இலங்கையில் முஸ்லிம் தனியார் சட்டத்தை திருத்துவதற்கான முயற்சிகள் கடந்த பல தசாப்தங்களாக முன்னெடுக்கப்பட்ட போதிலும் அவை இதுவரை வெற்றியளிக்கவில்லை. 1951 ஆம் ஆண்டின் பின்னர் இச் சட்டத்தில் எந்தவித திருத்தங்களும் மேற்கொள்ளப்படாததன் காரணமாக, சமகாலத்தில் முஸ்லிம் சமூகம் பல்வேறு சவால்களுக்கு முகங்கொடுக்க வேண்டி ஏற்பட்டுள்ளது.
இச் சட்டத்தில் திருத்தங்களை மேற்கொள்ளவென 2009 இல் அப்போதைய நீதியமைச்சர் மிலிந்த மொரகொடவினால், ஓய்வுபெற்ற நீதியரசர் சலீம் மர்சூப் தலைமையில் குழுவொன்று நியமிக்கப்பட்டது. இக் குழு சுமார் 9 வருட கால இழுபறியின் பின்னர் தனது அறிக்கையை கையளித்தது. எனினும் இக் குழுவின் அங்கத்தவர்கள் இரு வேறாகப் பிரிந்து மற்றொரு அறிக்கையையும் சமர்ப்பித்ததால் சலீம் மர்சூப் தலைமையிலான குழுவின் அறிக்கையை அமுல்படுத்துவதில் இழுபறி தோன்றியது. 2009 இன் பின்னர் நீதியமைச்சர்களாக பதவி வகித்த பலரும் இச் சட்டத்தை திருத்துவதற்கான தமது ஆர்வத்தை வெளிப்படுத்திய போதிலும் இதனை நடைமுறைப்படுத்தும் துணிவைப் பெற்றிருக்கவில்லை.
இந் நிலையில்தான் 2019 இல் “ஒரே நாடு ஒரே சட்டம்’ எனும் கோஷத்துடன் ஆட்சிக்கு வந்த பொது ஜன பெரமுன தலைமையிலான அரசாங்கம் முஸ்லிம் தனியார் சட்டத்தை இல்லாதொழிப்பதையும் தனது இலக்குகளில் ஒன்றாகக் கொண்டிருந்தது.
உயிர்த்த ஞாயிறு தாக்குதலைத் தொடர்ந்து முஸ்லிம்கள் தொடர்பாக முன்னெடுக்கப்பட்ட தவறான பிரசாரங்களும் இதற்கு வலுச்சேர்த்தன. இந் நிலையில்தான் முஸ்லிம் தனியார் சட்டத்தை முற்றாக நீக்க வேண்டும் என்ற பிரசாரங்கள் மேற்கிளம்பின. இனவாத ஊடகங்கள் காதி நீதிமன்றங்களால் பாதிக்கப்பட்ட பெண்கள் என்ற போர்வையில் பலரைக் கொண்டுவந்து முஸ்லிம் தனியார் சட்டத்திற்கு எதிரான தப்பபிப்பிராயங்களை கட்டியெழுப்பின.
முன்னாள் ஜனாதிபதி கோத்தபாய ராஜபக்சவினால், ஞானசார தேரரை தலைவராக கொண்டு தோற்றுவிக்கப்பட்ட ஒரே நாடு ஒரே சட்டம் செயலணியின் நோக்கமும், முஸ்லிம் தனியார் சட்டத்தை இல்லாதொழிப்பதாகவே இருந்தமை வெளிப்படையானது. இருப்பினும் கோத்தபாய ஆட்சியில் இருக்கும் போதும் முஸ்லிம் தனியார் சட்டத்தை திருத்தவோ ஒழிக்கவோ சாத்தியப்படவில்லை.
இந் நிலையில் இறுதியாக இடம்பெற்ற அமைச்சரவையிலும் சில வாரங்களுக்கு முன்னர் இடம்பெற்ற அமைச்சரவை அமர்வு ஒன்றிலும் மீண்டும் இத்திருத்த விவகாரம் ஆராயப்பட்டுள்ளது. இதன்போது காதி நீதிமன்றக் கட்டமைப்பில் மாற்றங்களைக் கொண்டு வரும் வகையிலான யோசனைகள் முன்மொழியப்பட்டுள்ளன. முன்னாள் நீதியமைச்சர் அலி சப்ரியினால் நியமிக்கப்பட்ட குழு திருத்தங்கள் தொடர்பாக சமர்ப்பித்துள்ள அறிக்கையை மையப்படுத்தியே அமைச்சரவையில் ஆராயப்பட்டுள்ளது. எனினும் அதில் எவ்வாறான பரிந்துரைகள் உள்ளன என்பது இதுவரை வெளிப்படுத்தப்படவில்லை. அமைச்சரவைக் கூட்டத்தின் போது காதிநீதிமன்றக் கட்டமைப்பை இல்லாதொழிப்பது தொடர்பில் கருத்துப் பரிமாற்றங்கள் இடம்பெற்றுள்ளதாக அறிய முடிகிறது.
குறிப்பாக சுற்றாடல் அமைச்சர் நஸீர் அகமட் காதி நீதிமன்ற கட்டமைப்பை முற்றாக நீக்கும் யோசனைக்கு தனது எதிர்ப்பை வெளியிட்டுள்ளதாக தகவல்கள் தெரிவிக்கின்றன. இந் நிலையில் இந்த விவகாரம் தொடர்பில் நீதியமைச்சர் விஜேதாச ராஜபக்ச கடந்த வாரம் முஸ்லிம் பாராளுமன்ற உறுப்பினர்களுடனும் பேச்சுவார்த்தை நடாத்தியிருந்தார். இதன்போதும் எம்.பி.க்கள் காதி நீதிமன்றக் கட்டமைப்பை முற்றாக இல்லாதொழிக்காது அதிலுள்ள குறைபாடுகளை களைவது குறித்து கவனம் செலுத்துமாறு கோரியுள்ளனர்.
காதி நீதிமன்ற முறைமையிலும் காதி நீதிபதிகளிலும் பல்வேறு குறைபாடுகள் உள்ளன என்பதை அனைவரும் ஏற்றுக் கொள்கின்றனர். எனினும் இக் குறைபாடுகளை நிவர்த்தித்து இந்த முறைமையை மேலும் வலுப்படுத்துவதே இதற்குத் தீர்வாகும். மாறாக இதனை இல்லாதொழிப்பதல்ல என்பதை சம்பந்தப்பட்டவர்கள் புரிந்து கொள்ள வேண்டியது அவசியமாகும். காதி நீதிமன்றக் கட்டமைப்பை ஒழித்துவிட்டு மாவட்ட நீதிமன்றங்களிடம் வழக்குகளை ஒப்படைப்பது எந்தவிதத்திலும் தீர்வாக மாறப் போவதில்லை. இது மேலும் இழுத்தடிப்புகளுக்கும் குடும்ப சீரழிவுகளுக்குமே வழிவகுக்கும்.
எனவேதான் இருக்கின்ற காதி நீதிமன்ற கட்டமைப்பின் அதிகாரத்தையும் வளங்களையும் மேம்படுத்துவதன் ஊடாக அதனை வலுப்படுத்தவே நாம் முயற்சிக்க வேண்டும். இதனை நோக்கியே சகல தரப்பினரும் செயற்பட வேண்டும்.
வருடக் கணக்கில் இந்த விவகாரத்தை இழுத்தடித்து அரசியல் செய்யாது விரைவில் ஒரு தீர்மானத்திற்கு வருமாறு முஸ்லிம் அரசியல், சிவில் மற்றும் மார்க்க தலைமைகளிடம் வேண்டுகோள் விடுக்க விரும்புகிறோம்.- –Vidivelli