உயிர்த்த ஞாயிறு தாக்குதல் விவகாரம் முஸ்லிம்களுக்கு இழைக்கப்பட்ட அநீதிகளுக்கு பொறுப்பானவர்கள் தண்டிக்கப்பட வேண்டும்
பாதிக்கப்பட்டோருக்கு நீதி கிடைக்க வேண்டும் என்கிறது ஷூரா சபை
உயிர்த்த ஞாயிறு தாக்குதல்கள் தொடர்பாக பாராளுமன்றத் தெரிவுக்குழு மற்றும் ஜனாதிபதி விசாரணை ஆணைக்குழுவில் வெளிப்படுத்தப்பட்டுள்ள முஸ்லிம்களுக்கு இழைக்கப்பட்ட அநீதிகளுக்கு பொறுப்பானவர்கள் சட்டத்தின் முன் நிறுத்தப்பட்டு உரிய முறையில் தண்டிக்கப்பட வேண்டும் என தேசிய ஷூரா சபை தெரிவித்துள்ளது.
அத்துடன், ஈஸ்டர் தாக்குதலில் பாதிக்கப்பட்டவர்களுக்கு நீதி கிடைக்க வேண்டும் என்றும் கோரிக்கைவிடுத்துள்ளது.
ஈஸ்டர் ஞாயிறு தாக்குதலின் 3வது ஆண்டு நினைவு தினம் குறித்து தேசிய ஷூரா சபை வெளியிட்டுள்ள ஊடக அறிக்கையிலேயே இவ்வாறு தெரிவிக்கப்பட்டுள்ளது. அவ்வறிக்கையில் மேலும் தெரிவிக்கப்பட்டுள்ளதாவது,
ஈஸ்டர் தாக்குதல்கள் தொடர்பிலான பாராளுமன்ற தெரிவுக்குழு மற்றும் ஜனாதிபதி ஆணைக்குழுவின் அறிக்கைகள் மீதான நடவடிக்கை மற்றும் தடுப்புக்காவலில் உள்ள அப்பாவிகளது விடுதலையைத் துரிதப்படுத்த வேண்டும்.
தேசிய ஷூரா சபை ஏப்ரல் 21, 2019 ஞாயிற்றுக்கிழமை நடந்த கொடூரமான தாக்குதலின் மூன்றாம் ஆண்டு நினைவு தினத்தை நினைவுகூர்வதில் அனைத்து இலங்கையர்களுடன் இணைந்து கொள்கிறது. இந்தத் தாக்குதல்களால் பாதிக்கப்பட்ட அனைத்து சமூகத்தினரும், முக்கியமாக கிறிஸ்தவர்கள் மற்றும் சுற்றுலாப் பயணிகளின் குடும்பங்களுக்கு தனது அனுதாபத்தை அது தெரிவித்துக் கொள்கிறது.
தாக்குதல் தொடர்பில் தேசிய ஷூரா சபை சில கருத்துக்களைத் தெரிவிக்க விரும்புகிறது, முஸ்லிம் பெயர்களைக் கொண்ட சிலரால் நடத்தப்பட்ட ஈஸ்டர் ஞாயிறு தாக்குதலுக்கும் இஸ்லாத்திற்கும் எந்தத் தொடர்பும் இல்லை. ஈஸ்டர் தாக்குதல்கள் நமது நேசத்துக்குரிய நாட்டு மக்களின் ஒற்றுமை மற்றும் அமைதியான சகவாழ்வுக்கு எதிராக மேற்கொள்ளப்பட்ட தவறான ஆனால், தோல்வியுற்ற தாக்குதலாகும்.
தாக்குதல் நடந்தபோது இலங்கையிலும் சர்வதேச அளவிலும் உள்ள அனைத்து முஸ்லிம்களும் அதிர்ச்சியடைந்தனர். குண்டுதாரிகளின் இறந்த உடல்களைக் கூட முஸ்லிம்களின் அடக்கஸ்தலங்களில் அடக்கம் செய்ய அனுமதிக்கமாட்டோம் என்று அவர்கள் ஏகமனதுடன் கூறினர்.
மேற்படி தாக்குதல்களை நடாத்திய முஸ்லிம் பெயர் தாங்கிகள் அதிகாரத்தை அடைவதற்கு சிலரால் பகடைக் காய்களாகப் பயன்படுத்தப்பட்டுள்ளனர் என பேராயர் மல்கம் கர்தினால் ரஞ்ஜித் உட்பட பல இலங்கையர்களும் பலதடவை கூறியுள்ளனர். இத்தாகுதலுக்கு உள்ளூர் மற்றும் வெளிநாட்டு சக்திகள் சம்பந்தப்பட்டிருப்பதாகத் தோன்றுவதாகவும் சுதந்திரமான விசாரணை தேவை என்றும் பேராயர் குறிப்பிட்டிருக்கிறார்கள்.
பெரும்பான்மை இனத்தைச் சேர்ந்த சில தீவிரவாத அமைப்புகள் தான் உயிர்த்த ஞாயிறு தாக்குதல்காரர்களை கடும்போக்காளர்களாக மாற்ற வழிவகுத்ததாக உயிர்த்த ஞாயிறு தாக்குதல்கள் தொடர்பான பாராளுமன்றத் தெரிவுக்குழு மற்றும் ஜனாதிபதி விசாரணை ஆணைக்குழு ஆகிய இரண்டும் அடையாளப்படுத்தியிருந்தன. இரு அரசாங்கங்களும் அவர்களில் எவரையும் விசாரிக்காமல் பேராயர் கூறியது போல் முஸ்லிம்கள் மீது மட்டுமே வழக்குத் தொடரப்பட்டது.
சந்தேகத்தின் பேரில் கைது செய்யப்பட்டு கிட்டத்தட்ட மூன்று வருடங்களாக சிறையில் இருக்கும் அதிக எண்ணிக்கையிலான முஸ்லிம்களுக்கு விடுதலை வழங்கப்படாமல் அவர்களுடன் தொடர்பான விசாரணைகள் மிகவும் மெதுவான வேகத்தில் நடைபெறுகின்றன. அவர்களின் குடும்பங்கள் மனச்சோர்வு, விரக்தி மற்றும் நிதி நெருக்கடியில் இருப்பது மட்டுமல்லாமல், அந்த குடும்பங்களைச் சேர்ந்த இளைஞர்கள் தீவிரவாதிகளாக மாறும் அபாயமும் உள்ளது.
2010 ஆம் ஆண்டு முதல் இலங்கை முஸ்லிம்களும் அவர்களது மத, கலாசார விழுமியங்களும் மற்றும் வர்த்தக நிறுவனங்களும் நாட்டில் தொடர்ச்சியான வெறுப்பூட்டும் பேச்சுக்கள், நியாயமற்ற அவதூறுகள் மற்றும் தாக்குதல்களுக்கு உட்பட்டுள்ளன. இவை முஸ்லிம் இளைஞர்களை தீவிரவாதத்திற்குள் தள்ளியிருக்கின்றன. ஏராளமான பள்ளிவாயில்களும் தாக்குதலுக்கு உள்ளாகின. இதன் நிமித்தம் பெரும்பான்மை சமூகத்தைச் சேர்ந்த நூற்றுக்கும் மேற்பட்ட இளைஞர்கள் கைது செய்யப்பட்டனர், ஆனால், அவர்கள் அனைவரும் பிணையில் விடுவிக்கப்பட்டனர். அவர்கள் எவருக்கும் எதிராக பயங்கரவாதத் தடைச் சட்டத்தின் (PTA) கீழ் வழக்குத் தொடரப்படவில்லை. அதே நேரத்தில் பயங்கரவாத தடைச் சட்டம் முஸ்லிம்களுக்கு எதிராகப் பயன்படுத்தப்பட்டது. உலகெங்கிலும் உள்ள கோடிக்கணக்கானோர் வழிபடும் அல்லாஹ்விற்கு பெரும்பான்மை சமூகத்தின் தீவிரவாதிகள் கொடும்பாவி செய்து எரித்து இழிவுபடுத்தினர். புனித குர்ஆனின் பிரதிகள் தீவிரவாதிகளால் எரிக்கப்பட்டாலும் அந்த குற்றவாளிகளுக்கு எதிராக எந்த நடவடிக்கையும் எடுக்கப்படவில்லை. இந்த அநீதிகளால் முஸ்லிம்கள் மிகுந்த அதிர்ச்சியும், வருத்தமும், வேதனையும் அடைந்தனர்.
உயிர்த்த ஞாயிறு தாக்குதல்களில் கொல்லப்பட்ட மற்றும் காயமடைந்தவர்களுக்கு அவர்களின் இனம், மதம் என்பவற்றை பொருட்படுத்தாமல் நீதி வழங்கப்பட வேண்டும். அத்தோடு, உயிர்த்த ஞாயிறு தாக்குதல்கள் தொடர்பாக பாராளுமன்றத் தெரிவுக்குழு மற்றும் ஜனாதிபதி விசாரணை ஆணைக்குழுவில் வெளிப்படுத்தப்பட்டுள்ள முஸ்லிம்களுக்கு இழைக்கப்பட்ட அநீதிகளுக்கு பொறுப்பானவர்கள் சட்டத்தின் முன் நிறுத்தப்பட்டு உரிய முறையில் தண்டிக்கப்பட வேண்டியது அவசியமாகும். மேலும், தடுப்புக் காவலில் உள்ளவர்கள் மீதான விசாரணைகள் இனியும் தாமதிக்காமல் முடிக்கப்பட்டு, நிரபராதிகள் உடனடியாக விடுவிக்கப்பட வேண்டும். மேலும் நடவடிக்கை எடுக்கக்கூடிய ஆதாரங்கள் உள்ள சந்தேக நபர்களுக்கு எதிராக சட்ட நடவடிக்கை எடுக்கப்பட வேண்டும் என்றும் வலியுறுத்துகிறோம்.
இலங்கையிலுள்ள நீதியை உறுதிப்படுத்த முயலும் அனைத்து அதிகாரிகளுக்கும் தனது முழுமையான ஒத்துழைப்பை வழங்க தேசிய ஷூரா சபை என்றூம் தயாராகவுள்ளது என்றும் குறித்த அறிக்கையில் சுட்டிக்காட்டப்பட்டுள்ளது.– Vidivelli