என்.டி.எச்.அப்துல் கபூர் நம்பிக்கை நிதியம் தனியார் வெளிப்பாட்டு நிதியமாக செயற்படுகிறது
அறிக்கையொன்றின் ஊடாக சுட்டிக்காட்டு
(ஏ.ஆர்.ஏ.பரீல்)
என்.டி.எச்.அப்துல் கபூர் நம்பிக்கை நிதியம் ஒரு இஸ்லாமிய கருணைகொடை நம்பிக்கை நிதியமோ அல்லது சட்டத்தின் கீழான ஒரு கருணைகொடை நம்பிக்கை நிதியமோ அல்ல. எனவே குறிப்பிட்ட நம்பிக்கை நிதியம் முஸ்லிம் பள்ளிவாசல்கள் கருணைக்கொடை நம்பிக்கை நிதியமோ அல்லது 1956 ஆம் ஆண்டின் 51 ஆம் இலக்க வக்பு சட்ட ஏற்பாடுகளுக்கு உட்பட்டதல்ல. இது ஒரு தனியார் வெளிப்பாட்டு நம்பிக்கை நிறுவனமாகவே தொடர்ந்து இயங்கி வருகின்றது என அப்துல் கபூர் நம்பிக்கை நிதியம் வெளியிட்டுள்ள அறிக்கையொன்றில் குறிப்பிட்டுள்ளது.
மஹரகம கபூரியா அரபுக்கல்லூரி மற்றும் வக்பு சொத்தாக கூறப்படும் கிரேண்ட்பாஸில் சுலைமான் வைத்தியசாலை அமைந்திருந்த காணிக்கு ஆபத்து ஏற்பட்டுள்ள நிலையில் சமூகத்தின் மத்தியில் எதிர்ப்பு வெளியிடப்பட்டுள்ளதையடுத்தே அப்துல் கபூர் நம்பிக்கை நிதியம் மேற்குறிப்பிட்ட அறிக்கையை வெளியிட்டுள்ளது. அறிக்கையில் மேலும் தெரிவிக்கப்பட்டுள்ளதாவது;
மர்ஹும் அப்துல் கபூரினால் 1935.11.22 ஆம் திகதி 2125 ஆம் இலக்க நம்பிக்கை பத்திரத்தின் கீழ் உருவாக்கப்பட்டதே அப்துல் கபூர் நம்பிக்கை நிதியம். அமைப்பின் நிறுவுனர் அப்துல் கபூர் 2125 ஆம் இலக்க நம்பிக்கை நிதியப் பத்திரத்தின் 6 ஆவது சரத்தில் நம்பிக்கை நிதியம் ஆங்கில சட்டத்தின் கீழ் நிர்வகிக்கப்படவேண்டும் என்றே கூறியுள்ளார். எனவே இச்சொத்துகள் வக்பு சட்டத்தின் கீழ் உள்ளடங்காது.
அத்தோடு இந்த நம்பிக்கை அமைப்பு தற்போது பதிவாளர் நாயகம் திணைக்களத்தின் தனியார் பொது வெளிப்பாட்டுப்பிரிவின் கீழ் 011 ஆம் இலக்கத்தை உடைய ஒரு நம்பிக்கை அமைப்பாக பதிவு செய்யப்பட்டுள்ளதே அல்லாது கருணைக்கொடை அமைப்பாக பதியப்படவில்லை என்பதுடன் அது ஒரு தனியார் வெளிப்பாட்டு நம்பிக்கை அமைப்பாக உள்நாட்டு இறைவரி திணைக்களத்துக்கு வரிகளையும் செலுத்துகிறது.
இது வக்பு சட்டத்தின் கீழ் பதிவு செய்யப்பட்டில்லை. அதன் கூறப்பட்ட நோக்கங்கள் நம்பிக்கைப் பத்திரத்தின் விடயங்களுக்கு ஏற்ப அமைந்தவை என்பதுடன் அதில் முஸ்லிம் கருணை நம்பிக்கை நிதியம் அல்லது வக்பு விடயங்கள் உள்ளடக்கப்பட்டிருக்கவில்லை.
கொழும்பு மாவட்ட நீதிமன்றம் நம்பிக்கைப் பத்திரத்தை ஆராய்ந்து DTR/08/2020 இலக்க வழக்கில் ஒரு கட்டளையைப் பிறப்பித்துள்ளது. இது நம்பிக்கை அமைப்புக்கு சொந்தமான விடய ஆதனத்தை அதில் கூறப்பட்ட நோக்கங்களை நம்பிக்கை அமைப்பின் எண்ணத்துக்கு ஏற்ப அடைவதற்கு குத்தகைக்கு, விடுவதற்கு செல்லுபடியானதும் கட்டுப்பட்டதும் அனுமதிப்பதுமாகும். அப்துல் கபூர் நம்பிக்கை அமைப்பால் நிறைவேற்றப்படும் ஒவ்வொரு குத்தகையும் நம்பிக்கை பத்திரம் மற்றும் பயன்படுத்தக்கூடிய சட்டத்துடன் கட்டாயமாக இணங்கக்கூடியதாக மேற்கொள்ளப்படுகிறது.
அப்துல் கபூர் நம்பிக்கை நிதியம் நிறுவனரால் அவருக்காகவும் மற்றும் அவரது தற்போதுள்ள நம்பிக்கையாளர்களால் நியமிக்கப்படும் அடுத்த நம்பிக்கையாளர்களுக்காகவும் மட்டுமே உருவாக்கப்பட்டுள்ளதுடன் நம்பிக்கை பத்திரத்தில் கூறப்பட்ட நோக்கங்கள் மற்றும் விடயங்களை செயற்படுத்துவதற்கு கொடுக்கப்பட்டுள்ள நம்பிக்கை அதிகாரங்களுடன் உரிமையாளரின் ஆதனங்களை மாற்றுவதற்கு அவர்களின் விருப்பத்துக்கு ஏற்ப விடயங்கள் மேற்கொள்ளப்படுகிறது.
அப்துல் கபூர் நம்பிக்கை அமைப்பின் நம்பிக்கையாளர்கள் அவர்களின் அனைத்து முயற்சிகளிலும் எதிர்கால செயற்பாடுகளிலும் மர்ஹும் அப்துல் கபூரின் நோக்கங்களுக்கு ஏற்ப நம்பிக்கை அமைப்பின் விதிமுறைகளின் கீழ் அவர்களின் கடப்பாடுகளை நிறைவேற்றுவதில் எப்பொழுதும் அர்ப்பணிப்புடன் உள்ளனர். தற்போது அவர்கள் அரபுமொழி பாடசாலைகள் மற்றும் மேம்படுத்தல் நடவடிக்கைகளில் ஈடுபட்டுள்ளனர்.
எம்மால் மேற்கொள்ளப்படும் நல்ல செயற்பாடுகளை தடுக்கும் வகையில் இகழ்ச்சியான போலியான குற்றச்சாட்டுக்களை முன்வைக்க வேண்டாமெனவும் மக்களிடையே குழப்பத்தை ஏற்படுத்த முயற்சிக்க வேண்டாமெனவும் சம்பந்தப்பட்டவர்களை வேண்டுகிறோம் எனத் தெரிவிக்கப்பட்டுள்ளது. – Vidivelli