நாடு மிக மோசமான பொருளாதார நெருக்கடியை எதிர்கொண்டுள்ள இந்த நாட்களில் முஸ்லிம்களாகிய நாம் அடுத்த வாரம் முதல் புனித ரழமான் மாதத்தை ஆரம்பிக்கிறோம். கடந்த வருடமும் இதை விடவும் மோசமான நிலைமைகளுக்கு நாம் முகங்கொடுத்திருந்தோம். இந் நிலையில் நாடு எதிர்நோக்கியுள்ள இந்த நெருக்கடி நிலைமை அடுத்த வருடத்திற்கும் நீடிக்காது மிக விரைவில் நீங்க வேண்டும் என எம்மை எதிர்நோக்கியுள்ள புனித மாதத்தில் பிரார்த்திப்போம்.
இன்றைய கால கட்டத்தில் இலங்கையைப் பொறுத்தவரை மக்கள் இன மத பேதமின்றி பாரிய துயரங்களை எதிர்நோக்கி வருகின்றனர். பொருளாதார நெருக்கடி காரணமாக மக்கள் குடும்பத்துடன் தமது உயிரை மாய்த்துக் கொள்ளுமளவுக்கு நிலைமைகள் மோசமடைந்துள்ளன. கடந்த சில வாரங்களாக இவ்வாறான பல சம்பவங்கள் தொடர்பில் ஊடகங்கள் அறிக்கையிட்டுள்ளன. இந் நிலையில் மக்களை இந்தக் கஷ்ட நிலையிலிருந்து மீட்டெடுப்பதற்கான வேலைத்திட்டங்களை சமூக மட்டத்தில் ஆரம்பிக்க வேண்டியது அவசியமாகும்.
இவ்வாறு அல்லல்படும் மக்களுக்கு உதவிக் கரம் நீட்டுமாறு அண்மையில் அகில இலங்கை ஜம்இய்யதுல் உலமாவும் வேண்டுகோள்விடுத்திருந்தது. மூன்று வேளை உணவுக்குக் கூட வழியில்லாமல் அல்லலுறும் எண்ணற்ற குடும்பங்களின் கவலைக்கிடமான தகவல்கள் ஜம் இய்யாவுக்குக் கிடைத்த வண்ணமுள்ளதாகவும் தனவந்தர்கள் பரோபகாரிகள் வசதிபடைத்தோர் தங்களாலான உதவிகளை வழங்கவேண்டும் என்றும் அகில இலங்கை ஜம்இய்யத்துல் உலமாவின் சமூக சேவைப்பிரிவு கோரிக்கை விடுத்திருந்தது.
இன்றைய நாட்களில் பண வசதி படைத்தவர்கள் முதல் ஏழைகள் வரை அனைவருமே பொருளாதார ரீதியாகப் பாதிக்கப்பட்டுள்ளார்கள். பாரிய வர்த்தகங்கள் கூட நெருக்கடியைச் சந்தித்துள்ளன. பலர் தமது தொழில் நடவடிக்கைகளை கைவிட வேண்டிய நிலைக்குத் தள்ளப்பட்டுள்ளார்கள்.
வாழ்க்கைச் செலவு உச்சத்தைத் தொட்டுள்ள இன்றைய நாட்களில் வருமானமின்றித் தவிக்கும் இந்தக் குடும்பங்களுக்கு உதவிக் கரம் நீட்டுவது அவசியமாகும்.
முஸ்லிம் சமூகம் பள்ளிவாசல்களை அடிப்படையாகக் கொண்டு நிர்வகிக்கப்படுவதால், ஒவ்வொரு பள்ளிவாசல்களும் தமது மஹல்லாவுக்குட்பட்ட தேவையுடைய குடும்பங்களை இனங்கண்டு எவ்வாறு உதவலாம் என்பது குறித்துத் திட்டமிட்டுச் செயற்பட வேண்டும்.
புனித ரமழான் மாதத்தில் அமல்களுக்கு வழங்கப்படும் முக்கியத்துவம் போன்றே தத்தமது பள்ளிவாசல் நிர்வாகப் பரப்பிற்குள் வாழும் மக்களின் அன்றாட தேவைகளையும் இனங்கண்டு நிறைவேற்றுவதற்கும் திட்டங்கள் வகுக்கப்பட வேண்டும். பள்ளிவாசல்கள் கட்டிடப்ப பணிகளை விட மக்களின் பசி போக்கும் பணிகளுக்கு தமது நிதிகளை செலவிட வேண்டும்.
முஸ்லிம் சமூக நிறுவனங்களுக்கும் இதில் பொறுப்புள்ளது. தமது ஸகாத், ஸதகாக்கள் மூலம் உதவக் கூடியவர்களிடமிருந்து பணத்தைத் திரட்டி ஒருவேளை உணவுக்குக் கூட வழியின்றித் தவிக்கும் குடும்பங்களை இனங்கண்டு உதவிகளை வழங்க வேண்டும்.
துரதிஷ்டவசமாக இன்று சமூகத்தில் மக்களை மென் மேலும் நெருக்கடிக்குள் தள்ளுகின்ற செயற்பாடுகளே அதிகம் இடம்பெறுகின்றன. பொருட்களைப் பதுக்கி வைத்து விலையை அதிகரித்து வியாபாரம் செய்பவர்களின் எண்ணிக்கை அதிகரித்துள்ளது.
இது மக்களிடமிருந்து கொள்ளையடிப்பதற்கான நேரமல்ல. மாறாக ஒருவருக்கொருவர் உதவி ஒத்தாசையாகவிருந்து இந்த நெருக்கடியிலிருந்து நாம் மீளத் தலைப்பட வேண்டும். நமது செயற்பாடுகள் ஒரு போதும் இறைவனின் புறத்திலிருந்து தண்டனையைக் கொண்டுவருபவையாக அன்றி அருளைக் கொண்டு வருபவையாக அமைய வேண்டும்.
எனவேதான் நெருக்கடியான இன்றைய நாட்களில் ஒருவரிடமிருந்து பொருளாதாரத்தை எப்படி அபகரிக்கலாம் என்பது பற்றிச் சிந்தியாது எவ்வாறு ஒருவருக்கொருவர் கொடுத்துதவலாம் என்பது பற்றிச் சிந்திப்போம். நமது பிரதேசங்களில் ஒருவர் கூட உண்ண வழியின்றி பட்டினியுடன் படுக்கைக்குச் செல்ல அனுமதிக்காதிருப்போம்.
புனித ரமழான் மாதம் ஏழைகளின் பசியை அனைவருக்கும் உணர்த்த வந்த மாதம் என்பதால் அதனை உணர்ந்து அவர்களது பசியைப் போக்குவதற்கு எம்மால் முடிந்த பணிகளை முன்னெடுப்போம்.– Vidivelli