பொதுஜன முன்னணியில் இணைந்தோருக்கு பாராளுமன்றில் அங்கீகாரம் வழங்க முடியாது
சபை முதல்வர் லக்ஷ்மன் கிரியெல்ல தெரிவிப்பு
பாராளுமன்ற அங்கீகாரம் இல்லாத கட்சியின் உறுப்பினர்கள் பாராளுமன்றத்தில் அங்கம் வகிக்க முடியாது. ஸ்ரீலங்கா சுதந்திரக் கட்சியிலிருந்து விலகி ஸ்ரீலங்கா பொதுஜன முன்னணியில் இணைந்த எவருக்கும் பாராளுமன்ற அங்கீகாரம் வழங்க முடியாதென ஐக்கிய தேசியக் கட்சியின் பாராளுமன்ற உறுப்பினரும் சபை முதல்வருமான லக் ஷ்மன் கிரியெல்ல தெரிவித்தார்.
பாராளுமன்றம் நேற்று செவ்வாய்க்கிழமை பிற்பகல் 1 மணிக்கு கூடியவேளை எதிர்க்கட்சித் தலைவராக மஹிந்த ராஜபக் ஷவை நியமிப்பதாக சபாநாயகர் அறிவித்ததையடுத்து சபையில் விசேட கூற்றை முன்வைத்து உரையாற்றும்போதே சபை முதல்வர் லக்ஷ்மன் கிரியெல்ல இவ்வாறு தெரிவித்துள்ளார். அவர் மேலும் கூறுகையில்,
பாராளுமன்றத்தின் நிலையியல் கட்டளைக்கமைய வெளியாருக்கு அல்லது பாராளுமன்ற அங்கத்துவமில்லாத எவருக்கும் இந்தப் பாராளுமன்றத்திற்குள் வரமுடியாது. இன்றைய தினம் வெளியாட்கள் சிலர் இந்தப் பாராளுமன்றத்திற்குள் இருக்கின்றார்கள். அரசியலமைப்பின் 99/13 ஆவது சரத்துக்கமைய ”பாராளுமன்ற உறுப்பினர் ஒருவர், அத்தகைய பாராளுமன்ற உறுப்பினராகத் தெரிவுசெய்யப்பட்டதையத்து அவரது பெயர் குறித்த அங்கீகரிக்கப்பட்ட அரசியல் கட்சியின் அல்லது சுயேச்சை குழுவின் நியமனப்பத்திரத்தில் காணப்பட்டதோ அந்த கட்சியிலிருந்து அல்லது குழுவிலிருந்து விலகுவதன் மூலம் அல்லது விலக்கப்படுவதன் மூலம் அல்லது வேறு வகையில் அக்கட்சியின் அல்லது குழுவின் உறுப்பினராக இல்லாதவிடத்து அவர் அந்தக் கட்சியின் அல்லது குழுவிலிருந்து விலகிய திகதியிலிருந்து ஒரு மாத காலப்பகுதியின் பின்னர் அவரின் ஆசனம் இல்லாது போகும். அதற்கமைய ஸ்ரீலங்கா சுதந்திரக் கட்சியின் உறுப்புரிமையிலிருந்து விலகி ஒரு மாதம் கடந்த பின்னர் அவர்களின் ஆசனமும் இல்லாது போகும்” எனக் குறிப்பிட்ட போது சபையில் இருந்த ஐக்கிய மக்கள் சுதந்திரக் கூட்டமைப்பினர் கூச்சலிட்டு அவரின் கருத்துக்கு எதிர்ப்பு தெரிவித்தனர்.
கூச்சலின் மத்தியில் மீண்டும் கருத்து தெரிவித்த சபை முதல்வர் லக்ஷ்மன் கிரியெல்ல, இதற்கு முன்னரும் பாராளுமன்றத்தை கலைத்தது சரியெனக் கூறினீர்கள். ஆனால் நாங்கள் உங்களுக்கு சட்டத்தை படித்துக்கொடுத்துள்ளோம். நம்பிக்கையில்லா பிரேரணையை ஏற்றுக்கொள்ள முடியாது எனவும் கூறினீர்கள். ஆனால் இப்போது என்ன நடந்துள்ளது, இந்த சபையில் நாங்கள் வாதங்களை செய்வோம். மாறாக சண்டை போடவேண்டிய அவசியம் இல்லை. ஆனால் படிகளில் இருக்கும் சட்டத்தரணிகளுக்கு பதிலளிக்க நாங்கள் தயாராக இல்லை. நாங்கள் சரியான சட்டத்தரணிகளுக்கே பதிலளிப்போம். எவ்வாறாயினும் எனது தர்க்கமானது ஐக்கிய மக்கள் சுதந்திரக் கூட்டமைப்பின் அங்கத்துவ கட்சியே ஸ்ரீலங்கா சுதந்திரக் கட்சியாகும். அந்தக் கட்சியின் உறுப்புரிமையிலிருந்து விலகினால் நிச்சயமாக ஒரு மாதத்தின் பின்னர் பாராளுமன்ற உறுப்பினர் பதவிகளும் இல்லாது போகும். ஆகவே இவர்களுக்கு பாராளுமன்ற உறுப்புரிமை வழங்க முடியாது என்ற காரணியை சபாநாயகர் கவனத்திற்கொள்ள வேண்டும் எனவும் அவர் குறிப்பிட்டார்.
-Vidivelli