வலிந்து காணாமலாக்கப்பட்ட முஸ்லிம்கள் பற்றி சாட்சியமளிக்கலாம்
ஞாயிறன்று காத்தான்குடியில் ஜனாதிபதி ஆணைக்குழு அமர்வு
(எம்.எஸ்.எம்.நூர்தீன்)
காத்தான்குடி மற்றும் அதனை அண்டிய முஸ்லிம் பிரதேசங்களில் யுத்த காலத்தில் வலிந்து காணாமலாக்கப்பட்டோரது குடும்ப உறுப்பினர்கள் காணாமலாக்கப்பட்டோர் மற்றும் கடத்தப்பட்டோர் தொடர்பான விசாரணைகளை மேற்கொள்ள உச்ச நீதிமன்ற நீதிபதிகளை உள்ளடக்கிய ஜனாதிபதி ஆணைக்குழு முன்னிலையில் சாட்சியமளிக்க விரும்பின் உடனடியாக காத்தான்குடி பள்ளிவாசல்கள் முஸ்லிம் நிறுவனங்களின் சம்மேளன காரியாலயத்தில் பதிவுகளை மேற்கொள்ளுமாறு காத்தான்குடி பள்ளிவாசல்கள் முஸ்லிம் நிறுவனங்களின் சம்மேளனம் காத்தான்குடி பொது மக்களுக்கு வேண்டுகோள் விடுத்துள்ளது.
காத்தான்குடி பள்ளிவாசல்கள் முஸ்லிம் நிறுவனங்களின் சம்மேளனத்தின் தலைவர் ரஊப் ஏ மஜீட் அதன் செயலாளர் அஷ்ஷெய்க் ஏ.எல்.எம்.சபீல் நளீமி ஆகியோர் வெளியிட்டுள்ள அறிக்கையிலேயே இந்த வேண்டுகோள் விடுக்கப்பட்டுள்ளது.
காத்தான்குடி பள்ளிவாசல்கள் முஸ்லிம் நிறுவனங்கள் சம்மேளனத்தின் வேண்டுகோளின் பேரில் யுத்த காலங்களில் வலிந்து காணாமலாக்கப்பட்டோர் சம்பந்தமான தகவல்களைத் திரட்டுவதற்கும் மேலதிக விசாரணைகளை மேற்கொள்ளவும் இதற்காக நியமிக்கப்பட்ட ஜனாதிபதி ஆணைக்குழு காத்தான்குடி பிரதேசத்திற்கு எதிர்வரும் 23.10.2022 ஆம் திகதி ஞாயிற்றுக்கிழமை வருகை தரவுள்ளனர்.
எனவே வலிந்து காணாமலாக்கப்பட்டோரது குடும்ப உறுப்பினர்கள் இதில் சாட்சியமளிக்க விரும்பின் உடனடியாக சம்மேளன காரியாலயத்தில் இதற்கான பதிவுகளை மேற்கொள்ளுமாறும் கேட்கப்பட்டுள்ளனர். இந்த ஆணைக்குழு காத்தான்குடி கடற்கரை வீதியிலுள்ள ஹோட்டல் பீச் வேயில் அமர்வினை நடாத்தவுள்ளது.
யுத்தகாலத்தில் வலிந்து காணாமல் ஆக்கப்பட்டவர்களின் உறவினர்கள் அது தொடர்பான இறப்பு அத்தாட்சிப்பத்திரம், மற்றும் பொலிஸ் முறைப்பாடு உள்ளடங்கலான ஆவணங்களின் பிரதிகளையும் அலுவலக நேரத்தில் சம்மேளன அலுவலகத்தில் சமர்ப்பித்து தங்களது பதிவுகளை மிக விரைவாக மேற் கொள்ளுமாறு கேட்டுக் கொள்வதாக அதில் மேலும் தெரிவிக்கப்பட்டுள்ளது. – Vidivelli