பயங்கரவாத தடைச் சட்டத்தை தமது தேவைகளுக்கு ஏற்ப ஆட்சியிலிருந்த அரசாங்கங்கள் பயன்படுத்தி வந்திருப்பதே வரலாறு. அதே வரலாறையே ரணில் விக்ரமசிங்க தலைமையிலான தற்போதைய அரசாங்கமும் பின்பற்றத் தொடங்கியுள்ளதில் ஆச்சரியப்படுவதற்கில்லை.
யுத்த காலப் பகுதியில் தமிழ் மக்களுக்கு எதிராகவும் உயிர்த்த ஞாயிறு தாக்குதலைத் தொடர்ந்து முஸ்லிம் மக்களுக்கு எதிராகவும் பிரயோகிக்கப்பட்ட இந்த கொடூர சட்டம் இன்று, நாட்டைக் குட்டிச்சுவராக்கிய அரசியல்வாதிகளுக்கு எதிராகப் போராடிய பெரும்பான்மை சமூக இளைஞர்களுக்கு எதிராக திரும்பியுள்ளது.
கடந்த சில நாட்களுக்கு முன்னர் கைது செய்யப்பட்ட அனைத்து பல்கலைக்கழக மாணவர் ஒன்றியத்தின் ஏற்பாட்டாளர் வசந்த முதலிகே, கல்வெவ சிறிதம்ம தேரர் மற்றும் ஹாஷாந்த ஜீவந்த குணத்திலக்க ஆகிய மூவரையும் பயங்கரவாத தடை சட்டத்தின் கீழ் 90 நாட்கள் தடுப்புக் காவலில் வைத்து விசாரிக்க அனுமதி வழங்கப்பட்டுள்ளது. இதற்கான உத்தரவில் ஜனாதிபதி ரணில் விக்ரமசிங்க கையெழுத்திட்டுள்ளார். இந் நிலையில் இவர்கள் போராட்டம் மூலமாக அரசுக்கு எதிராக சதி நடவடிக்கைகளில் ஈடுபட்டார்களா என்ற கோணத்தில் விசாரணைகள் முன்னெடுக்கப்படுகின்றன.
அரசாங்கத்தின் இந்த நடவடிக்கையானது உள்நாட்டு மற்றும் சர்வதேச மனித உரிமைகள் அமைப்புகள் மத்தியில் கடும் விசனத்தைத் தோற்றுவித்துள்ளது.
ஆர்ப்பாட்டக்காரர்களை பயங்கரவாத தடைச் சட்டத்தின் கீழ் தடுத்து வைப்பதை எந்தவிதத்திலும் நியாயப்படுத்த முடியாது என சர்வதேச மன்னிப்புச் சபையின் தெற்காசியாவுக்கான பணிப்பாளர் யாமினி மிஷ்ரா குறிப்பிட்டுள்ளார்.
போராட்டக்காரர்களை ஒடுக்குவதற்கு கொடூரமான பயங்கரவாத தடைச் சட்டத்தைப் பயன்படுத்துவது இலங்கை அரசாங்கத்தின் புதிய உத்தி எனச் சுட்டிக்காட்டியுள்ள அவர், ஏற்கனவே கடுமையான விமர்சனத்திற்குள்ளாகியுள்ள இச் சட்டத்தை போராட்டக்காரர்களை அடக்கி ஒடுக்குவதற்கான ஆயுதமாக பயன்படுத்துவது கண்டிக்கத்தக்கது என்றும் குறிப்பிட்டுள்ளார்.
இதனிடையே, பயங்கரவாதத் தடைச்சட்டமானது பயங்கரவாத செயற்பாடுகளுடன் தொடர்புடைய சந்தர்ப்பத்தில் பிரயோகிக்க உருவாக்கப்பட்டதேயன்றி, ஆர்ப்பாட்டங்கள் உள்ளிட்டவற்றின் மூலம் அரசாங்கத்திற்கு எதிராகக் கருத்து வெளிப்பாட்டுச் சுதந்திரத்தைப் பிரயோகிக்கும்போது நிகழக்கூடிய குற்றங்கள் தொடர்பில் பயன்படுத்துவதற்காக உருவாக்கப்பட்டதல்ல என இலங்கை சட்டத்தரணிகள் சங்கம் சுட்டிக்காட்டியுள்ளது. மேலும் இச்சட்டத்தின் பிரயோகம் ஐரோப்பிய ஒன்றியத்திடமிருந்து இலங்கைக்கு ஜி.எஸ்.பி பிளஸ் வரிச்சலுகையைப் பெற்றுக்கொள்வதில் தாக்கத்தை ஏற்படுத்தும் என்றும் சட்டத்தரணிகள் சங்கம் சுட்டிக்காட்டியுள்ளது.
இலங்கை மனித உரிமைகள் ஆணைக்குழுவும் இந்த விடயத்தில் தனது கவனத்தைச் செலுத்தியுள்ளது. போராட்டக்காரர்களை பயங்கரவாதத் தடைச்சட்டத்தின் கீழ் தடுத்து வைப்பதற்கு பொலிசார் மேற்கொண்ட தீர்மானம் குறித்து தமக்கு தெளிவுபடுத்தப்பட வேண்டும் எனச் சுட்டிக்காட்டியுள்ள ஆணைக்குழு, போராட்டக்காரர்கள் பயங்கரவாதத்தடைச் சட்டத்தின்கீழ் தடுத்துவைப்பதற்கு ஏதுவான தீவிரவாத வன்முறை நடவடிக்கைகளில் ஈடுபட்டார்கள் என்பதற்குரிய நியாயமான ஆதாரங்கள் சமர்ப்பிக்கப்பட வேண்டும் என்றும் பொலிஸ் மா அதிபருக்கு அனுப்பி வைத்துள்ள கடிதத்தில் வலியுறுத்தியுள்ளது.
இவ்வாறுதான் கடந்த காலங்களில் ஆயிரக் கணக்கான தமிழ் இளைஞர்கள் இந்த சட்டத்தின் கீழ் அநியாயமாக தடுத்து வைக்கப்பட்டனர். எந்தவித குற்றமும் செய்யாது சுமார் 15 வருடங்களுக்குப் பின்னர் சிறையிலிருந்து வெளிவந்த பலர் இன்றும் நம்மத்தியில் வாழ்ந்து வருகின்றனர். மேலும் சுமார் 50 க்கும் மேற்பட்ட தமிழ் இளைஞர்கள் இன்றும் தடுப்புக் காவலில் உள்ளனர்.
அதேபோன்றுதான் உயிர்த்த ஞாயிறு தாக்குதலின் பின்னர் ஆயிரக் கணக்கான முஸ்லிம் இளைஞர்களும் குறிப்பிடத்தக்க பெண்கள் சிலரும் இதே சட்டத்தின் கீழ் கைது செய்யப்பட்டு தடுத்து வைக்கப்பட்டனர். இவர்களில் இன்று வரை சுமார் 300 பேர் தடுத்து வைக்கப்பட்டுள்ளனர். பலர் பல வருடங்களின் பின்னர் பிணையிலும் குற்றச்சாட்டுக்களின்றியும் விடுவிக்கப்பட்டுள்ளனர்.
மக்கள் விடுதலை முன்னணியின் கிளர்ச்சிக்குப் பிறகு, இக் கொடூர சட்டத்தினால் சிறுபான்மை சமூகங்களே பழிவாங்கப்பட்டு வந்த நிலையில் தற்போது மீண்டும் பெரும்பான்மை சமூகத்தினருக்கு எதிராக அதனைப் பயன்படுத்த ஆரம்பித்துள்ளனர். கடந்த காலங்களில் பல ஆசிரியர் தலையங்களில் இதுகுறித்து நாம் எச்சரித்திருந்தோம். அது இன்று நடந்தேறுவது கவலைக்குரியது.
தற்போது பயங்கரவாத தடைச் சட்டத்திற்கு பதிலாக ‘தேசிய பாதுகாப்புச் சட்டம்’ என்ற பெயரில் புதிய சட்டத்தைக் கொண்டுவரவுள்ளதாக தற்போது அரசாங்கம் கூறுகிறது. இது அனைவரையும் ஏமாற்றுவதற்கான உத்தியேயன்றி வேறில்லை எனலாம். செப்டெம்பரில் ஐக்கிய நாடுகள் மனித உரிமைகள் பேரவையின் 51 ஆவது கூட்டத்தொடர் ஆரம்பமாகவுள்ள நிலையில் சர்வதேச அழுத்தங்களை சமாளிக்கவே அரசாங்கம் இந்த புதிய கதைகளை அவிழ்த்துவிடுகிறது.
இச் சட்டத்திற்கு எதிராக பாரிய போராட்டங்கள் நடந்த போதிலும் எந்தவித மாற்றங்களும் நடக்கவில்லை. இச் சட்டத்தை முற்றாக நீக்குவது பற்றிச் சிந்திப்பதாக முன்னாள் நீதியமைச்சர் அலி சப்ரி கூறியிருந்தார். எனினும் திருத்தம் என்ற பெரியல் சில வார்த்தைகள் மாற்றப்பட்டனவே தவிர வேறெதுவும் ஆக்கபூர்வமாக நடக்கவில்லை.
எனவேதான் இன்று இந்நாட்டில் வாழ்கின்ற சகல மக்களுக்கும் அச்சுறுத்தலான ஒன்றாக மாறியுள்ள இந்தக் கொடிய சட்டத்தை முற்றாக ஒழிப்பதற்கான போராட்டத்தில் அனைவரும் ஒன்றுபட வேண்டும் என அழைப்பு விடுக்க விரும்புகிறோம்.– Vidivelli