உணவுக்கு வழியின்றி துன்பப்படும் மக்களுக்கு தனவந்தர்கள் உதவ வேண்டும்
அகில இலங்கை ஜம்இய்யத்துல் உலமா சபை கோரிக்கை
(ஏ.ஆர்.ஏ.பரீல்)
மின்கட்டணத்தின் தொடர்ச்சியான அதிகரிப்பு, பொருட்களின் விலையேற்றம் நடுத்தர மற்றும் பாமர மக்களைப் பெரிதும் பாதித்துள்ளன. மூன்று வேளை உணவுக்குக் கூட வழியில்லாமல் அல்லலுறும் எண்ணற்ற குடும்பங்களின் கவலைக்கிடமான தகவல்கள் ஜம் இய்யாவுக்குக் கிடைத்த வண்ணமுள்ளன. எனவே தனவந்தர்கள் பரோபகாரிகள் வசதிபடைத்தோர் தங்களாலான உதவிகளை வழங்கவேண்டும் என அகில இலங்கை ஜம்இய்யத்துல் உலமா சபை சமூக சேவைப்பிரிவு கோரிக்கை விடுத்துள்ளது.
இது தொடர்பில் உலமா சபையின் தலைவர் அஷ்ஷெய்க் எம்.ஐ.எம்.ரிஸ்வி முப்தி மற்றும் உலமா சபையின் சமூக சேவைப்பிரிவின் செயலாளர் அஷ்ஷெய்க் எம்.எஸ்.எம்.தாஸீம் என்போர் கையொப்பமிட்டு கோரிக்கையொன்றினை முன்வைத்துள்ளனர்.
குறிப்பிட்ட அறிக்கையில் மேலும் குறிப்பிட்டுள்ளதாவது: எமது நாட்டில் நிலவிவரும் பொருளாதார நெருக்கடியால் அனைவரும் சொல்லொண்ணா இன்னல்களை அனுபவித்து வருவதை நாம் அறிவோம். கவலைக்கிடமான பல தகவல்கள் எமக்குக் கிடைத்து வருகின்றது. தங்களது நோய்களுக்குத் தொடர்ந்து மாத்திரைகளை உபயோகித்து வந்த பலரும் அவற்றை வாங்குவதற்கு வசதியில்லாமல் நிறுத்தி வருவதாக அறிய முடிகிறது. அது ஆபத்தான விளைவுகளைக் கொண்டுவரும் என வைத்திய அதிகாரிகள் எச்சரித்துள்ளனர்.
இலங்கை வாழ் மக்களின் வாழ்வாதாரச் சுமைகளைக் குறைக்க உரிய அதிகாரிகளைத் தொடர்பு கொண்டு ஜம்இய்யா பல்வேறு நடவடிக்கைகளை மேற்கொண்டு வருகிறது. எனவே இந்த இக்கட்டான நிலைமையினைக் கவனத்திற் கொண்டு வசதி படைத்தோர் தங்களாலான உதவிகளைச் செய்யுமாறும், ஜம்இய்யாவின் கிளைகள், மஸ்ஜித் நிர்வாகிகள் ஏனைய சமூக அமைப்புகள் இதனை முன்னுரிமைப்படுத்தி செயற்படுமாறும் ஜம்இய்யா வேண்டிக்கொள்கிளது.
மக்கள் பசி பட்டினியால் வாழும் காலத்தில் அவர்களுக்கு உணவளிப்பது அல்லாஹ்வின் பொருத்தத்தைப் பெற்று நரகிலிருந்து தங்களைப் பாதுகாக்க மிக முக்கியமான வழியென அல்குல்ஆன் குறிப்பிடுகிறது. எனவே தேவைபட்டோருக்கு உதவி செய்து அல்லாஹ்வின் பொருத்தத்தை அடைந்து கொள்ளுங்கள் எனத் தெரிவிக்கப்பட்டுள்ளது.- Vidivelli