விசாரணைக்கு ஏற்காது நிராகரிப்பதாக உயர் நீதிமன்றம் நேற்று முன் தினம் அறிவித்தது.
இந்த அடிப்படை உரிமை மீறல் மனு நீதியரசர் விஜித் மலல்கொட தலைமையிலான யசந்த கோதாகொட மற்றும் அர்ஜுன ஒபேசேகர ஆகியோர் அடங்கிய நீதியரசர்கள் முன்னிலையில் பரிசீலிக்கப்பட்டது. இதன்போதே இவ்வாறு இம்மனுவை விசாரணைக்கு ஏற்காது நிராகரிக்க நீதியரசர்கள் தீர்மானித்தனர்.
வைத்தியர் ஷாபி, உயிர்த்த ஞாயிறு தின தாக்குதல்கள் நடந்து 2 வாரங்களிலேயே கைது செய்யப்பட்டதாகவும், 40 கோடி ரூபா பெறுமதியான சொத்துக்கள் சம்பாதிக்கப்பட்ட வழிமுறை தொடர்பில் விளக்கம் கோரவும் அதனுடன் தொடர்புபட்ட விடயங்களுக்காகவும் அந்த சந்தர்ப்பத்தில் அவரை கைது செய்ய நியாயமான காரணிகள் இருந்ததாக நீதிமன்றம் கருதுவதாகவும் உயர் நீதிமன்றம் மனுவை நிராகரித்து அறிவித்தது.
சிரேஷ்ட சட்டத்தரணி ருஷ்தி ஹபீப் ஊடாக தாக்கல் செய்யப்பட்ட இந்த அடிப்படை உரிமை மீறல் மனுவில் குருணாகல் பொலிஸ் நிலையத்தின் குற்றவியல் பிரிவு பொறுப்பதிகாரி பொலிஸ் பரிசோதகர் புஷ்பலால், பொலிஸ் நிலைய பொறுப்பதிகாரி, குருணாகல் பிரதிப் பொலிஸ் மா அதிபராக இருந்த கித்சிறி ஜயலத், சி.ஐ.டி. பணிப்பாளர், பொலிஸ் மா அதிபர் சந்தன விக்ரமரத்ன, பாதுகாப்பு செயலர் மற்றும் சட்ட மா அதிபர் ஆகியோரை பிரதிவாதிகளாக பெயரிடப்பட்டுள்ளனர்.
தான் வருமானத்தை மீறி சொத்து சேர்த்துள்ளதாக குற்றம் சுமத்தி கைது செய்யப்பட்டு பயங்கரவாத தடை சட்டத்தின் கீழ் தடுத்து வைக்கப்பட்டமை சட்ட விரோதமானது என அறிவிக்குமாறும், எந்த நியாயமான காரணிகளும் இன்றி தான் கைது செய்யப்பட்டமையை சட்ட விரோதமானது என தீர்ப்பளிக்குமாறும், மனுதாரர் கோரியுள்ளார்.
அரசியலமைப்பின் 12(1), 12(2), 13(1), 13 (2) மற்றும் 14(1)(ஏ) உறுப்புரைகள் ஊடாக உறுதி செய்யப்பட்டுள்ள அடிப்படை உரிமைகள், தனது விடயத்தில் மீறப்பட்டுள்ளதாக அறிவிக்குமாறும் மனுதாரர் கோரியிருந்தார்.
இந்த மனுதாரருக்காக ஜனாதிபதி சட்டத்தரணி பாயிஸ் முஸ்தபா சட்டத்தரணி ஹபீல் பாரிசுடன் ஆஜரானமை குறிப்பிடத்தக்கது.– Vidivelli