துருக்கியின் மர்சாண்டிஸ் ரயில் நிலையத்தை அண்மித்த பகுதியில் இடம்பெற்ற பாரிய ரயில் விபத்தில் உயிரிழந்தவர்களின் எண்ணிக்கை 9 ஆக உயர்ந்துள்ளது.
இதன்போது 47 பேர் காயமடைந்ததாக அதிகாரிகள் தெரிவித்துள்ளனர். தலைநகர் அங்காராவிலிருந்து மத்திய துருக்கியின் கொன்யா பகுதியை நோக்கிப் பயணித்த அதிவேக ரயில் ஒன்றே இந்த விபத்துக்கு முகம்கொடுத்துள்ளது.
குறித்த ரயில் நேற்று காலை மர்சாண்டிஸ் ரயில் நிலையத்தை கடந்து சென்றபோது, திடீரெனப் பயணிகள் மேம்பாலத்தின் மீது மோதியது.
இதனையடுத்து, இரும்பினால் அமைக்கப்பட்ட குறித்த மேம்பாலம் உடைந்து நொறுங்கியது. பாலத்தின் அடிப்பகுதியில் ரயில் பெட்டிகள் சிக்கி உருக்குலைந்தன. அத்துடன் 2 பெட்டிகள் தடம்புரண்டன.
விபத்து குறித்து தகவலறிந்த மீட்புக் குழுவினர் அங்கு சென்று மீட்புப் பணியில் ஈடுபட்டனர். ரயில் பெட்டிகளின் இடிபாடுகளுக்குள் சிக்கியிருந்தவர்கள் வெளியேற்றப்பட்டு சிகிச்சைக்காக அனுப்பி வைக்கப்பட்டனர்.
இந்த அனர்த்தத்தில் பேர் உயிரிழந்ததாகவும், 47 பேர் வரை படுகாயம் அடைந்துள்ளதாகவும் செய்திகள் தெரிவிக்கின்றன. காயமடைந்தவர்களில் 3 பேரின் நிலைமை கவலைக்கிடமாக உள்ளதால், உயிரிழப்பு எண்ணிக்கை அதிகரிக்கும் என்று அஞ்சப்படுகிறது.
மர்சாண்டிஸ் ரயில் நிலையத்தை கடந்தபோது தண்டவாள பரிசோதனையில் ஈடுபட்டிருந்த உள்ளூர் ரயில் இயந்திரம் மீது அதிவேக ரயில் மோதியதையடுத்து, தடம்புரண்டு பயணிகள் பாலத்தின் மீது மோதியதாக விசாரணைகளில் இருந்து தெரியவந்துள்ளது.
அத்துடன், விபத்து ஏற்படுவதற்கான முக்கிய காரணம் தொடர்பாக தீவிரமாக விசாரணை நடத்தப்பட்டு வருவதாக அதிகாரிகள் தெரிவித்துள்ளனர்.
-Vidivelli