இன வன்முறைகளால் பாதிக்கப்பட்ட முஸ்லிம்களுக்கு நஷ்டயீடு வழங்குக
கம்பஹா மாவட்ட புத்திஜீவிகள் ஒன்றியம் அறிக்கை
உயிர்த்த ஞாயிறு தாக்குதலின் பின்பு கூட அமைதியாக இருந்த நாட்டில் வன் செயலைத் தூண்டி முஸ்லிம்களின் உயிர், பொருள் சொத்துக்களுக்கு ஏற்படுத்திய சேதங்களுக்கு அரசாங்கம் நஷ்ட ஈடு வழங்க வேண்டும் என கம்பஹா மாவட்ட புத்தி ஜீவிகள் ஒன்றியம் அரசைக் கோருகின்றது.
உயிர்த்த ஞாயிறு தாக்குதலின் பின் சுமார் மூன்று வாரங்கள் நாடு அமைதியான சூழலிலேயே இருந்தது. அதன் பின்பு திட்டமிட்ட அடிப்படையில் முஸ்லிம் பிரதேசங்கள் தாக்கப்பட்டு அவர்களின் உயிர் உடமைகளுக்கு சேதம் விளைவிக்கப்பட்ட போதும் குற்றவாளிகள் தண்டனையின்மை நிலையை அனுபவிக்க, அவர்கள் பொலிஸாரினால் விடுவிக்கப்பட்டனர். இது அரசாங்கத்தின் சட்டத்தின் ஆட்சிக்கு முரணான செயல் என்பதனால் இதற்கான பொறுப்பை ஏற்று அரசாங்கம் பாதிக்கப்பட்ட முஸ்லிம்களுக்கு நட்ட ஈடு வழங்க வேண்டும்.
அண்மைய வரலாற்றில் முஸ்லிம்களுக்கு எதிரான வன்செயல்கள் திட்டமிடப்பட்ட அடிப்படையில் 2018 முதல் ஆரம்பிக்கப்பட்டதை உணர முடிகின்றது. அம்பாறையில் மலட்டுத் தன்மையை உருவாக்கும் வில்லைகளை ரொட்டியில் சுட்டு வழங்குவதாக பிரசாரம் செய்து ஏற்படுத்தப்பட்ட வன் செயல் காரணமாக அம்பாறை பள்ளிவாசல் கூட சேதப்படுத்தப்பட்டது. அதன் பின் தொடரப்பட்ட இவ் வன்செயலில் ஈடுபட்ட இனவாத கும்பல்களுக்கும் உயிர்த்த ஞாயிறு பயங்கரவாதிகளுக்கும் ஒரே பிரிவினரிடமிருந்து அடைக்கலம் வழங்கப்பட்டுள்ளது என்ற உண்மை தற்போது வெளிவந்துள்ளது.
இனவாதத்தை தூண்டி முஸ்லிம்களுக்கு எதிராக கட்டவிழ்த்து விடப்பட்ட வன் செயல் மற்றும் உயிர்த்த ஞாயிறு தாக்குதலில் உயிரிழந்தவர்களின் இரத்தத்தின் மூலம் இந்த அரசாங்கம் பதவிக்கு வந்ததன் விளைவாக இந்த நாட்டிற்கு தற்போது ஏற்பட்டுள்ள அரசியல் மற்றும் பொருளாதார நெருக்கடி தெய்வீக பழிவாங்கல் என பேராயர் கர்தினால் மல்கம் ரஞ்சித் கூறிய உண்மையை யாராலும் மறுக்க முடியாது.
நாடு எதிர்நோக்கும் இந்த நெருக்கடி நிலையில் அரசாங்கம் பதவி விலக வேண்டும் என மக்கள் தொடர்ச்சியான ஆர்ப்பாட்டங்களில் ஈடுபட்டு வருகின்றனர். இந் நிலையிலும் கூட கடந்த கால நிகழ்வுகளில் இருந்து படிப்பினை பெறுவதற்குப் பதிலாக மீண்டும் மக்களை இன மத ரீதியாக பிரிப்பதற்கு எடுக்கும் முயற்சிகளை நாம் வெகுவாகக் கண்டிக்கிறோம்.
இதே போன்று இஸ்லாத்தையும் முஸ்லிம்களையும் இழிவுபடுத்திய பௌத்த பிக்கு ஒருவரை முஸ்லிம்களின் சட்டங்கள் சம்பந்தமாக ஆராய்ந்து சிபாரிசு செய்ய நியமிக்கப்பட்ட ஜனாதிபதி செயலணிக் குழுவின் தலைவராக நியமித்ததை ஒரு போதும் ஏற்றுக் கொள்ள முடியாது. இது பல் இன மக்கள் வாழும் இலங்கையில் சிறுபான்மை முஸ்லிம்களை ஒரங்கட்ட எடுக்கும் அரசியல் முயற்சியானதால் இந்த ஜனாதிபதி செயலணி நடவடிக்கைகளை கம்பஹா மாவட்ட புத்தி ஜீவிகள் ஒன்றியம் கண்டிக்கின்றது.
நாட்டிற்காக அல்லாமல் தமது சந்தர்ப்பவாத இருப்பு மற்றும் வளர்ச்சிக்காக எவ்வாறான விலை கொடுத்தும் அதிகாரத்தைக் கைப்பற்றுவதற்காக தமது மீட்பர்கள் மூலம் பல்வேறு சமூகங்களுக்கிடையில் இனவாதத்தை தோற்றுவித்த அரசியல்வாதிகளை இந்நாட்டு மக்கள் தற்போது புரிந்துகொண்டுள்ளதை கம்பஹா மாவட்ட புத்திஜீவிகள் மன்றம் பாராட்டுகிறது என அந்த அறிக்கையில் மேலும் தெரிவிக்கப்பட்டுள்ளது.- Vidivelli