(ஏ.ஆர்.ஏ.பரீல்)
அநுராதபுரம் அசரிகம ஜும்ஆ பள்ளிவாசல் நிர்வாகத்தை முன்னெடுப்பதற்கு தற்போதைய நிர்வாக சபைக்குப் பதிலாக விஷேட நிர்வாகிகளை நியமிப்பதற்கு முஸ்லிம் சமய பண்பாட்டலுவல்கள் திணைக்களம் தீர்மானித்துள்ளது. விஷேட நிர்வாக சபையொன்றினை நியமிக்குமாறு வக்பு சபையிடம் கோரவுள்ளதாக திணைக்களத்தின் பணிப்பாளர் இப்ராஹிம் அன்ஸார் தெரிவித்தார்.
அசரிகம ஜும்ஆ பள்ளிவாசல் நிர்வாகியொருவர் அண்மையில் சக நிர்வாகியொருவரால் தாக்கப்பட்டு படுகொலை செய்யப்பட்டதாகக் கூறப்படும் சம்பவத்தையடுத்தே இத்தீர்மானம் மேற்கொள்ளப்பட்டுள்ளது.
இதேவேளை இக்கொலைச் சம்பவம் தொடர்பில் பூரண அறிக்கையொன்றினைச் சமர்ப்பிக்கும்படி முஸ்லிம் சமய பண்பாட்டலுவல்கள் திணைக்களம், அப்பிரதேசத்துக்குப் பொறுப்பான கள உத்தியோகத்தரைக் கோரியிருந்தது. அத்தோடு அநுராதபுரம் பரசன்கஸ்வெவ பொலிஸிலிருந்தும் இக்கொலைச் சம்பவம் தொடர்பான அறிக்கை கோரப்பட்டிருந்தது.
இதேவேளை திணைக்களத்தின் கள உத்தியோகத்தரின் அறிக்கை திணைக்களத்துக்கு கிடைக்கப்பெற்றுள்ள நிலையில் பொலிஸ் அறிக்கை இதுவரை கிடைக்கப்பெறவில்லை என திணைக்களத்தின் பணிப்பாளர் இப்ராஹிம் அன்ஸார் தெரிவித்தார்.
அறிக்கை கிடைக்கப்பெற்றதும் சந்தேக நபர்களான பள்ளிவாசல் நிர்வாகிகளுக்கு எதிராக சட்ட நடவடிக்கை மேற்கொள்ளப்படும் என்றார்.- Vidivelli