(பாறுக் ஷிஹான்)
11 வயதுடைய சிறுமியை துஷ்பிரயோகத்திற்குள்ளாக்கிய சம்பவத்துடன் தொடர்புடையோர் என சந்தேகிக்கப்படும் 16 வயதுடைய இருவர் தலைமறைவாகியிருந்த நிலையில் அக்கரைப்பற்று பொலிஸாரால் கைது செய்யப்பட்டுள்ளனர்.
அக்கரைப்பற்று பொலிஸ் பிரிவிற்குட்பட்ட அட்டாளைச்சேனை பகுதியில் உள்ள ரஹ்மானியாபாத் பகுதியில் கடந்த 2022.05.23 இரவு குறித்த சம்பவம் இடம்பெற்றுள்ளது.
11 வயதான சிறுமி தனது குடும்பத்துடன் கடற்கரைக்குச் சென்றுள்ளார். கடற்கரையில் விளையாடிக்கொண்டிருக்கும்போது இடைநடுவே தனது சகோதரியுடன் வீட்டுக்குச் செல்லவேண்டிய நிலை ஏற்பட்டுள்ளது. வீட்டிலிருந்து மீண்டும் தனியாக அச்சிறுமி கடற்கரையிலுள்ள ஏனைய குடும்ப உறுப்பினர்களுடன் இணைந்துகொள்வதற்காக வந்துகொண்டிருந்தபோது அவர் வழிமறிக்கப்பட்டு துஸ்பிரயோகத்திற்குட்பட்டுள்ளார்.
இரவு 10.30 மணியளவில்இடைமறித்த இருவர் அருகில் உள்ள வீடு ஒன்றுக்குள் தூக்கிச் சென்று துஸ்பிரயோகம் செய்துள்ளமை தெரியவருகிறது.
அத்தோடு, சம்பவத்தை யாரிடமும் கூறக் கூடாது என மிரட்டியுள்ளதுடன், சிறுமியை மதிலுக்கு மேலால் தூக்கி போட்டுள்ளதாகவும் பொலிஸ் விசாரணைகள் மூலம் தெரியவருகிறது.
விடயம் தொடர்பில், சிறுமியின் உறவினர்கள் அக்கரைப்பற்று பொலிஸ் நிலையத்தில் முறைப்பாடு செய்துள்ளனர்.
இந்நிலையில் நேற்றுமுன்தினம் அக்கரைப்பற்று பொலிஸார் மேற்கொண்ட விசேட தேடுதலில் குறித்த சிறுமியை துஸ்பிரயோகத்திற்கு உள்ளாக்கியதாக சந்தேகத்தின் அடிப்படையில் இருவர் கைது செய்யப்பட்டனர்.
இவ்வாறு கைது செய்யப்பட்டவர்கள் ஒலுவில் பகுதியை சேர்ந்த 16 வயதுடையவர்களாவர். இரு சந்தேக நபர்களையும் 14 நாட்கள் விளக்கமறியலில் வைக்குமாறு அக்கரைப்பற்று நீதிவான் நீதிமன்றம் உத்தரவிட்டது.- Vidivelli