கட்டார் நிதியத்தின் தடையினை ஜனாதிபதி இதுவரை நீக்காததேன்?
பாராளுமன்ற உறுப்பினர் முஜிபுர் ரஹ்மான் கேள்வி
(எம்.வை.எம்.சியாம்)
தடைசெய்யப்பட்ட அமைப்புகளில் பட்டியலிலிருந்து பல்வேறு அமைப்புகளின் தடை நீக்கப்பட்டுள்ள போதும் கட்டார் நிதியத்தின் மீதான தடையை ஜனாதிபதி இதுவரை நீக்காதது ஏன்? என கேள்வி எழுப்பியுள்ள கொழும்பு மாவட்ட ஐ.ம.ச. பாராளுமன்ற உறுப்பினர் முஜிபுர் ரஹ்மான், குறித்த தடையை நீக்குவதை இனவாதிகள் தடுக்கிறார்களா என்று சந்தேகம் எழுவதாக தெரிவித்துள்ளார்.
நேற்றுமுன்தினம் எதிர்க்கட்சித் தலைவர் அலுவலகத்தில் இடம்பெற்ற ஊடக சந்திப்பின்போது கலந்துகொண்டு உரையாற்றுகையிலேயே அவர் இவ்வாறு தெரிவித்துள்ளார். இதன்போது, அவர் மேலும் கருத்து தெரிவிக்கையில்,
கடந்த காலங்களில் முன்னாள் ஜனாதிபதி கோட்டாபய ராஜபக்ஷவினால் பல்வேறு குற்றச்சாட்டுகளை முன்வைத்து பல அமைப்புகள் மற்றும் தனிநபர்கள் மீது தடை விதிக்கப்பட்டிருந்தது. இதன் காரணமாக நாட்டிற்கு கிடைக்கப்பெற்ற உதவிகள் மற்றும் நன்கொடைகள் நிறுத்தப்பட்டன.
இந்நிலையில் அண்மையில் நாட்டில் தடை செய்யப்பட்ட அமைப்புகளின் பட்டியலில் உள்ளடக்கப்பட்டிருந்த குறிப்பிட்ட சில அமைப்புகள் மற்றும் தனிநபர் மீதான தடைகளை ஜனாதிபதி ரணில் விக்ரமசிங்க நீக்கியுள்ளார்.
இருப்பினும் முன்னர் தடைசெய்யப்பட்டிருந்த கட்டார் நிதியத்தின் தடை நீக்கப்படவில்லை. கட்டார் நிதியத்தின் தடையை ஜனாதிபதி ரணில் விக்ரமசிங்க இதுவரையில் நீக்காதது ஏன்?
ரணில் விக்ரமசிங்க ஜனாதிபதி பொறுப்பை ஏற்க முன்னர் கட்டார் நிதியத்தின் மீதான தடையை நீக்குவதாக அந்நாட்டு தூதுவரிடம் உறுதியளித்திருந்தார். எனினும், அவர் ஜனாதிபதியான பின்னும் இதுவரையான காலப்பகுதியில் கட்டார் நிதியத்தின் குறித்த தடையை நீக்கவில்லை. இதனை இனவாதிகள் தடுக்கிறார்களா? என்ற சந்தேகம் எழுகிறது.
எனினும் தடைசெய்யப்பட்டுள்ள பட்டியலில் எஞ்சியுள்ள அமைப்புகள் மற்றும் தனிநபர்கள் பயங்கரவாதத்துடன் தொடர்புடையவர்கள் என்பதற்கு எவ்வித ஆதாரங்களும் இல்லை. மேலும் பரிந்துரைக்கப்பட்ட நடைமுறைகளை பின்பற்றாது அவர்களின் பெயர்கள் அப்பட்டியலில் உள்வாங்கப்பட்டுள்ளன.
எனவே ஜனாதிபதி குறித்த தடை செய்யப்பட்ட பட்டியலில் பெயரிடப்பட வேண்டியவர்கள் தவிர்ந்த ஏனைய அமைப்புகள் மற்றும் தனிநபர்கள் நிறுவனங்கள் சுய மீள் மதிப்பீடு மற்றும் தடை நீக்கம் செய்யும் செயல்முறை தொடர்பில் அவதானம் செலுத்த வேண்டும் என்றும் அவர் மேலும் குறிப்பிட்டார்.-Vidivelli