மூடப்பட்டுள்ள 12 பள்ளிகளையும் மீள திறப்பது குறித்து பாதுகாப்பு அமைச்சுடன் திணைக்களம் பேச்சு
அரபுக் கல்லூரிகள், மத்ரஸாக்களை ஒழுங்குமுறையின் கீழ் கொண்டுவருவதற்கும் நடவடிக்கைகள் முன்னெடுப்பு
(ஏ.ஆர்.ஏ.பரீல்)
2019ஆம் ஆண்டு ஏப்ரல் 21 ஆம் திகதி நாட்டில் மேற்கொள்ளப்பட்ட உயிர்த்த ஞாயிறு தாக்குதலின் பின்பு பள்ளிவாசல்கள் மீதும் அரபுக்கல்லூரிகள் மற்றும் மத்ரஸாக்கள் மீதும் சந்தேகங்கள் ஏற்பட்டு அதிகாரிகளின் பரிந்துரைக்கமைய 16 பள்ளிவாசல்கள் மூடப்பட்டன. இவற்றில் 4 பள்ளிவாசல்கள் மீளத் திறக்கப்பட்டு விட்டன. ஏனைய 12 பள்ளிவாசல்களையும் மீளத் திறப்பது தொடர்பில் முஸ்லிம் சமய பண்பாட்டலுவல்கள் திணைக்களம் கலாசார அமைச்சு மற்றும் பாதுகாப்பு அமைச்சுடன் பேச்சு வார்த்தைகளை நடத்தி வருகின்றது என முஸ்லிம் சமய பண்பாட்டலுவல்கள் திணைக்கள பணிப்பாளர் இப்றாஹிம் அன்ஸார் விடிவெள்ளிக்குத் தெரிவித்தார்.
அவர் தொடர்ந்தும் கருத்துத் தெரிவிக்கையில்; நாட்டில் 2544 பதிவு செய்யப்பட்ட பள்ளிவாசல்கள் இயங்கி வருகின்றன. இதே வேளை 1084 பள்ளிவாசல்கள் பதிவு செய்யப்பட்டாதுள்ளன. மூடப்பட்ட பள்ளிவாசல்கள் அடிப்படைவாதக்கொள்கையுடன் தொடர்புபட்டவை என்ற சந்தேகத்தினாலேயே அவ்வாறு நடவடிக்கை மேற்கொள்ளப்பட்டன.
இதேவேளை அரபுக்கல்லூரிகள் மற்றும் மத்ரஸாக்களின் எண்ணிக்கையை குறைப்பதற்கும் அரசாங்கத்தினால் பரிந்துரை செய்யப்பட்டுள்ளது. என்றாலும் திணைக்களம் அரபுக்கல்லூரிகளையும் மத்ரஸாக்களையும் ஒரு ஒழுங்கு முறையின் கீழ் கொண்டு வருவதற்கே தீர்மானித்துள்ளது. ஒவ்வோர் பிரதேசங்களிலும் இயங்கிவரும் குறைவான மாணவர் எண்ணிக்கையைக் கொண்டுள்ள அரபுக்கல்லூரிகள் சிறிய மற்றும் வளங்களைக் குறைவாகக் கொண்டுள்ள அரபுக்கல்லூரிகள் என்பன முதன்மையான அரபுக்கல்லூரிகளுடன் இணைக்கப்படுவது பற்றி ஆலோசிக்கப்பட்டுள்ளது.
அரபுக்கல்லூரிகள் மீது நடவடிக்கைகள் எடுக்கப்படவுள்ளது என்று சமூகம் பயப்படத்தேவையில்லை. அரபுக்கல்லூரிகள் ஒழுங்கு முறையில்லாமல் செயற்படுகின்றன. அவற்றின் பாடவிதானங்கள் ஒழுங்குடுத்தப்படும். பொதுவான பரீட்சை முறை நடைமுறைப்படுத்தப்படும் அரபுக்கல்லூரி ஆசிரியர்களின் கல்வித் தகைமை நிர்ணயிக்கப்படும்.
அரபுக்கல்லூரிகளில் இவ்வாறான திருத்தங்களை மேற்கொண்டு அவற்றை மறுசீரமைப்பதற்காக அரபுக்கல்லூரிகள், மத்ரஸாக்கள் மறுசீரமைப்புக்குழு என்று ஓர் குழு நியமிக்கப்பட்டுள்ளது. இக்குழுவில் துறைசார் கல்வியியலாளர்கள், நிபுணர்கள் நியமனம் பெற்றுள்ளார்கள். இக்குழு ஒன்று கூடி அரபுக்கல்லூரிகள், மத்ரஸாக்களின் மறுசீரமைப்பு மற்றும் திருத்தங்கள் தொடர்பில் ஆராய்ந்து வருகிறது. குழுவின் பணிகள் 80வீதம் பூர்த்தியாகியுள்ளன. விரைவில் அறிக்கை சமர்ப்பிக்கப்படவுள்ளது.குழுவின் சிபாரிசுகளுக்கமைய அரபுக்கல்லூரிகள் மறுசீரமைக்கப்படும், பாடவிதானங்கள், பரீட்சைகள், ஆசிரியர்களின் கல்வித்தகைமைகள் ஒரு ஒழுங்கு முறையின் கீழ் கொண்டுவரப்படும் என்றார்.
அரபுக்கல்லூரிகளின் மறுசீரமைப்பு தொடர்பில் சமூகம் அச்சம் கொள்ளத் தேவையில்லை. அரபுக்கல்லூரிகளின் கட்டமைப்பு மேம்படுத்தப்படும் என்றும் அவர் கூறினார்.- Vidivelli