(எம்.எப்.ம்.பஸீர்)
“நவரசம்” என்ற கவிதைத் தொகுப்பு புத்தகத்தை எழுதியமைக்காக கைது செய்யப்பட்டு, பின்னர் அடிப்படைவாதத்தை போதனை செய்ததாக குற்றம் சுமத்தப்பட்டுள்ள அஹ்னாப் ஜஸீம் எனும் இளம் கவிஞர் தொடர்பிலான வழக்கை, ‘முன் விளக்க மாநாட்டுக்கு’ (pre trial conference) மீள திகதி குறித்து புத்தளம் மேல் நீதிமன்றம் எதிர்வரும் நவம்பர் 16 ஆம் திகதிக்கு ஒத்தி வைத்தது.
புத்தளம் மேல் நீதிமன்ற நீதிபதி நதீ அபர்னா சுவந்துருகொட இதற்கான உத்தரவை பிறப்பித்தார்.
இந்த விவகாரம் குறித்த வழக்கு விசாரணைகள் புத்தளம் மேல் நீதிமன்றில் கடந்த 10 ஆம் திகதி விசாரணைக்கு வந்திருந்தது.
இதன்போது அஹ்னாப் ஜஸீம் சார்பில் ஆஜரான சட்டத்தரணிகள் மற்றும் அரச சட்டவாதியின் இணக்கத்துடன் இந்த திகதி தீர்மானிக்கப்பட்டுள்ளது.
அத்துடன் சுமார் 579 நாட்களின் பின்னர் கடந்த 2021 டிசம்பர் 16 ஆம் திகதி 5 இலட்சம் ரூபா பெறுமதியான 3 சரீரப் பிணைகளில் விடுவிக்கப்பட்டிருந்த, இவ்வழக்கின் பிரதிவாதியான அஹ்னாப் ஜஸீமும் மன்றில் ஆஜராகியிருந்தார்.
இந்த வழக்கில் பிரதிவாதி அஹ்னாப் ஜஸீமுக்காக சிரேஷ்ட சட்டத்தரணி ருஷ்தி ஹபீப் ஆஜராகும் நிலையில் வழக்குத் தொடுநர் சார்பில் அரச சட்டவாதி உதார கருணாதிலக ஆஜராகின்றார்.
கடந்த 2020 மே 16 ஆம் திகதி இரவு 8 மணியளவில், சிலாவத்துறை, பண்டாரவெளியில் அமைந்துள்ள வீட்டில் வைத்து அஹ்னாப் ஜஸீம் கைது செய்யப்பட்டிருந்தார். முதலில் கோட்டை நீதிமன்றில் உள்ள பீ 13101/19 வழக்கு தொடர்பில் அஹ்னாப் கைது செய்யப்பட்டதாக கூறப்பட்டாலும், கடந்த 2021 மார்ச் 3 ஆம் திகதி பிரதி சொலிசிட்டர் ஜெனரால் திலீப பீரிஸ் கோட்டை நீதிமன்றின் குறித்த வழக்கில் அஹ்னாப் சந்தேகநபரில்லை என நீதிமன்றில் அறிவித்திருந்தார்.
இந் நிலையிலேயே அவருக்கு எதிராக கொழும்பு 8 ஆம் இலக்க நீதிவான் நீதிமன்றில் பீ. 44230/20 எனும் இலக்கத்தின் கீழ் விசாரணை தகவல்கள் தாக்கல் செய்யப்பட்டிருந்தது. பின்னர் அதனை மையப்படுத்தி சட்ட மா அதிபர் பயங்கரவாத தடை சட்டத்தின் 2 (1) ஏ பிரிவின் கீழ் தண்டனைக்குரிய குற்றம் ஒன்றினை புரிந்துள்ளதாக கூறி குற்றப் பகிர்வுப் பத்திரம் தாக்கல் செய்துள்ளார். இந்த வழக்கே தற்போது ஒத்தி வைக்கப்பட்டுள்ளது.- Vidivelli