(ஏ.ஆர்.ஏ.பரீல்)
“பள்ளிவாசல்களிலுள்ள ஸியாரங்கள் மூடி வைக்கப்படவோ, பூட்டி வைக்கப்படவோ கூடாது. அவ்வாறு ஸியாரங்கள் மூடி வைக்கப்படுவதும், பூட்டி வைக்கப்படுவதும் தனி நபர்களின் அடிப்படை உரிமை மீறலாகும். ஸியாரங்கள் பொது மக்களுக்காக திறந்து வைக்கப்படவேண்டும். இது தொடர்பில் கவனம் செலுத்துவேன் என புத்தசாசன, சமய மற்றும் கலாசார அமைச்சர் விதுர விக்ரமநாயக்க தெரிவித்தார்.
புத்த சாசன சமய மற்றும் கலாசார அமைச்சராக நியமனம் பெற்றுள்ள விதுர விக்ரமநாயக்கவை கெளரவிக்கும் நிகழ்வு கடந்த ஞாயிற்றுக்கிழமை கொழும்பு தெவட்டகஹ பள்ளிவாசலில் இடம்பெற்றது. இந்நிகழ்வினை தெவட்டகஹ பள்ளிவாசல் நிர்வாகம் ஏற்பாடு செய்திருந்தது.
இந்நிகழ்வில் அமைச்சர் பொன்னாடை போர்த்தப்பட்டு நினைவுச் சின்னம் வழங்கப்பட்டு கெளரவிக்கப்பட்டார்.
இந்நிகழ்வினையடுத்து தெவட்டகஹ பள்ளிவாசல் நிர்வாகிகள் அமைச்சருடன் கலந்துரையாடினார்கள். கலந்துரையாடலின் போது பள்ளிவாசல்களிலுள்ள சூபிக்களின் ஸியாரங்கள் அடிப்படைவாத பள்ளிவாசல் நிர்வாகிகளால் மூடி வைக்கப்பட்டிருப்பதாகவும், பூட்டப்பட்டிருப்பதாகவும் தெவட்டகஹ பள்ளிவாசல் தலைவர் ரியாஸ் சாலி அமைச்சிடம் முறையிட்டார். கொள்ளுப்பிட்டி பள்ளிவாசலில் இவ்வாறு 2 ஸியாரங்கள் பூட்டி வைக்கப்பட்டிருப்பதாகவும், மக்களால் குறித்த சியாரங்களை நெருங்க முடியாதுள்ளதாகவும் அமைச்சரிடம் சுட்டிக்காட்டினார். இவ்வாறு நாட்டின் சில பகுதிகளிலுள்ள பள்ளிவாசல்களின் ஸியாரங்கள் மூடப்பட்டுள்ளதாகவும் கூறினார். அத்தோடு சில சக்திகளால் சூபி பள்ளிவாசல்கள் கைப்பற்றப்பட்டுள்ளதாகவும் தெரிவித்தார்.
இதனால் முஸ்லிம்கள் மத்தியில் முரண்பாடுகள் உருவாகி வருவதாகவும் தெரிவித்தார்.
இதனையடுத்தே அமைச்சர் விதுர விக்கிரமநாயக்க ஸியாரங்கள் மூடப்படுவதும் பூட்டிவைக்கப்படுவதும் மக்களின் அடிப்படை உரிமைகளை மீறுவதாகும். இது தொடர்பில் தான் கவனம் செலுத்துவதாகவும் கூறினார். அத்தோடு இவ்விவகாரம் தொடர்பில் வக்புசபை மற்றும் திணைக்களத்துக்கு எதிராக தனக்கு முறைப்பாடுகள் கிடைத்துள்ளதாகவும் கூறினார்
அமைச்சர் விதுர விக்கிரம நாயக்க பள்ளிவாசலின் அதிதிகள் புத்தகத்திலும் கையொப்பமிட்டார்.- Vidivelli