போதைப்பொருள் விவகாரத்தில் பள்ளிகள் மிக கடுமையாக நடந்துகொள்ள வேண்டும்
அக்கரைப்பற்று பெரிய ஜும்ஆபள்ளிவாசல் தலைவர் கூறுகிறார்
(ஏ.ஆர்.ஏ.பரீல்)
நிக்காஹ்வுக்கான அனுமதி வழங்குவதில் நாட்டிலுள்ள பள்ளிவாசல்கள் அனைத்தும் மிகவும் கடுமையாக நடந்து கொள்ள வேண்டும். போதைப்பொருள் விவகாரத்தில் கடுமையாக செயற்படுவதன் மூலமே சமூகத்தை போதைப்பொருளின் கோரப்பிடியிலிருந்தும் விடுவிக்கமுடியும். இது விடயத்தில் பள்ளிவாசல் நிர்வாகங்களும், ஊர் மக்களும் உலமாக்களும் கைகோர்க்க வேண்டும் என அக்கரைப்பற்று பெரிய ஜும்ஆபள்ளிவாசலின் தலைவர் எஸ்.எம்.சபீஸ் வேண்டுகோள் விடுத்துள்ளார்.
போதைப்பொருள் பாவனையை காரணம் காட்டி அக்கரைப்பற்று பெரிய ஜும்ஆ பள்ளிவாசல் நிர்வாகம் நிக்காஹ் விண்ணப்பம் ஒன்றினை நிராகரித்துள்ளமை தொடர்பில் வினவியபோதே அவர் ‘விடிவெள்ளி’க்கு மேற்கண்டவாறு கூறினார்.
நிக்காஹ் விண்ணப்பமொன்று முறையாக பரிசீலிக்கப்பட்டபோது அக்கரைப்பற்றுவைச் சேர்ந்த சம்பந்தப்பட்ட இளைஞர் போதைப்பொருள் பாவனைக்கு உள்ளானவர் என்பது உறுதி செய்யப்பட்டது. சாட்சிகள் மற்றும் ஆவணங்கள் மூலம் இவ்விவகாரம் நிரூபிக்கப்பட்டதனையடுத்தே பள்ளிவாசல் நிர்வாகம் விவாக விண்ணப்பத்தை நிராகரித்தது.
போதைப்பொருள் பாவனைக்குள்ளான குறிப்பிட்ட இளைஞர் போதைப்பொருள் புனர்வாழ்வு மையத்தில் அனுமதிக்கப்பட்டு நற்சான்றிதழ் பெற்று அதனை பள்ளிவாசலில் சமர்ப்பித்த பின்பே அனுமதி வழங்கப்படும் எனவும் நிர்வாகம் சம்பந்தப்பட்டவருக்கு எழுத்து மூலம் அறிவித்துள்ளது. இதன் பிரதிகள் அக்கரைப்பற்று பிரதேச செயலாளர் அகில இலங்கை ஜம் இய்யத்துல் உலமா சபையின் அக்கரைப்பற்று கிளை மற்றும் அக்கரைப்பற்று காதிரியா ஜும்ஆ பள்ளிவாசல் நிர்வாகம் என்பனவற்றுக்கு அனுப்பிவைக்கப்பட்டுள்ளன.
அக்கரைப்பற்று பெரிய ஜும்ஆ பள்ளிவாசல் தலைவர் எஸ்.எம்.சபீஸ் ‘விடிவெள்ளிக்குத்’ தொடர்ந்தும் கருத்துத் தெரிவிக்கையில்,
பெரும்பாலான பள்ளிவாசல்களில் எந்தவொரு விடயத்துக்கும் தைரியமாக முடிவு எடுக்கப்படுவதில்லை. நிர்வாகிகள் கடுமையான தீர்மானம் எடுக்கப்பட்டால் தங்களுக்கு பிரச்சினைகள் ஏற்படும் என பயப்படுகிறார்கள். இந்நிலையில் மாற்றம் பெறவேண்டும். சில சந்தர்ப்பங்களில் மேற்கொள்ளப்பட்ட தீர்மானங்கள் காரணமாக அரசியல் அழுத்தம் பிரயோகிக்கப்படுகிறது.
நிக்காஹ் விண்ணப்பம் நிராகரிக்கப்பட்ட இளைஞரை தனிப்பட்ட ரீதியில் எனக்குத்தெரியும். நான் அவரை சந்தித்திருக்கிறேன். படித்த குடும்பம் வசதியான குடும்பத்தைச் சேர்ந்தவர். பள்ளிவாசல் எடுத்த தீர்மானத்திற்கு நான் பயமின்றி கையொப்பம் இட்டிருக்கிறேன். சமூகம் சார்ந்த விடயங்களில் நாம் தனிப்பட்ட ரீதியில் அன்றி பொதுவாக சமூக நலனைக் கருத்திற் கொண்டே தீர்மானங்கள் மேற்கொள்ளவேண்டும்.பள்ளிவாசல் நிர்வாகிகள் இறைவனுக்கே அஞ்ச வேண்டும்.
நிக்காஹ் விண்ணப்பம் நிராகரிக்கப்பட்டதனை அடுத்து முகநூல் பக்கங்களில் எனக்கு சவால் விடுக்கப்பட்டுள்ளது. எனக்கெதிராக மனித உரிமை ஆணைக்குழுவில் முறைப்பாடு செய்யவுள்ளதாகவும் தெரிவிக்கப்பட்டுள்ளது. சமூக நலன் சார்ந்தே தீர்மானம் எடுக்கப்பட்டுள்ளது. சவால்களை எதிர்கொள்ள நான் தயாராகவே இருக்கிறேன் என்றார்.
உலமா சபை அக்கரைப்பற்று
கிளைத் தலைவர்
சில வாரங்களுக்கு முன்பு அகில இலங்கை ஜம்இய்யத்துல் உலமா சபையின் அக்கரைப்பற்று கிளை போதைப்பொருள் ஒழிப்பு தொடர்பில் விழிப்புணர்வு கூட்டம் ஒன்றினை நடத்தியது. பள்ளிவாசல் நிர்வாகமும் இக்கூட்டத்தில் கலந்து கொண்டிருந்தது என உலமா சபையின் அக்கரைப்பற்று கிளை பதில் தலைவர் எம்.எம்.கலாமுல்லா தெரிவித்தார்.
அக்கரைப்பற்று பெரிய ஜும்ஆ பள்ளி வாசல் எடுத்துள்ள தீர்மானம் இறுக்கமானதாகும். இத்தீர்மானத்துடன் நாம் சம்பந்தப்படவில்லை. பள்ளிவாசல் நிர்வாகம் மேற்கொண்ட தீர்மானத்தின் பிரதியொன்று எமக்கு அனுப்பி வைக்கப்பட்டுள்ளது என்றார்.
அக்கரைப்பற்று பிரதேச
செயலாளர்
அக்கரைப்பற்று பிரதேச செயலாளர் ரி.எம்.எம்.அன்ஸார் இது தொடர்பில் தெரிவிக்கையில், அக்கரைப்பற்று பள்ளிவாசல் மேற்கொண்ட தீர்மானத்தின் பிரதியொன்று எமக்குக் கிடைக்கப்பெற்றதையடுத்தே இவ்விடத்தை அறிந்து கொண்டோம்.
இது தொடர்பில் எத்தரப்பினரும் பிரதேச செயலகத்தில் முறைப்பாடு செய்யவில்லை என்றார்.- Vidivelli