கடந்த பல மாதங்களாக தொடரும் எரிபொருள் பற்றாக்குறை கடந்த சில நாட்களாக தீவிரமடைந்துள்ளது. வாகனங்கள் எரிபொருளுக்காக நிற்கும் வரிசையின் நீளம் முன்னரை விட நீண்டு செல்கிறது. எரிவாயுவுக்கும் இதே நிலைதான்.
எரிபொருள் பற்றாக்குறை காரணமாக பொதுப் போக்குவரத்து வெகுவாகப் பாதிக்கப்பட்டுள்ளது. இதனால் மக்கள் நேற்றைய தினம் ரயில் வண்டிகளின் கூரைமீதிருந்து பயணிக்கும் புகைப்படங்களை சமூக ஊடகங்களில் காண முடிந்தது.
தினமும் இரண்டு மணித்தியாலத்திற்கும் அதிகமான மின்வெட்டு தொடர்கிறது. மின்சார சபை திட்டமிட்டு செயற்படாவிட்டால் அடுத்த மூன்று வருடங்களுக்கு இதே மின்வெட்டு தொடரும் என மின்சார சபை தொழிற்சங்கம் எச்சரித்துள்ளது.
பண வீக்கம் காரணமாக பொருட்களின் விலைகள் பல மடங்கு அதிகரித்துள்ளன. இதனால் சகல தரத்திலுள்ள மக்களும் வெகுவாகப் பாதிக்கப்பட்டுள்ளார்கள். மக்கள் செய்வதறியாது தவிக்கிறார்கள். எரிபொருள் மற்றும் எரிவாயுவுக்காக காத்து நிற்கும் மக்கள் மீண்டும் ஆர்ப்பாட்டங்களில் ஈடுபடத் தொடங்கியுள்ளார்கள். சமூக வலைத்தளங்களில் மக்கள் தமது உணர்ச்சிகளைக் கொட்டிக் கொண்டிருக்கிறார்கள்.
அனர்த்தம் ஒன்று வருகின்றபோது, பாதிக்கப்பட்ட சாராருக்கு பாதிக்கப்படாத சாரார் முன்வந்து உதவிகளை வழங்குவார்கள். ஆனால் நாடு இன்று எதிர்நோக்கியுள்ள பொருளாதார நெருக்கடி அனைத்து மக்களையுமே பாகுபாடின்றிப் பாதித்துள்ளது. இதில் யார் யாருக்கு உதவுவது என்ற கேள்விக்கே இடமில்லாதுள்ளது.
இன்றைய நாட்களில் பண வசதி படைத்தவர்கள் முதல் ஏழைகள் வரை அனைவருமே பொருளாதார ரீதியாகப் பாதிக்கப்பட்டுள்ளார்கள். எரிபொருளின்மை, தொடர் மின்சாரத் தடை காரணமாக பாரிய வர்த்தகங்கள் கூட நெருக்கடியைச் சந்தித்துள்ளன. பலர் தமது தொழில் நடவடிக்கைகளை கைவிட வேண்டிய நிலைக்குத் தள்ளப்பட்டுள்ளார்கள். எரிபொருள் தட்டுப்பாடு காரணமாக வாகனங்கள் மூலம் தொழில்புரியும் சாரதிகள் உள்ளிட்ட பல்லாயிரக்கணக்கானோர் பாதிக்கப்பட்டுள்ளார்கள். எரிவாயு இன்மையால் பல ஹோட்டல்களும் மூடப்பட்டுள்ளன. இந்தப் பொருளாதார நெருக்கடி நிலை காரணமாக பல தொழில் நிறுவனங்கள் தமது ஊழியர்களின் எண்ணிக்கையை வெகுவாகக் குறைத்துள்ளன. பாரிய தொழிற்சாலைகள் கூட ஆயிரக்கணக்கான தமது தொழிலாளர்களை பணி இடைநிறுத்தம் செய்யத் தீர்மானித்துள்ளன. இதனால் பலர் தொழில்வாய்ப்புகளை இழக்க நேரிட்டுள்ளது.
அரசாங்க ஊழியர்களின் தொழிலுக்கு உத்தரவாதமில்லா நிலை தோன்றியுள்ளது. ஐந்து வருட விடுமுறை வழங்கி அரச ஊழியர்களை வெளிநாடுகளுக்கு அனுப்பும் வேலைத்திட்டத்திற்கு அமைச்சரவை அனுமதி வழங்கியுள்ளது. வெள்ளிக்கிழமைகளில் அத்தியாவசியமற்ற அரச ஊழியர்களுக்கு விடுமுறை வழங்கவும் தீர்மானிக்கப்பட்டுள்ளது. இதனால் அவர்களுக்கு சம்பள அதிகரிப்புகள் வழங்கப்படாது என்பது உறுதியாகிறது.
வாழ்க்கைச் செலவு உச்சத்தைத் தொட்டுள்ள இன்றைய நாட்களில் வருமானமின்றித் தவிக்கும் இந்தக் குடும்பங்களுக்கு உதவிக் கரம் நீட்டுவது அவசியமாகும். ஆங்காங்கே இவ்வாறான சிறிய சிறிய பணிகள் முன்னெடுக்கப்படுவதைக் காண முடிகிறது.
இருப்பினும் முஸ்லிம் சமூகம் பள்ளிவாசல்களை அடிப்படையாகக் கொண்டு நிர்வகிக்கப்படுவதால், ஒவ்வொரு பள்ளிவாசல்களும் தமது மஹல்லாவுக்குட்பட்ட தேவையுடைய குடும்பங்களை இனங்கண்டு எவ்வாறு உதவலாம் என்பது குறித்துத் திட்டமிட்டுச் செயற்பட வேண்டும்.
முஸ்லிம் சமூக நிறுவனங்களுக்கும் இதில் பொறுப்புள்ளது. தமது ஸகாத், ஸதகாக்கள் மூலம் உதவக் கூடியவர்களிடமிருந்து பணத்தைத் திரட்டி ஒருவேளை உணவுக்குக் கூட வழியின்றித் தவிக்கும் குடும்பங்களை இனங்கண்டு உதவிகளை வழங்க வேண்டும். துரதிஷ்டவசமாக இன்று சமூகத்தில் மக்களை மென் மேலும் நெருக்கடிக்குள் தள்ளுகின்ற செயற்பாடுகளே அதிகம் இடம்பெறுகின்றன. பொருட்களைப் பதுக்கி வைத்து வியாபாரம் செய்பவர்களின் எண்ணிக்கை அதிகரித்துள்ளது. அடிப்படை உணவான அரிசியைக் கூட பதுக்கி வைக்கின்றளவுக்கு சில வியாபாரிகள் மோசமாக நடந்து கொள்கின்றமை கவலைக்கும் கண்டனத்துக்குமுரியதாகும்.
இது மக்களிடமிருந்து கொள்ளையடிப்பதற்கான நேரமல்ல. மாறாக ஒருவருக்கொருவர் உதவி ஒத்தாசையாகவிருந்து இந்த நெருக்கடியிலிருந்து நாம் மீளத் தலைப்பட வேண்டும். நமது செயற்பாடுகள் ஒரு போதும் இறைவனின் புறத்திலிருந்து தண்டனையைக் கொண்டுவருபவையாக அன்றி அருளைக் கொண்டு வருபவையாக அமைய வேண்டும். இன்றைய இந்த நெருக்கடி நிலைமைக்கு ஊழல் நிறைந்த அரசியல்வாதிகளும் அதிகாரிகளும் மாத்திரம் காரணமல்ல. சந்தர்ப்பம் பார்த்து கொள்ளையடிக்கின்ற இவ்வாறான வியாபாரிகளும்தான் காரணம் என்பதை நாம் மறந்துவிடக் கூடாது.
எனவேதான் நெருக்கடியான இன்றைய நாட்களில் ஒருவரிடமிருந்து பொருளாதாரத்தை எப்படி அபகரிக்கலாம் என்பது பற்றிச் சிந்தியாது எவ்வாறு ஒருவருக்கொருவர் கொடுத்துதவலாம் என்பது பற்றிச் சிந்திப்போம். நமது பிரதேசங்களில் ஒருவர் கூட உண்ண வழியின்றி பட்டினியுடன் படுக்கைக்குச் செல்ல அனுமதிக்காதிருப்போம்.- Vidivelli