வடக்கு கிழக்கில் பலவந்த காணி அபகரிப்பை தடுப்பதற்கு தமிழ் பேசும் மக்கள் அனைஷவரும் ஒன்று திரள வேண்டும்
பாராளுமன்ற உறுப்பினர் சாணக்கியன் தெரிவிப்பு
(எம்.வை.எம்.சியாம்)
நாடு சுதந்திரமடைந்ததிலிருந்து இன்று வரையில் வடக்கு, கிழக்கு பகுதிகளிலுள்ள தமிழ் பேசும் மக்களின் காணிகள் பலவந்தமாக அபகரிக்கப்பட்டு வருகின்றன. இனவாதத்தை அடிப்படையாகக் கொண்டு இயங்கும் அரசாங்கத்தின் சில அமைச்சர்கள் மற்றும் பிக்குகள் இருக்கும் வரையில் இந்நிலை தொடரும். எதிர்காலத்தில் இதுபோன்றதொரு சம்பவம் இடம்பெறாமல் இருக்க தமிழ் பேசும் மக்கள் அனைவரும் ஒன்று திரள வேண்டும் என தமிழ் தேசியக் கூட்டமைப்பின் பாராளுமன்ற உறுப்பினர் இராசமாணிக்கம் சாணக்கியன் தெரிவித்தார்.
திருகோணமலை, புல்மோட்டை பகுதியில் பௌத்த பிக்கு உள்ளிட்ட குழுவினர் புத்தர் சிலை வைக்க முற்பட்ட விடயம் தொடர்பில் கண்டறிவதற்காக தமிழ்த் தேசிய கூட்டமைப்பின் பாராளுமன்ற உறுப்பினர்களான ஜனாதிபதி சட்டத்தரணி எம்.ஏ.சுமந்திரன் மற்றும் இராசமாணிக்கம் சாணக்கியன் ஆகியோர் கடந்த திங்கட்கிழமை சம்பவ இடத்துக்கு சென்றிருந்தனர்.
இதன்போது ஊடகங்களுக்கு கருத்து தெரிவிக்கும் போதே அவர் மேற்கண்டவாறு குறிப்பிட்டார்.
இது தொடர்பில் அவர் மேலும் குறிப்பிட்டதாவது, புல்மோட்டை பகுதியிலுள்ள சிறுபான்மையினருக்கு சொந்தமான காணிக்குள் அத்துமீறி நுழைந்த பனாமுர திலக்கவங்ஷ தேரர் உள்ளிட்ட தரப்பினரால் மேற்கொள்ளப்பட்ட செயற்பாடுகள் தொடர்பில் பரவலாக பேசப்படுகிறது. பாதிக்கப்பட்ட மக்களினால் விடுக்கப்பட்ட கோரிக்கைகளுக்கு அமைய நாங்கள் இருவரும் இவ்விடத்துக்கு வருகை தந்துள்ளோம். உண்மையில் குறித்த பகுதியிலுள்ள மக்களை கடுமையாக எச்சரிக்கும் வகையில் நேரடியாக துப்பாக்கியை காண்பித்து பயமுறுத்தி காணி அபகரிப்பை மேற்கொள்வதற்கு முயற்சித்துள்ளனர்.
குறிப்பாக நாட்டின் வடக்கு மற்றும் கிழக்கைப் பொறுத்தமட்டில் தமிழ் பேசும் மக்கள் வாழும் அனைத்து பிரதேசங்களிலும் இவ்வாறான விடயங்கள் நடந்து கொண்டு தான் இருக்கின்றன. முன்னதாக நாம் இவ்வாறான விடயங்கள் தொடர்பில் போராட்டங்களை முன்னெடுத்திருந்தோம்.
எமது மக்கள் முகங்கொடுக்கும் பிரச்சினைகள் தொடர்பிலும், புல்மோட்டை சம்பவம் தொடர்பிலும் கடந்த 4 ஆம் திகதி ஜனாதிபதி ரணில் விக்கிரமசிங்கவுடன் கலந்துரையாடினோம். குறிப்பாக பனாமுர தேரர் தொடர்பிலும் அவரின் செயல்பாடுகள் குறித்தும் கதைத்தோம். இருப்பினும் ஜனாதிபதி சித்திரை புத்தாண்டு முடிந்ததன் பின்னர் இவ்விடயம் தொடர்பில் கலந்துரையாடுவோம் என்றார். ஜனாதிபதி அதற்கான தீர்வொன்றை பெற்றுத் தருவாரா? இல்லையா? என்பதை விடுத்து நாடு சுதந்திரம் பெற்றதிலிருந்து இன்று வரையில் இவ்வாறான சம்பவங்கள் எமது மக்களுக்கு நடந்து கொண்டு தான் இருக்கின்றன. எதிர்வரும் நாட்களில் இது போன்ற விடங்கள் நிச்சயம் நடக்கும்.
இந்நிலையில் இதுபோன்ற சவால்களை வெற்றிகொள்ள தமிழ் பேசும் மக்கள் அனைவரும் ஒன்றுபட வேண்டும்.
இரு தரப்பினருக்கு இடையில் ஏற்படும் பிரச்சினைகளுக்கு ஒன்றாக இணைந்து தீர்வினை பெற்றுக் கொள்ள முயற்சிக்க வேண்டும்.
பிளவுபட்டு பிரச்சினைகளுக்கு தீர்வு காண முடியாது. பனாமுர போன்ற பிக்குகள் மற்றும் இனவாத அமைச்சர்களிடமிருந்தும் நாம் எங்களையும், எங்களுடைய காணிகளையும் காப்பாற்றிக் கொள்ள வேண்டும்.
எமது மக்கள் முகங்கொடுக்கும் பிரச்சினைகளுக்கு பாராளுமன்றத்திலும் அதற்கு வெளியேயும் குரல் கொடுத்தோம். இனியும் குரல் கொடுப்போம். சட்டவிரோத காணி அபகரிப்புகளுக்கு எதிராக எதிர்காலத்தில் பாரியதொரு போராட்டமொன்றை முன்னெடுப்போம். அதனை சர்வதேசம் வரையில் கொண்டு செல்வோம் என்றார்.– Vidivelli