இஸ்ரேலின் தலைநகராக மேற்கு ஜெரூசலத்தை அவுஸ்திரேலியா அங்கீகரித்துள்ளது. எனினும் சமாதானமான இணக்கப்பாடொன்று காணப்படும் வரை தூதரகம் டெல் அவிவிலிருந்து நகர்த்தப்படமாட்டாது என பிரதமர் ஸ்கொட் மொறிசன் தெரிவித்துள்ளார்.
இஸ்ரேலின் தலைநகராக மேற்குறித்த நகரை அங்கீகரிக்கும் அமெரிக்க ஜனாதிபதி டொனால் ட்ரம்பின் தீர்மானத்தை பின்பற்றும் ஒரு சில அரசாங்கங்களுள் ஒன்றாக கடந்த சனிக்கிழமை கென்பரா மாறியது. பலஸ்தீனத்தின் எதிர்கால தேசத்தின் தலைநகராக கிழக்கு ஜெரூசலத்தை அங்கீகரிப்பதற்கும் மொறிசன் உறுதிபூண்டுள்ளார்.
அவுஸ்திரேலியா தற்போது நெஸட் என அழைக்கப்படும் இஸ்ரேலியப் பாராளுமன்றத்தின் ஒரு ஆசனம் என்ற வகையில் மேற்கு ஜெரூசலத்தையும் அரசாங்கத்தினை ஏனைய பல நிறுவனங்களையும் அங்கீகரிக்கும் வகையில் இஸ்ரேலின் தலைநகராக அதனை அங்கீகரித்ததாக சிட்னியில் கடந்த சனிக்கிழமை உரையாற்றிய மொறிசன் தெரிவித்தார்.
இஸ்ரேலுக்கும் பலஸ்தீனத்திற்கும் இடையேயான மிகப் பெரும் முட்டுக்கட்டையாக ஜெரூசலத்தின் அந்தஸ்து காணப்படுகின்றது.
1967 ஆம் ஆண்டு மத்திய கிழக்கு யுத்தத்தின் பின்னர் இணைத்துக்கொள்ளப்பட்ட கிழக்குப் பிரதேசம் உள்ளடங்கலாக முழு நகரத்தையும் இஸ்ரேல் அதன் தலைநகராகக் கருதுகின்ற அதேவேளை பலஸ்தீனர்களோ ஆக்கிரமிக்கப்பட்ட மேற்குக்கரை மற்றும் காஸா பள்ளத்தாக்கை உள்ளடக்கியதாக சர்வதேசத்தின் பெரும்பான்மை ஆதரவுடன் உருவாக்க எதிர்பார்க்கும் எதிர்கால சுதந்திர தேசத்தின் தலைநகராக கிழக்கு ஜெரூசலத்தை கருதுகின்றனர்.
இவ் வருட ஆரம்பத்தில் அமெரிக்க ஜனாதிபதி டொனால் ட்ரம்ப் ஒருதலைப்பட்சமாக இஸ்ரேலுக்கான அமெரிக்கத் தூதரகத்தை ஜெரூசலத்திற்கு மாற்றும் வரை பெரும்பாலான நாடுகள் பேச்சுவார்த்தையில் முடக்கம் ஏற்பட்டுவிடக் கூடாது என்பதற்காக மெத்தனப் போக்கினைக் கடைப்பிடித்து வந்தன.
இறுதியான அந்தஸ்து மற்றும் உறுதிப்பாட்டுக்கு ஆதரவளிக்கும் வகையில் அது எட்டப்பட்ட பின்னர் நடைமுறைச் சாத்தியமான ரீதியில் ஜெரூசலத்திற்கு எமது தூதரகத்தை நகர்த்துவதற்கு எதிர்பார்த்துள்ளோம் என அவர் தெரிவித்தார். தூதரகத்திற்கான புதிய அமைவிடத்தை தேடும் பணிகள் தற்போது முன்னெடுக்கப்பட்டு வருவதாகவும் அவர் தெரிவித்தார்.
இடைக்காலத்தில் அவுஸ்திரேலியா புனித நகரத்தின் மேற்கே பாதுகாப்பு மற்றும் வர்த்தக செயற்பாடுகளை மேற்கொள்ளவுள்ளதாகவும் மொறிசன் தெரிவித்தார்.
இது தவிர இரண்டு தேசம் என்ற தீர்வினை அங்கீகரிப்பதில் அவுஸ்திரேலிய அரசாங்கத்தின் அர்ப்பணிப்புடன் உள்ளதோடு, கிழக்கு ஜெரூசலத்தை தலைநகராகக் கொண்ட எதிர்கால சுதந்திர தேசம் தொடர்பான பலஸ்தீனத்தின் அபிலாசைகளை ஏற்றுக்கொள்வதாகவும் அவர் தெரிவித்தார்.
ஆசிய நாட்டு அயல்நாடுகளுடனான பல தசாப்தகால கொள்கையில் விரிசலை ஏற்படுத்தக்கூடியதும் ஆசிய அயல் நாடுகளுக்கு கோபத்தை ஏற்படுத்தக்கூடிய ஆபத்தைக் கொண்டதுமான டெல் அவிவில் அமைந்துள்ள அவுஸ்திரேலியத் தூதரகத்தை ஜெரூசலத்திற்கு மாற்றுவதா என்பது தொடர்பில் தீர்மானமொன்றை மேற்கொள்வதற்கு அவுஸ்திரேலிய அரசாங்கம் கடந்த செவ்வாய்க்கிழமையன்று கலந்துரையாடலில் ஈடுபட்டதாக விடயத்துடன் தொடர்புடைய இரு வட்டாரங்கள் தெரிவித்தன. அமைச்சரவை கூடிய போது இஸ்ரேலுக்கான அவுஸ்திரேலிய தூதரகத்தை ஜெரூசலத்திற்கு நகர்த்துவது தொடர்பான விடயம் கலந்துரையாடப்பட்டது. எனினும் தீர்மானம் எதுவும் எடுக்கப்படவில்லை என ஊடகங்களுக்கு கருத்துத் தெரிவிக்கும் அதிகாரம் வழங்கப்படாததால் தன்னை அடையாளப்படுத்திக்கொள்ள விரும்பாத ஒருவர் தெரிவித்திருந்தார்.
இஸ்ரேலின் தலைநகராக ஜெரூசலத்தை அங்கீகரிப்பதன் மூலம் அவுஸ்திரேலியப் பிரதமர் மொறிசன் தனக்கு ஆதரவான பழமைவாத பின் ஆசன உறுப்பினர்களை மகிழ்ச்சிப்படுத்த எதிர்பார்க்கின்றார். ஆனால் உலகின் மிகப்பெரும் முஸ்லிம்களை பெரும்பான்மையாகக் கொண்ட அண்டை நாடான இந்தோனேஷியா உள்ளிட்ட முஸ்லிம் நாடுகளின் வெறுப்பை சம்பாதிக்கும் செயலாக இருக்கும்.
பலஸ்தீனம் சம்பந்தப்பட்ட விவகாரம் இந்தோனேஷியாவில் மிகக் கூருணர்வுமிக்க விடயமாகும். இஸ்ரேல் தொடர்பில் அவுஸ்திரேலியா தனது திட்டங்களை உறுதிப்படுத்தாத வரை இந்தோனேஷியா அவுஸ்திரேலியாவுடனான சுதந்திர வர்த்தக உடன்படிக்கையில் கையெழுத்திடுவதற்கு மறுத்து வருகின்றமை குறிப்பிடத்தக்கது.
-Vidivelli