காத்தான்குடி, அக்கரைப்பற்று மற்றும் நிந்தவூர் பகுதிகளிலிருந்து உம்ரா பயணத்தை மேற்கொள்வதற்காக கொழும்புக்கு அழைத்து வரப்பட்டு முகவர் நிலைய மொன்றினால் நிர்க்கதியாக்கப்பட்டிருந்த 38 பயணிகளும் 6 நாட்களின் பின்பு நேற்று மாலை உம்ரா கடமைக்காக சவூதி அரேபியாவைச் சென்றடைந்தனர்.
குறிப்பிட்ட உம்ரா பயணிகளுக்கான விமான டிக்கட்டுகளைப் பதிவு செய்த கொழும்பைச் சேர்ந்தஅம்ஜா டிரவல்ஸுக்கு காத்தான்குடியைச் சேர்ந்த உம்ரா முகவர் நிலைய உரிமையாளர் விமான டிக்கட் கட்டணங்களை வழங்காமையினாலேயே பயணிகள் இவ்வாறு நிர்க்கதிக்குள்ளாக்கப்பட்டனர்.
விமான டிக்கட்டுகளை ஏற்பாடு செய்த அம்ஜா டிரவல்ஸுக்கு காத்தான்குடி முகவர் நிலைய உரிமையாளரின் மனைவி மற்றும் உறவினர்கள் உரிய பணத்தில் ஒரு பகுதியை வழங்கியுள்ளதாலே பயணிகளின் கடவுச்சீட்டுகளும் டிக்கட் உட்பட பயண ஆவணங்களும் கையளிக்கப்பட்டதாகத் தெரிவிக்கப்படுகிறது.
உம்ரா பயணிகள் 38 பேரும் நேற்று பிற்பகல் 2.35 மணிக்கு ஸ்ரீ லங்கன் விமானத்தில் சவூதி நோக்கி பயணமானமை குறிப்பிடத்தக்கது. இவர்களில் 18 பேர் பெண்களாவர்.
38 பேர் உம்ரா குழுவின் வழிகாட்டியான மௌலவி ஏ.சி.எம். இர்சாத் இது தொடர்பில் கருத்து தெரிவிக்கையில்;
‘சவூதி மக்கா, மதீனாவில் பயணிகளுக்குத் தேவையான ஹோட்டல் பதிவுகள் மேற்கொள்ளப்பட்டுள்ளதாகவும் பிரச்சினைக்கு விரைவில் தீர்வு பெற்றுத்தந்தமைக்காகவும் அம்ஜா டிரவல்ஸ் உரிமையாளருக்கு நன்றி தெரிவிக்கிறோம் என்றார். உம்ரா பயணிகளின் பிரச்சினைகளுக்கு உடனடி தீர்வு பெற்றுக் கொடுப்பதற்காக அரச ஹஜ் குழுவின் உறுப்பினர் மௌலவி எம்.எஸ்.எம். தாஸிம், முஸ்லிம் சமய பண்பாட்டலுவல்கள் திணைக்கள பணிப்பாளருடன் இணைந்து செயற்பட்டமை குறிப்பிடத்தக்கதாகும்.
-Vidivelli