எப்.பி.ஐ.யினர் எடுத்துச் சென்று பகுப்பாய்வு செய்த சஹ்ரானின் தொலைபேசி குறித்த அறிக்கை எங்கே?
சாரா, சாராவின் தாயாரின் தொலைபேசி பகுப்பாய்வு அறிக்கையும் வேண்டும்; சிரேஷ்ட சட்டத்தரணி ருஷ்தி ஹபீப் வாதம்
எம்.எப்.எம். பஸீர்
உயிர்த்த ஞாயிறு தின குண்டுத் தாக்குதல்களுக்கு தலைமை வகித்ததாக கூறப்படும் பிரதான தற்கொலை குண்டுதாரி சஹ்ரான் ஹஷீம் பயன்படுத்தியதாக கூறப்படும் கையடக்கத் தொலைபேசி, அமெரிக்காவின் எப்.பி.ஐ. விசாரணையாளர்களால் எடுத்துச் செல்லப்பட்டு பகுப்பாய்வு செய்யப்பட்ட நிலையில், அது குறித்த அறிக்கையை மன்றில் சமர்ப்பிக்க உத்தரவிட வேண்டும் என சிரேஷ்ட சட்டத்தரணி ருஷ்தி ஹபீப் கல்முனை மேல் நீதிமன்றில் வாதிட்டார்.
‘சஹ்ரானின் தொலைபேசி தொடர்பிலான பகுப்பாய்வு அறிக்கை மன்றில் முன் வைக்கப்படவில்லை என்பதும், அது சான்றாக முன் வைக்கப்பட்டிருக்க வேண்டும் எனவும் நான் கடந்த தவணையின் போது சுட்டிக்காட்டினேன். எனினும் பிரதிவாதி அல்லது சஹ்ரான் தொடர்பில் எந்த தொலைபேசி பகுப்பாய்வு அறிக்கைகளும் பெறப்படவில்லை என புலனாய்வாளர்கள் தெரிவித்ததாக பிரதி சொலிசிட்டர் ஜெனரால் கடந்த தவணையில் கூறினார்.
அப்படியானால், அமரிக்காவின் எப்.பி.ஐ. யினர் எடுத்துச் சென்று பகுப்பாய்வு செய்த சஹ்ரானின் தொலைபேசி பகுப்பாய்வு அறிக்கை எங்கே? அவ்வாறு சஹ்ரானின் தொலைபேசி எடுத்துச் செல்லப்பட்டிருப்பின் அதனை மன்றில் சமர்ப்பிக்கவும், அத்தகைய அறிக்கையை பெற நீதிமன்றம் தலையீடு செய்ய வேண்டும்’ என சிரேஷ்ட சட்டத்தரணி ருஷ்தி ஹபீப் மன்றில் குறிப்பிட்டார்.
2019 ஆம் ஆண்டு ஏப்ரல் 21ஆம் திகதிக்கும் 2019 ஆம் ஆண்டு ஏப்ரல் 26 ஆம் திகதிக்கும் இடைப்பட்ட காலப்பகுதியில் சாரா ஜஸ்மின் என்றழைக்கப்பட்ட புலஸ்தினி மகேந்திரன் என்பவர் வெடிபொருட்களை தயாரித்தமை மற்றும் அவற்றை சேகரித்து வைத்திருந்தமை தொடர்பில் நிந்தவூரில் வைத்து அறிந்திருந்தும் (சாரா ஜெஸ்மின் தெரிவித்ததன் ஊடாக), அந்த தகவலை பொலிஸாருக்கு அறிவிக்காமை குறித்து பாத்திமா ஹாதியாவுக்கு எதிராக பயங்கரவாத தடை சட்டத்தின் 5 ஆம் அத்தியாயத்தின் அ, ஆ பிரிவுகளின் கீழ் குற்றப் பகிர்வுப் பத்திரம் தாக்கல் செய்யப்பட்டுள்ளது.
எச்.சி. 653/ 21 எனும் குறித்த குற்றப் பகிர்வுப் பத்திரம் கடந்த 2021 நவம்பர் 12 ஆம் திகதி தாக்கல் செய்யப்பட்டுள்ளது.
அந்த குற்றப் பகிர்வுப் பத்திரத்தில், கோட்டை முன்னாள் நீதிவான் ரங்க திஸாநாயக்க, சி.ஐ.டி. அதிகாரிகள், ஒரு இராணுவ வீரர் உள்ளடங்கலாக 30 சாட்சியாளர்கள் பட்டியலிடப்பட்டுள்ளதுடன், சான்றாவணமாக ஒரே ஒரு ஒப்புதல் வாக்குமூலம் மட்டும் நிரலிடப்பட்டுள்ளது.
இது குறித்த வழக்கு, கல்முனை மேல் நீதிமன்றத்தில் நீதிபதி ஜெயராம் ட்ரொஸ்கி முன்னிலையில் கடந்த செப்டம்பர் 30 ஆம் திகதி முன் விளக்க மாநாட்டுக்காக விசாரணைக்கு எடுத்துக்கொள்ளப்பட்டது.
இதன்போதே பிரதிவாதி ஹாதியாவுக்காக சட்டத்தரணி ரிஸ்வான் உவைஸுடன் ஆஜராகி சிரேஷ்ட சட்டத்தரணி ருஷ்தி ஹபீப் மேற்படி விடயங்களை மன்றில் முன் வைத்தார்.
இதனிடையே, சஹ்ரான் ஹஷீமின், மனைவி அப்துல் காதர் பாத்திமா ஹாதியா வழங்கியுள்ள குற்ற ஒப்புதல் வாக்கு மூலத்தின் சுயாதீனத் தன்மை குறித்து தீர்மானிக்க உண்மை விளம்பல் விசாரணை ஒன்றினை முன்னெடுக்க கல்முனை மேல் நீதிமன்றம் இதன்போது தீர்மானித்துள்ளது.
பயங்கரவாத தடைச் சட்டத்தின் 8 ஆம் அத்தியாயத்தின் கீழ் கோட்டை நீதிவானிடம் வழங்கப்பட்டுள்ள குறித்த ஒப்புதல் வாக்குமூலத்தின் சுயாதீனத் தன்மையை, அப்துல் காதர் பாத்திமா ஹாதியா சார்பில் மன்றில் ஆஜராகும் சிரேஷ்ட சட்டத்தரணி ருஷ்தி ஹபீப் சவாலுக்கு உட்படுத்திய நிலையிலேயே, இந்த உண்மை விளம்பல் விசாரணையை முன்னெடுக்க நீதிமன்றம் தீர்மானித்துள்ளது.
அவ்வாறான விசாரணை ஒன்றுக்கு, வழக்குத் தொடுநர் சட்ட மா அதிபர் தரப்பும் எதிர்ப்பு வெளியிடாத நிலையில், இந்த வழக்கில் ஒரே ஒரு சான்றான ஒப்புதல் வாக்குமூலம் தொடர்பில் உண்மை விளம்பல் விசாரணையை முன்னெடுக்க நீதிமன்றம் தீர்மானிப்பதாக கல்முனை மேல் நீதிமன்ற நீதிபதி ஜெயராம் ட்ரொஸ்கி அறிவித்தார்.
கடந்த செப்டம்பர் 30 ஆம் திகதி முன் விளக்க மாநாட்டின் போது, வழக்குத் தொடுநரால் முன்மொழியப்பட்ட ஏற்புகள் தொடர்பில் கலந்துரையாடப்பட்டது. இதன்போது வழக்குத் தொடுநரால் 24 ஏற்புகள் முன் மொழியப்பட்ட போதும் அதில் பெரும்பாலானவையை ஏற்க பிரதிவாதி தரப்பு இணங்கவில்லை.
பாத்திமா ஹாதியா பயங்கரவாத தடைச் சட்டத்தின் 8 ஆம் பிரிவின் கீழ் வழங்கிய வாக்குமூலங்கள் கோட்டை நீதவான் நீதிமன்றத்தில் பதிவு செய்யப்பட்டுள்ளமையை பிரதிவாதி தரப்பு ஏற்றுக்கொண்ட போதும், அவ்வாறு வழங்கப்பட்ட வாக்குமூலங்கள் சி.ஐ.டி.யினரின் அச்சுறுத்தல், வாக்குறுதி அல்லது வேறு சட்டவிரோதமாக ஏற்படுத்தப்பட்ட எதிர்பார்ப்புகளின் நிமித்தம் வழங்கப்பட்டதாகவும் அந்த குற்ற ஒப்புதல் வாக்குமூலங்கள் சுயவிருப்பின் பேரில் வழங்கப்படவில்லை எனவும் பிரதிவாதி சார்பில் தெரிவிக்கப்பட்டுள்ளது.
இவ்வாறான பின்னணியிலேயே நீதிமன்றம் குற்ற ஒப்புதல் வாக்கு மூலம் தொடர்பில் உண்மை விளம்பல் விசாரணையினை முன்னெடுக்க தீர்மானித்தது.
இதனைவிட, சாய்ந்தமருது – வெலிவேரியன் கிராமத்தில் நடந்த சம்பவத்தையும், 2019 ஏப்ரல் 21 ஆம் திகதி நடந்த வெடிப்புச் சம்பவங்களும் தற்கொலை குண்டுத் தாக்குதல்கள் என வழக்குத் தொடுநர் கையளித்த ஏற்புகளில் முன் மொழியப்பட்டிருந்தன.
எனினும் பிரதிவாதி, குறித்த தாக்குதல்கள் தற்கொலை தாக்குதல்களா அல்லது வேறு வடிவங்களைக் கொண்டனவா என்பது தொடர்பில் தனக்கு தெரியாது என அறிவித்து அந்த ஏற்புகளை திருத்தங்களுடன் ஏற்றிருந்தார்.
பிரதிவாதி ஹாதியாவுக்காக ஆஜரான சிரேஷ்ட சட்டத்தரணி ருஷ்தி ஹபீப், ‘2019 ஏப்ரல் 21 ஆம் திகதி நடந்த தாக்குதல்கள் தற்கொலை தாக்குதல்களா அல்லது வேறு உக்திகளைக் கொண்டதா என இன்னும் நிரூபிக்கப்படவில்லை. அது குறித்த சிறப்பு ட்ரயல் அட்பார் நீதிமன்ற விசாரணைகள் நிலுவையில் உள்ள நிலையில், அவை தற்கொலை தாக்குதல்களே என வழக்குத் தொடுநர் தரப்பு ஏற்புகளை முன் வைத்துள்ளனர். அதனை ஒருபோதும் ஏற்க முடியாது. மற்றையது, எனது சேவை பெறுநருக்கு, அந்த தாக்குதல்களின் வடிவம் தொடர்பில் எதுவும் தெரியாது. எனவே அதனை ஏற்க முடியாது.’ என குறிப்பிட்டார்.
கடந்த செப்டம்பர் 30 ஆம் திகதி நடந்த வழக்கின் முன் விளக்க மாநாட்டின் போது, பிரதிவாதி தரப்பினரால் நியாயமான வழக்கு விசாரணைகளை முன்னெடுக்கும் பொருட்டு, 5 முக்கிய சான்றாவணங்கள் வழக்குத் தொடுநரிடம் கோரப்பட்டது. அதாவது பிரதிவாதி குற்றமற்றவர் என உறுதி செய்ய அந்த ஆவணங்கள் அவசியம் என சுட்டிக்காட்டி இவ்வாறு அவை கோரப்பட்டன.
1. உடைந்த நிலையில் மீட்கப்பட்டதாக கூறப்பட்ட சஹ்ரான் ஹஷீமின் தொலைபேசியின் பகுப்பாய்வு அறிக்கை (அதிலிருந்த மென் பொருட்கள், செயலிகள் உள்ளடங்கலாக)
2. 0752607503 எனும் ‘கவிதா ‘ என்பவர் (சாராவின் தாயார்)பயன்படுத்திய தொலைபேசி பகுப்பாய்வு அறிக்கை
3. சாரா ஜெஸ்மின் பயன்படுத்திய தொலைபேசி குறித்த முழுமையான பகுப்பாய்வு அறிக்கை
4. பிரதிவாதி பாத்திமா ஹாதியா, குண்டு வெடிப்பில் காயமடைந்து அம்பாறை மற்றும் கொழும்பு தேசிய வைத்தியசாலைகளில் அனுமதிக்கப்பட்டமை, அங்கிருந்து சிகிச்சைகளை முடித்துக்கொண்டமை தொடர்பிலான ஆவணங்கள்
5. கல்முனை நீதிமன்றின் கீழ் நிலுவையில் உள்ள 671/21 எனும் இலக்கத்தை உடைய வழக்கின் முழுமையான கோவை (சாரா தப்பிச் செல்ல உதவியதாக கூறி கைதான பிரதான பொலிஸ் பரிசோதகர் அபூபக்கருக்கு எதிரான வழக்கு)
இந்த பிரதான 5 கோரிக்கைகளை மையப்படுத்தி வழக்குதி பிரதிவாதி தரப்பில் முன் வைக்கப்பட்ட வாதங்களுக்கு வழக்குத் தொடுநர் சட்ட மா அதிபர் சார்பில் மன்றில் ஆஜரான பிரதி சொலிசிட்டர் ஜெனரால் சுஹர்ஷி ஹேரத் தமது தரப்பு நிலைப்பாட்டை மன்றில் முன்னிறுத்தினார்.
‘சஹ்ரான் பயன்படுத்திய தொலைபேசி குறித்த பகுப்பாய்வு அறிக்கை பிரதிவாதி தரப்பால் கோரப்படுகின்றது. சஹ்ரான் பயன்படுத்திய உறுதியான இலக்கங்கள் அளிக்கப்படுமாக இருந்தால், அது குறித்த தகவல்கள் வழக்குத் தொடுநர் தரப்பிடம் இருந்தால், இந்த நீதிமன்றம் கட்டளை இடுமாக இருந்தால் அந்த தகவல்களை வழங்க ஆட்சேபனை இல்லை. எனினும் கோரப்படும் விடயங்களின் காலப்பகுதியும் கூறப்படல் வேண்டும். பிரதிவாதி கோரும் விடயங்கள், வழக்குடன் தொடர்புபடாதவை. எனினும் நீதிமன்றம் தீர்மானிக்குமால் மட்டும், வழக்குத் தொடுநரிடம் அந்த தகவல்கள் இருந்தால் வழங்க ஆட்சேபனை இல்லை.
எம்மை பொறுத்தவை, இவ்வழக்கை நிரூபிக்க எமக்கு சஹ்ரானின் தொலைபேசி பகுப்பாய்வு அறிக்கை தேவையற்றது.
அதே போல கவிதா மற்றும் சாரா ஜெஸ்மினின் தொலைபேசி பகுப்பாய்வுகள் தொடர்பிலும் வழக்குத் தொடுநரின் நிலைப்பாடு, சஹ்ரானின் தொலைபேசி பகுப்பாய்வு அறிக்கை கோரலை ஒத்தது.
பிரதிவாதி ஹாதியாவின் சிகிச்சை தொடர்பிலான ஆவணங்களை கையளிக்க வழக்குத் தொடுநர் தரப்பு தயாராக உள்ளது.
இம்மன்றில் உள்ள மற்றொரு வழக்கு ஆவணம் தொடர்பில் முன் வைக்கப்பட்டுள்ள கோரிக்கை தொடர்பில், அதனை பிரதிவாதி தரப்பு நகர்த்தல் பத்திரம் ஊடாக பெற்றுக்கொள்ள முடியும் என்பதே எமது நிலைப்பாடாகும்.’ என பிரதி சொலிசிட்டர் ஜெனரால் சுஹர்ஷி ஹேரத் குறிப்பிட்டார்.
இதனையடுத்து மீளவும் மன்றில் வாதங்களை முன் வைத்த சிரேஷ்ட சட்டத்தரணி ருஷ்தி ஹபீப், ‘சஹ்ரான் மற்றும் சாரா ஆகியோரின் தொலைபேசி பகுப்பாய்வுப் பதிவுகள் வழக்குத் தொடுநருக்கு சாட்சியமாக தேவைப்படாவிட்டாலும், இவ்வழக்குக்கு மிக முக்கியமான சாட்சிகளாக பிரதிவாதி தரப்பு கருதுகிறது.
சஹ்ரானின் ‘ஹுவாவி’ ரக கையடக்கத் தொலைபேசியில் இருந்த செயலி (திரிமா) உள்ளிட்ட விடயங்கள் குறித்த பகுப்பாய்வு அறிக்கையே வேண்டும். கடந்த 2018 ஒக்டோபர் முதல் 2019 ஏப்ரல் 26 ஆம் திகதி வரையிலான காலப்பகுதிக்குரியதாக அவை அமையப் பெற்றிருத்தல் வேண்டும்.’ என குறிப்பிட்டார்.
இதனையடுத்து வழக்குத் தொடுநர் சார்பில் ஆஜரான பிரதி சொலிசிட்டர் ஜெனரால் சுஹர்ஷி ஹேரத் மீளவும் வாதங்களை முன் வைத்தார்.
‘மன்றில் சட்ட மா அதிபர் முன் வைக்கப்பட்டுள்ள குற்றப் பத்திரிகை பயங்கரவாத தடைச் சட்டத்தின் கீழானது. அதிலுள்ள குற்றச்சாட்டினை உறுதி செய்ய வழக்குத் தொடுநருக்கு, பயங்கரவாத தடைச் சட்டத்தின் 8 ஆம் பிரிவின் கீழ் பிரதிவாதி வழங்கியுள்ள ஒப்புதல் வாக்கு மூலம் போதுமானது.
குறித்த ஒப்புதல் வாக்கு மூலம் சுயாதீனமானது என தீர்மானிக்கப்படுமாக இருந்தால், அதில் உள்ளடங்கும் விடயங்களும் உண்மை என்றே கருதப்படும். மாற்றமாக, ஒப்புதல் வாக்கு மூலத்தில் கூறப்பட்டுள்ள விடயங்களை உண்மை என புறம்பாக நிரூபிக்க வேண்டிய தேவை வழக்குத் தொடுநருக்கு இல்லை. வழக்குத் தொடுநரை பொறுத்தவரை, பிரதிவாதி பயங்கரவாத தடைச் சட்டத்தின் 8 ஆம் அத்தியாயத்தின் கீழ் நீதிவானுக்கு வழங்கிய வாக்குமூலம் சுயாதீனமானது என கருதுவதாலேயே நாம் அதனை மையப்படுத்தி இவ்வழக்கை தாக்கல் செய்துள்ளோம்’ என குறிப்பிட்டார்.
இதனையடுத்து சஹ்ரான், சாரா, சாராவின் தாயாரின் தொலைபேசி பகுப்பாய்வு அறிக்கைகள் குறித்து முன் வைக்கப்பட்ட நீண்ட சமர்ப்பணங்களை மையப்படுத்தி நீதிபதி ஜெயராம் ட்ரொஸ்கி தனது உத்தரவை அறிவிக்கையில், “பிரதிவாதி தரப்பு கோரும் தொலைபேசி பகுப்பாய்வு அறிக்கைகள், விசாரணையாளர்கள் வசம் இருக்குமானால் அதனை சாட்சியமளிக்கும் போது கையளிப்பதற்கு இந்த நீதிமன்றம் உத்தரவிடுகிறது.’ என்றார்.
இது இவ்வாறிருக்க குறித்த அவ் வழக்கு விசாரணையின் இடையே, பிரதிவாதி பாத்திமா ஹாதியா சார்பில் பிணை கோரிக்கையும் முன் வைக்கப்பட்டது. அது குறித்து ஏற்கனவே சமர்ப்பிக்கப்பட்டுள்ள எழுத்து மூல சமர்ப்பணங்களை மையப்படுத்தி, அவரை பிணையில் விடுவிக்குமாறு கோரப்பட்டுள்ளது. நீண்டகாலமாக (மூன்று வருடங்கள் 5 மாதங்கள்) தடுப்புக் காவல் அல்லது விளக்கமறியலில் வைக்கப்பட்டுள்ளமை, விஷேட காரணிகளை மையப்படுத்தி இந்த பிணை கோரிக்கை முன் வைக்கப்பட்டுள்ளது. இந் நிலையில் குறித்த கோரிக்கை தொடர்பில் வழக்குத் தொடுநரால் தமது ஆட்சேபனைகளை எழுத்து மூலமாக சமர்ப்பிப்பதற்கு தவணை கோரப்பட்ட நிலையில், அதற்கான அவகாசம் வழங்கப்பட்டது.
இதனையடுத்து, இது குறித்த வழக்கு மேலதிக முன் விளக்க மாநாடு தொடர்பிலும், பிணை தொடர்பிலான தீர்மானத்துக்காகவும் எதிர்வரும் நவம்பர் மாதம் 18 ஆம் திகதி வரை ஒத்திவைக்கப்பட்டது.
வழக்குத் தொடுநர் சட்ட மா அதிபர் சார்பில் பிரதி சொலிசிட்டர் ஜெனரால் சுஹர்ஷி ஹேரத் தலைமையில், அரச சட்டவாதிகளான சத்துரி விஜேசூரிய, மாதினி விக்னேஷ்வரன் ஆகியோரும் பிரதிவாதிக்காக சிரேஷ்ட சட்டத்தரண் ருஷ்தி ஹபீப் தலைமையின் சட்டத்தரணி ரிஸ்வான் உவைஸ் உள்ளிட்ட குழுவினரும் மன்றில் ஆஜராகினர்.- Vidivelli