(ஏ.ஆர்.ஏ.பரீல்)
ஹஜ் யாத்திரைக்காக கடந்த வருடங்களில் விண்ணப்பித்து பதிவுக்கட்டணம் செலுத்தி முஸ்லிம் சமய பண்பாட்டலுவல்கள் திணைக்களத்தில் பதிவு செய்து கொண்டுள்ள 4885 விண்ணப்பதாரிகளில் பலர் தாம் செலுத்திய பதிவுக்கட்டணத்தை மீளப்பெற்றுக்கொள்வதில் ஆர்வம் செலுத்தி வருவதாக அரச ஹஜ் குழுவின் தலைவர் அஹ்கம் உவைஸ் ‘விடிவெள்ளி’க்குத் தெரிவித்தார்.
ஹஜ் யாத்திரைக்காக பதிவு செய்து கொண்டுள்ள இதுவரை ஹஜ் வாய்ப்பு கிடைக்காதுள்ள விண்ணப்பதாரிகள் 326 பேர் கடந்த திங்கட்கிழமை வரை பதிவுக் கட்டணங்களை மீளப்பெற்றுக்கொண்டுள்ளதாகவும் அவர் கூறினார்.
ஹஜ் விண்ணப்பதாரிகள் பதிவுக்கட்டணமாக 25,000 ரூபாவை செலுத்தி முஸ்லிம் சமய பண்பாட்டலுவல்கள் திணைக்களத்தில் தங்களைப் பதிவு செய்துகொண்டுள்ளமை குறிப்பிடத்தக்கது. கடந்த காலங்களில் இலங்கைக்கு குறைவான ஹஜ் கோட்டா வழங்கப்பட்டமை காரணமாக பெரும் எண்ணிக்கையானோருக்கு ஹஜ் வாய்ப்பு கிடைக்காமல் போனமை காரணமாக அவர்கள் இதுவரை காத்திருந்தனர்.
தற்போது ஹஜ் யாத்திரைக்கு வயதெல்லை விதிக்கப்பட்டிருப்பதால் 60 வயதுக்கு மேற்பட்ட விண்ணப்பதாரிகள் தங்களது பதிவுக்கட்டணத்தை மீளப் பெற்று வருகின்றனர்.
கொழும்பு மாவட்டத்திலிருந்தே அதிகமானோர் கடந்த காலங்களில் ஹஜ் யாத்திரைக்கு விண்ணப்பத்திருந்தனர். இம்மாவட்டத்திலிருந்து 1131 பேர் விண்ணப்பித்துள்ளனர் எனவும் அஹ்கம் உவைஸ் தெரிவித்தார். தினமும் சுமார் 10 விண்ணப்பதாரிகள் தங்களது விண்ணப்ப பதிவுக்கட்டணத்தை மீளப்பெற்று வருவதாகவும் அவர் கூறினார்.- Vidivelli