(ஏ.எச்.ஏ. ஹுஸைன்)
மட்டக்களப்பு ஏறாவூரில் கடந்த மே மாதம் 9ஆம் திகதி இரவு இடம்பெற்ற வன்முறைச் சம்பவம் தொடர்பில் 9 பேர் தொடர்ந்து விளக்கமறியலில் வைக்கப்பட்டுள்ளனர்.
கடந்த 4 ஆம் திகதி 20 வயதுடைய இளைஞர் ஒருவர் கைது செய்யப்பட்டதுடன், இதுவரை 38 பேர் மாவட்ட குற்ற விசாரணைப் பிரிவினரால் கைது செய்யப்பட்டு, 28 பேர் பிணையில் விடுவிக்கப்பட்டுள்ளனர்.
சுற்றாடல்துறை அமைச்சர் நஸீர் அஹமட்டின் காரியாலயம், அவரது உறவினரின் வீடு மற்றும் ஹோட்டல்களுக்கு தீயிட்டுக் கொளுத்தியமை அத்துடன் 3 ஆடைத்தொழிற்சாலைகளை சேதப்படுத்தியமை தொடர்பாக மாவட்ட குற்ற விசாரணைப் பிரிவினரால் கைது செய்யப்பட்டுள்ளனர்.
இடம்பெற்ற வன்முறைச் சம்பவங்கள் தொடர்பாக மாவட்ட சிரேஷ்ட பொலிஸ் அத்தியட்சகர் சுகத் மாரசிங்ஹாவின் ஆலோசனைக்கமைய, மாவட்ட குற்ற விசாரணைப்பிரிவு பொறுப்பதிகாரி பி.எஸ்.பி. பண்டார தலைமையிலான பொலிஸ் குழுவினர் தொடர்ந்து விசாரணையை மேற்கொண்டுவந்த நிலையில், திங்களன்று 04.07.2022 ஒருவர் கைது செய்யப்பட்டார். இதனைதையடுத்து, 16 வயதுடைய 2 சிறுவர்கள் உட்பட இதுவரை கைதுசெய்யப்பட்ட 38 பேர் ஏறாவூர் சுற்றுலா நீதிமன்ற நீதவான் முன்னிலையில் ஆஜர்படுத்தப்பட்டனர்.
இவர்களில் விளக்கமறியலில் வைக்கப்பட்டிருந்த 16 வயதுடைய இரு சிறுவர்கள் உட்பட 28 பேர் நீதிமன்ற பிணையில் விடுவிக்கப்பட்டதுடன், ஏனைய 9 பேர் தொடர்ந்து விளக்கமறியலில் வைக்கப்பட்டுள்ளதாகவும் தொடர் விசாரணையில் மேலும் சிலர் கைது செய்யப்பட்டு நீதிமன்றில் ஆஜர்படுத்தப்பட்டு வருவதாகவும் மாவட்ட குற்ற விசாரணைப்பிரிவு பொறுப்பதிகாரி பண்டார தெரிவித்தார்.- Vidivelli