ஓமான் முதலீட்டாளர் மீதான தாக்குதல்கள் விசாரணைகள் சி.ஐ.டி. சிறப்புக் குழுவிடம்
முறையான விசாரணை இன்றேல் முதலீட்டாளர் வெளியேறும் அபாயம்; வெளிவிவகார அமைச்சர், முதலீட்டு அமைச்சர் மன்னிப்பு கோரினர்
(எம்.எப்.அய்னா)
நீர்கொழும்பு -படல்கம பொலிஸ் பிரிவுக்கு உட்பட்ட ஹல்பே பகுதியில் ஓமான் முதலீட்டாளர் ஹல்பான் அல் உபைதி மீது இராஜாங்க அமைச்சர் ஒருவரின் அரசியல் அதிகார பின்னணி கொண்ட கும்பல் ஒன்று தாக்குதல் நடத்தியமை மற்றும் அவரது ஆடை தொழிற்சாலை மீதான தொடர்ச்சியான அச்சுறுத்தல்கள் தொடர்பில் சி.ஐ.டி. எனும் குற்றப் புலனாய்வுத் திணைக்களத்தின் சிறப்புக் குழுவொன்று விசாரணைகளை ஆரம்பித்துள்ளது. ஜனாதிபதி ரணில் விக்ரமசிங்கவின் உத்தரவில், பொலிஸ்மா அதிபர் இது தொடர்பிலான விசாரணைகளை சி.ஐ.டி.யிடம் கையளித்துள்ள நிலையிலேயே சி.ஐ.டி.யினர் இந்த விசாரணைகளை ஆரம்பித்துள்ளதாக பொலிஸ் தகவல்கள் தெரிவித்தன.
கடந்த மார்ச் 30 ஆம் திகதி இரவு 11.30 மணியளவில், ஹல்பே பகுதியில் அமைந்துள்ள, குறித்த முதலீட்டாளருக்கு சொந்தமான ஆடைத் தொழிற்சாலைக்குள் அத்து மீறி கோடீஸ்வர வர்த்தகரான அந்த ஓமான் முதலீட்டாளர் மீதும், அவரது பாதுகாப்பு அதிகாரி மீதும் இவ்வாறு தாக்குதல் நடாத்தப்பட்டுள்ளது.
தாக்குதலில் படுகாயமடைந்த ஓமான் முதலீட்டாளர் ஹல்பான் அல் உபைதி ஸ்ரீ ஜயவர்தனபுர வைத்தியசாலையிலும், பாதுகாப்பு அதிகாரி நீர்கொழும்பு வைத்தியசாலையிலும் சிகிச்சைபெற்று வெளியேறியதுடன், தற்போது முதலீட்டாளர் பாதுகாப்பான இடமொன்றில் தங்கவைக்கப்பட்டுள்ளார்.
சம்பவம் குறித்து ஆரம்ப விசாரணைகளை முன்னெடுத்த படல்கம பொலிஸாரும் நீர்கொழும்பு வலய குற்றத் தடுப்புப் பிரிவினரும் 4 சந்தேக நபர்களைக் கைது செய்திருந்தனர்.
தாக்குதல் நடாத்திய இந்த குழு, ஆடைத் தொழிற்சாலை உரிமையாளரான ஓமான் முதலீட்டாளர், அவரது ஆடை உற்பத்தி நிறுவனத்துக்குள்ளே அமைந்துள்ள பங்களாவில் தங்கியிருந்த நிலையில், அப்பங்களாவின் கதவுகள், ஜன்னல்களையும் சேதப்படுத்தியுள்ளதுடன் வீட்டின் முன்னால் இருந்த வாகனத்தையும் அடித்துடைத்துள்ளனர்.
சம்பவத்துக்கு சில தினங்களுக்கு முன்னர், குறித்த அரசியல்வாதியின் சகா ஒருவர், ஆடைத் தொழிற்சாலைக்கு வாகனம் ஒன்றினை வாடகை அடிப்படையில் வழங்க முற்பட்டபோது, அதனை குறித்த முதலீட்டாளர் நிராகரித்தமை தாக்குதலுக்கான காரணம் என குறித்த ஆடை உற்பத்தி நிறுவனத்தின் பொது முகாமையாளர் யசீர் லாஹிர் விடிவெள்ளியிடம் தெரிவித்தார்.
‘எமது நிறுவனத்துடன் தொடர்புபடும் விநியோகஸ்தர்கள் உள்ளிட்ட பலர் பிரதேசத்தின் முக்கிய அரசியல்வாதி ஒருவருடன் தொடர்புடையவர்கள். அவர்கள் தொடர்பில் தீர்மானம் ஒன்றினை எடுக்கும் போது ஒவ்வொரு முறையும் அச்சுறுத்தல்களை எதிர்கொள்வோம். இது தொடர்ந்து இருந்தது. இறுதியாகவே இந்த தாக்குதல் நடாத்தப்பட்டது.
உண்மையில் இந்த சம்பவத்தை தொடர்ந்து, முதலீட்டாளர் தமது முதலீடுகளுடன் நாட்டிலிருந்து வெளியேறும் நிலைப்பாட்டில் இருக்கின்றார். இலங்கையை விட, எத்தியோப்பியா, சோமாலியா போன்ற நாடுகளுக்கு அந்த முதலீடுகளை கொண்டு செல்வது முதலீட்டாளருக்கு இலாபகரமானது.
எமது நாடு தற்போது உள்ள பொருளாதார சூழலில், இவ்வாறு முதலீட்டாளர்கள் நாட்டை விட்டு வெளியேறினால் அது பாரிய தாக்கத்தை ஏற்படுத்தும். எனவே இந்த தாக்குதல் தொடர்பில் பூரண விசாரணை நடாத்தப்படல் வேண்டும். நியாயம் நிலைநாட்டப்பட வேண்டும்.
முதலீட்டுச் சபை ஊடாக வரும் முதலீட்டாளர்களுக்கு பாதுகாப்பளிக்க வேண்டியது மிக முக்கிய நிபந்தனை. இந்த நிபந்தனை மீறப்பட்டுள்ளது.’ என பொது முகாமையாளர் யசீர் லாஹிர் விடிவெள்ளியிடம் மேலும் தெரிவித்தார்.
சில தினங்களுக்கு முன்னர் அரசியல்வாதியின் ஆதரவாளர், அவரது வாகனத்தை வாடகை அடிப்படையில் ஆடைத் தொழிற்சாலைக்கு பெற்றுக்கொள்ள முடியுமா என விசாரித்துள்ளார்.
தற்போதைய சூழலில், வாடகை அடிப்படையில் வாகனங்களை பெறுவதில்லை என இதற்கு முதலீட்டாளர் அறிவித்துள்ளார்.
இவ்வாறான பின்னணியில், இந்த சம்பவத்தால் கோபத்தில் இருந்துள்ள குறித்த நபர், ஆடைத் தொழிற்சாலையின் பின் பக்கமாக உள்ள மதிலினால் பாய்ந்து முதலீட்டாளர் தங்கியிருந்த வீட்டு பகுதிக்குள் நுழைந்து தாக்கியுள்ளதாக பொலிஸார் கூறினர்.
ஓமான் முதலீட்டாளர் தங்கியிருந்த வீட்டை, குறித்த கும்பல் தாக்க முன்னர் அவ்வீட்டின் பாதுகாப்பு அதிகாரியை தாக்கியுள்ளனர்.
பின்னர் வீட்டின் கதவு, ஜன்னல்களை உடைக்கும் போது, முதலீட்டாளர் வெளியே வந்துள்ளதாகவும், இதன்போது அவரை சரமாரியாக இந்த கும்பல் தாக்கியுள்ளதாகவும் தெரியவந்துள்ளது.
இதனையடுத்து தாக்குதல் நடாத்திய கும்பல் அங்கிருந்து தப்பியோடி இருந்தனர். இந்நிலையில், இந்த தாக்குதல் தொடர்பில் பொலிசாருக்கு கிடைக்கப் பெற்ற தகவல் பிரகாரம் விசாரணைகள் ஆரம்பிக்கப்பட்ட போதும், சந்தேக நபர்கள் தொடர்பில் எந்த தகவல்களும் வெளிப்படுத்தப்பட்டிருக்கவில்லை.
இவ்வாறான நிலையில் சம்பவ இடத்தில் சந்தேக நபர் ஒருவரின் காலணி ஜோடி ஒன்று பொலிஸாரால் கண்டுபிடிக்கப்பட்டது.
இதனையடுத்து நீர்கொழும்பு பொலிஸ் நிலையத்தின் பொலிஸ் சார்ஜன் அதிகாரியின் மேற்பார்வையில் பொலிஸ் மோப்ப நாய் நேரோ ஸ்தலத்துக்கு அழைக்கப்பட்டு மோப்பம் பிடிக்கப்பட்டது.
இந் நிலையில் நேரோ எனும் மோப்ப நாய், ஆடைத் தொழிற்சாலையிலிருந்து 700 மீற்றர் தூரத்தில் உள்ள வீடொன்றுக்கு சென்று, அங்கு கட்டில் அருகே அமர்ந்துள்ளது. இதனையடுத்தே சம்பவத்துடன் தொடர்புடைய மூவர் கடந்த 31ஆம் திகதி மாலை கைது செய்யப்பட்டுள்ளனர்.
நீர்கொழும்பு சிரேஷ்ட பொலிஸ் அத்தியட்சர் சமன் சிகேராவின் மேற்பார்வையில் பொலிஸ் அத்தியட்சர் பாலித்த அமரதுங்கவின் ஆலோசனைக்கு அமைய படல்கம பொலிஸ் நிலைய பொறுப்பதிகாரி பொலிஸ் பரிசோதகர் ஜயரத்ன தலைமையிலான குழுவினர் மேலதிக விசாரணைகளை முன்னெடுத்த நிலையில், அவ்விசாரணைகள் விரிவுபடுத்தப்பட்டு தற்போது சி.ஐ.டி.யினரிடம் கையளிக்கப்பட்டுள்ளது.
ஓமான் முதலீட்டாளரான ஹல்பான் அல் உதைபி கடந்த 2015 முதல் 8 வருடங்களாக இந்த ஆடைத் தொழிற்சாலையை நடாத்தி வருவதாகவும் அங்கு சுமார் 350 இலங்கையர்கள் சேவையாற்றுகின்றனர்.
இவ்வாறான நிலையில், தாக்குதலை அடுத்து ஓமான் தூதுவர் அஹமட் அல் ராசிதியுடன் தாக்குதலுக்கு உள்ளான முதலீட்டாளர் உள்ளிட்ட உயர் மட்டக் குழு, வெளிவிவகார அமைச்சர் அலி சப்ரியை இரு தினங்களுக்கு முன்னர் சந்தித்துள்ளது.
இதன்போது இராஜாங்க அமைச்சரான பிரதேசத்தின் அரசியல்வாதியின் நடவடிக்கைகள் தொடர்பில் முறையிடப்பட்டுள்ளதுடன், நடந்த சம்பவம் குறித்து சி.ஐ.டி. ஊடாக விசாரணை கோரப்பட்டு ஜனாதிபதிக்கான மகஜர் ஒன்றும் கையளிக்கப்பட்டுள்ளது. அத்துடன் நியாயமான நடவடிக்கை இன்றேல், முதலீட்டுடன் நாட்டிலிருந்து வெளியேறவரும் என்பதும் அமைச்சருக்கு சுட்டிக்காட்டப்பட்டுள்ளது.
இதன்போது குறித்த சம்பவம் தொடர்பில் வெளிவிவகார அமைச்சர் தனது கவலையை பதிவு செய்துள்ளதுடன், நாட்டிலிருந்து வெளியேற வேண்டாம் எனவும் உரிய பாதுகாப்பு வழங்கப்படும் எனவும் உறுதி செய்து பொலிஸ்மா அதிபருக்கும் கதைத்துள்ளார்.
இதனையடுத்து முதலீட்டு ஊக்குவிப்பு அமைச்சர் திலும் அமுனுகமவுடனும் சந்திப்பொன்று இடம்பெற்றுள்ளது. இதன்போது அவரும் சம்பவம் தொடர்பில் மன்னிப்பு கோரியுள்ளதுடன் பாதுகாப்பை உறுதி செய்ய உறுதியளித்துள்ளார்.
இந் நிலையிலேயே ஜனாதிபதியின் உத்தரவுக்கு அமைய சம்பவம் தொடர்பில் சி.ஐ.டி.யினர் விசாரணைகளை தற்போது முன்னெடுத்துள்ளனர்.-Vidivelli