யெமனில் போர்நிறுத்த ஒப்பந்தம் அமுல்படுத்தப்பட்டு ஒருசில நிமிடங்களில் ஹெளதி கிளர்ச்சியாளர்களால் குறித்த ஒப்பந்தம் மீறப்பட்டிருப்பதாக அரசசார்பு அதிகாரிகள் தெரிவித்துள்ளனர்.
துறைமுக நகரான ஹொடைடாவில் நேற்று முதல் போர்நிறுத்த ஒப்பந்தத்தை அமுல்படுத்துவதற்கு யெமனில் போரிடும் குழுக்களுக்கிடையே ஒப்பந்தம் செய்து கொள்ளப்பட்டிருந்தது.
ஆனால், நிவாரணப் பொருட்கள் பரிமாற்றத்திற்கான முக்கிய நுழைவாயிலாக விளங்கும் துறைமுக நகரில், ஹெளதி கிளர்ச்சியாளர்களுக்கும், அரச சார்பு படையினருக்கும் இடையே அவ்வப்போது மோதல்கள் இடம்பெற்று வருவதாக தகவல்கள் கசிந்துள்ளன.
கிழக்கு ஹொடைடா பகுதியில் ஹெளதி கிளர்ச்சியாளர்கள், அரச படையினர் மீது குண்டு வீசித் தாக்குதல் நடத்தியுள்ளனர். இவ்வாறாக இருதரப்பிற்கும் இடையிலான மோதல்கள் தொடர்ந்து வருவதாக அரச சார்பு அதிகாரி ஒருவர் தெரிவித்துள்ளார்.
ஐ.நா. அனுசரணையுடன் சுவீடனில் நடைபெற்ற சமாதானப் பேச்சுவார்த்தைகளை தொடர்ந்து ஈரான் ஒத்துழைப்பு ஹெளதி குழுவிற்கும், சவூதி ஆதரவு அரசாங்கமான அப்த் ரப்பு மன்சூர் ஹாதிக்கும் இடையே கடந்த வியாழக்கிழமை போர்நிறுத்தம் அமுல்படுத்தப்பட்டது.
கடந்த 2014ஆம் ஆண்டு ஹாதி அரசாங்கத்தில் சவூதி தலையிட ஆரம்பித்ததை தொடர்ந்து யெமன் தலைநகர் சனா மற்றும் ஹொடைடா உள்ளிட்ட பல்வேறு நகரங்களை ஹெளதிகள் கட்டுப்பாட்டுக்குள் கொண்டுவந்தனர்.
இந்நிலையில், இந்தப் போர் நிறுத்தமானது நாட்டில் சமாதானத்தையும், ஸ்திரத்தன்மையையும் ஏற்படுத்தும் என்ற எதிர்பார்ப்புடன் ஹொடைடா மக்கள் காத்திருந்த நிலையில் அங்கு மோதல்கள் தொடர்வது அனைவரையும் அதிருப்திக்குள்ளாக்கி யுள்ளது.
-Vidivelli