பேராசிரியர் எம்.எஸ்.எம்.அனஸ்
தெஹ்ரான் தலைநகரிலும் இன்னும் பல நகரங்களிலும் ஆயிரக்கணக்கானோர் ஆர்ப்பாட்டங்களிலும் வீதிப்போராட்டங்களிலும் ஈடுபட்டு வருகின்றனர். மாஷா அமீனி எனும் பெண்ணின் மரணத்தைக் கண்டித்து எழுச்சி பெற்றுள்ள இப்போராட்டங்களில் பெண்களும் நடுத்தரவகுப்பு மக்களும் அதிகம் பங்கேற்று வருகின்றனர்.
ஈரானின் வடமேற்குப்பிராந்திய குர்திஷ் மாநிலத்தைச் சேர்ந்த 22 வயது குர்திஷ் பெண் மாஷா அமீனி ஈரானிய ஒழுக்கக் காவல் பிரிவினரால் கைது செய்யப்பட்டு சில மணித்தியாலங்களில் இறந்துள்ளார். சுயநினைவு இழந்த நிலையிலேயே காவல் பிரிவினர் அவரை தெஹ்ரான் காஸ்கர் வைத்தியசாலையில் அனுமதித்துள்ளனர் என்று வைத்தியசாலை வட்டாரங்கள் தெரிவித்தன.
ஹிஜாப் ஆடையை முறையாக அணியவில்லை என்ற குற்றச்சாட்டின் கீழ் மாஷா அமீனி கைது செய்யப்பட்டு ஒழுக்க பொலிஸினால் விசாரணை நிலையத்திற்கு அழைத்துச் செல்லப்பட்டுள்ளார். இரண்டு மணித்தியாலங்களில் அங்கிருந்து அமீனி மருத்துவமனையில் சேர்க்கப்பட்டதைத் தொடர்ந்து பிரச்சினைகள் ஆரம்பமாகியுள்ளன. இச்செய்தி பரவியதைத் தொடர்ந்து மக்கள் மருத்துவமனை வட்டாரத்தில் ஒன்று கூடினர். இரு நாட்கள் நினைவிழந்த நிலையில் இருந்த அமீனி, செப்டெம்பர் 16 அன்று உயிரிழந்தார் என்று அறிவிக்கப்பட்டதைத் தொடர்ந்து அமைதியின்மை ஆரம்பமாகியது.
மாஷா அமீனி குர்திஷ் மாநிலத்திலிருந்து தெஹ்ரானுக்குத் தனது சகோதரனோடு வந்திருந்த போது ஒழுக்க பொலிஸார் அவளைக் கைது செய்துள்ளனர். அடக்கமான ஆடை ஒன்றை அமீனி அணிந்திருந்த போதும் ஈரானின் அரசாங்க ஆடை ஒழுக்கவிதிகளை முறையாக அவள் கடைப்பிடிக்கவில்லை என பொலிஸ் அவள்மீது குற்றம் சுமத்தியுள்ளது. காவல் நிலையத்தில் விசாரணையின் போது மாரடைப்பினால் மயங்கி விழுந்ததாகப் பொலிஸ் தரப்புக் கூறியது. காவல் நிலையத்துக்கு விசாரணைக்காகத் தடுத்து வைத்திருந்த போது அவளது சகோதரன் அங்கு நின்றிருக்கிறான். அம்புலன்ஸ் வண்டியில் அவள் ஏற்றிச் செல்லப்படுவதையும் அவன் பார்த்திருக்கிறான்.
தமது மகள் மாரடைப்பினால் இறந்தாள் என்பதை பெற்றோர் ஏற்றுக்கொள்ளவில்லை.
‘தேக ஆரோக்கியத்துடனும் நல்ல நிலையிலும் அவள் இருந்தாள்’ என்று பெற்றோர் கூறியுள்ளனர். மனித உரிமை உதவி உயர் ஸ்தானிகர் நாதா அல் நாஸிப் கடும் வார்த்தைகளால் இப்பிரச்சினையை அணுகியுள்ளார்.
‘மாஷா அமீனி உடைய பரிதாபமான மரணத்தைப் பற்றியும் அவள்மீது நடத்தப்பட்டதாக கூறப்படும் சித்திரவதையைப் பற்றியும் பாரபட்சமற்ற முறையில் சுதந்திரமான அறிக்கையொன்றை விரைவில் தகுதிவாய்ந்த அதிகாரிகள் வெளியிட வேண்டும்’ என்று திருமதி நாஸிப் அரசிடம் கேட்டுள்ளார்.
கடந்த சில மாதங்களாக ஹிஜாப் தொடர்பில் ஒழுக்கக் காவலர்கள் நடத்திவரும் வரம்பு கடந்த செயல்கள் பற்றிய காணொளிகளை ஐ.நா. பெற்றுள்ளதென்றும் துன்புறுத்தல்கள் நடந்து வருவதாகவும் மேலும் அவர் கூறியிருந்தார்.
அமீனி தாக்கப்பட்டு துன்புறுத்தலுக்குள்ளாகியே இறந்தாள் என்பதே இன்று பரவியுள்ள கவலை தரும் செய்தியாகும். மாரடைப்பினால் அல்ல தலையில் தாக்கியதால் ஏற்பட்ட மரணம் என்று டாக்டர் ஹுஸைன் கரும்பூர் உள்ளிட்ட சில மருத்துவ வட்டாரங்கள் தமது கருத்துக்களை வெளியிட்டுள்ளன. அமீனியின் மரணத்தில் ஈரானிய வைத்தியர் சங்கம் நேர்மையாக நடக்க வேண்டும் என்று டாக்டர் ஹுஸைன் கூறியுள்ளார்.
ஈரானில் இஸ்லாமியப் புரட்சியினால் 1979 இல் அமைக்கப்பட்ட அரசாங்கம் பெண்களுக்கான (9 வயதிலிருந்து) கட்டாய ஹிஜாப் ஆடைவிதிகளை அமுல் செய்தது. அடுத்த சில வருடங்களில் அமைக்கப்பட்ட ஒழுக்க பொலிஸிடம் ஹிஜாப் கண்காணிப்பு ஒப்படைக்கப்பட்டது. சட்டம் தீவிரமாகச் செயற்படுத்தப்பட்டது. ‘ஒழுக்க விதி மீறல்’ என்று வருடந்தோறும் ஆயிரக்கணக்கான பெண்கள் கைது செய்யப்பட்டனர். விசாரணைக்குட்படுத்தப்பட்டு வந்தனர். ஆனால் அநேக ஈரானியப் பெண் அமைப்புக்கள் 2010 இல் இருந்தே அவ்வப்போது எதிர்ப்புக்களை வெளிப்படுத்தி வந்துள்ளன. இவ்வாறு போராடிய சில பெண்கள் சிறையில் அடைக்கப்பட்டனர்.
‘உங்களது செயலால் ஈரான் களங்கப்பட்டுள்ளது’ என்று மூத்த பாராளுமன்ற உறுப்பினர் ஜலா ரஷீதி கூச்சி ஒழுக்க காவல் துறையைக் கண்டித்துள்ளார். மூத்த ஆயத்துல்லாக்களில் சிலரும் தமது கண்டனத்தை வெளியிட்டுள்ளனர்.
‘ஒழுக்கப் பாதுகாவல்’ என்பது சட்ட ரீதியற்றது மட்டுமல்ல இஸ்லாத்திற்கு முரணானது என்று ஆயத்துல்லா பயாத் ஸன்ஜானி 17 செப்டெம்பர் அன்று வெளியிட்ட செய்திக் குறிப்பில் கூறியுள்ளார்.
ஒழுக்கத்தைப் பாதுகாக்கவும் தீய செயல்களைக் கட்டுப்படுத்தவும் காவல் துறைகள் அமைக்கப்படுவது இஸ்லாமியப் போதனைகளுக்கு ஏற்புடையதல்ல என்று ஆயத்துல்லா மொஹாகெக் தமாத் கூறியுள்ளார். ஊழல் புரியும் அரசியல்வாதிகள் தான் கண்காணிக்கப்பட வேண்டும், பிரஜைகளின் சுதந்திரம் தடுக்கப்படக்கூடாது என்றும் அவர் கூறியுள்ளார்.
‘இந்த ஒழுக்கப்படை ஒழிக்கப்பட வேண்டும். அதைத்தான் மாஷா அமீனியின் குரூர மரணம் எமக்குக் கூறுகிறது’ என்று கோஷம் எழுப்பியுள்ளார்.
செப்டெம்பர் 17இல் தெஹரானில் சில பகுதிகளிலும் அமீனியின் சொந்த குர்திஷ் பிரதேசத்திலும் ஆர்ப்பாட்டங்கள் ஆரம்பமாகின. ஆர்ப்பாட்டங்களின் போது சில நகரங்களில் ஹிஜாபைக் கழற்றியதோடு சிலர் கூந்தல்களையும் அறுத்தெறிந்தனர். ஹிஜாப் உடைக் கண்காணிப்பாளர்களாகச் செயற்படும் ஒழுக்கக் காவல்படையைக் கண்டித்து கோஷங்கள் எழுப்பப்பட்டன. ஹிஜாப் உடையை அரசு கட்டாயப்படுத்தித் தம்மீது திணிப்பதாகவும் ஆர்ப்பாட்டக்காரர்கள் அரசைக் குற்றம் சுமத்தினர். தற்போதைய அதிஉயர் ஆன்மீகத் தலைவரான ஆயத்துல்லா கமெய்னி ஒரு சர்வாதிகாரி என்று பல பதாகைகளையும் ஊர்வலங்களில் மக்கள் தூக்கிச் சென்றனர். ஆத்திரமடைந்த ஆர்ப்பாட்டக்காரர்கள் பாதைகளில் காட்சிப்படுத்தப்பட்டிருந்த ஆயதுல்லா கமெய்னியின் பதாகைகளையும் உடைத்து எறிந்தனர். வீதிகளில் ஆர்ப்பாட்டக்காரர்களுக்கும் பொலிஸாருக்கும் இடையில் கடும் வாக்குவாதங்களும் தாக்குதல்களும் இடம்பெற்று வருகின்றன.
ஹிஜாப் பற்றிய அரசாங்க உடை ஒழுக்கவிதி எவ்வாறிருந்தாலும் மாஷா அமீனி மிதமான அல்லது அடக்கமான ஆடையுடன் இருந்ததைப் பலர் சுட்டிக்காட்டியுள்ளனர்.
தலை முழுமையாக மறைக்கப்படவில்லை, சட்டப்படி தளர்வான ஆடை அணியவில்லை என்பதே அமீனியின் கைதுக்குக் காரணம் என கூறப்படுகின்றனது. அவள் காதுகளில் இருந்து இரத்தம் வழிய கண்கள் சிராய்ப்புக்களினால் பழுதடைய என்ன காரணம் என்பதை ஈரானின் சில வைத்தியர்கள் ஒழுக்கப்படையினரின் அடாவடித்தனம் இதில் வெளிப்படுவதாக மறைமுகமாக கூறியுள்ளனர். ஒரு சொந்த நாடு அதன் குடிமக்களை எப்படி இவ்வாறு நடத்தமுடியும்?
பெயர் சொல்ல விரும்பாத இளம்பெண் ஒருவர், ‘பொருத்தமற்ற ஹிஜாப் ஆடை’ குற்றத்தின் கீழ் தான் இரண்டு முறை கைது செய்யப்பட்டு விசாரணைக்குட்படுத்தப்பட்டதாகவும் இவ்வாறு வருடத்தில் ஆயிரக்கணக்கானோர் கைது செய்யப்படுவதாகவும் கூறுகிறார். சொல்லப்போனால் கடலுள் அமிழ்ந்து கிடக்கும் பனிமலை போன்ற விடயம் இது. ‘அவளது இறுதி வாசகங்கள் அதைத் தான் கூறுகின்றன. ‘ஒரு பயம், விரக்தி, வெட்கம், நம்பிக்கை, இழப்பு, மன அழுத்தம் எம்மைத்தாக்கி வருகின்றன’– Vidivelli