தேசமான்ய, தேசபந்து பட்டங்களை ஜனாதிபதி மட்டுமே வழங்க முடியும்
பாராளுமன்றத்தில் சட்டம் நிறைவேற்றவும் தீர்மானம்
தேசமான்ய தேசபந்து போன்ற தேசிய நன்மதிப்புப் பட்டங்களை முறைசாராத வகையில் மூன்றாம் தரப்பினரால் (வேறு நிறுவனங்களினால்) வழங்குவதைத் தடுப்பதற்கான நடவடிக்கைகள் எடுக்கப்பட்டுள்ளதாக அரசாங்கம் அறிவித்துள்ளது. ஜனாதிபதியினால் மாத்திரம் வழங்கப்பட வேண்டிய இந்த தேசிய நன்மதிப்புப் பட்டங்கள், மூன்றாம் தரப்பினால் தொடர்ச்சியாக வழங்கப்பட்டு வருவதை தடுப்பதற்கான சட்ட மூலத்தினை விரைவில் பாராளுமன்றத்தில் நிறைவேற்றுவதற்கு அமைச்சரவை அங்கீகாரம் வழங்கியுள்ளது.
வாராந்த அமைச்சரவைக் கூட்டம் கடந்த திங்கட்கிழமை ஜனாதிபதி ரணில் விக்ரமசிங்க தலைமையில் கண்டியில்
இடம்பெற்றது. இதன்போது, தேசிய நன்மதிப்புப் பட்டங்கள் தொடர்பில் ஜனாதிபதியினால் சமர்ப்பிக்கப்பட்ட யோசனைக்கு அமைச்சரவை அனுமதி வழங்கியுள்ளது.
“தேசமானி, தேசபந்து போன்ற தேசிய நன்மதிப்புப் பட்டங்களை ஜனாதிபதி அன்றி, வேறு தரப்புக்களினால் வழங்கப்படுவது சட்டவிரோதமாகும்” என்ற விடயம் தகவலறியும் விண்ணப்பத்திற்கான ஜனாதிபதி செயலகத்தின் பதிலின் ஊடாக அண்மையில் வெளிக்கொணரப்பட்டிருந்தது.
இந்த நிலையிலேயே தேசிய நன்மதிப்புப் பட்டங்களை முறைசாராத வகையில் வேறு நிறுவனங்களினால் வழங்குவதை கட்டுப்படுத்த அரசாங்கம் நடவடிக்கை எடுத்துள்ளமை குறிப்பிடத்தக்கது.
இதேவேளை, தேசிய விருதுகளில் தற்போது காணப்படுகின்ற வெற்றிடங்களை நிரப்ப அரசாங்கம் தீர்மானித்துள்ளது. இதற்காக முறைசார்ந்த நடைமுறைகளைக் கடைப்பிடித்து தகைமையுடையவர்களை குறித்த விருதுக்கு தெரிவுசெய்யவுள்ளதாகவும் அரசாங்கம் தெரிவித்தது.- Vidivelli