எம்.எப்.எம்.பஸீர்
கொழும்பு மற்றும் நீர் கொழும்பு, மட்டக்களப்பு ஆகிய இடங்-களில் கடந்த 2019 ஏப்ரல் 21 ஆம் திகதி தம்மைத் தாமே இலங்கையின் ஐ.எஸ்.ஐ.எஸ். இனர் என அழைத்துக்கொண்ட தேசிய தெளஹீத் ஜமா அத் தலைவனாக செயற்பட்ட சஹ்ரான் ஹஷீம் தலைமையிலான கும்பலினால் 8 தொடர் குண்டுத் தாக்குதல்கள் நடாத்தப்பட்டன.
இந்த 8 தற்கொலை குண்டுத் தாக்குதல்களால், 30 வெளிநாட்டவர்கள் உட்பட 268 பேர் கொல்லப்பட்டதுடன், 27 வெளிநாட்டவர்கள் உட்பட 594 பேர் காயமடைந்தனர். இந்த கொடூர சம்பவத்துக்கு இன்றுடன் (21) மூன்று வருடங்கள் பூர்த்தியாகின்றன. எனினும் இந்த மூன்று வருடங்களில் மிலேச்சத்தனமான இத்தாக்குதல் தொடர்பில் எவரும் தண்டிக்கப்பட வில்லை அல்லது தாக்குதலின் பின்னணி தொடர்பில் சட்டபூர்வமான உரிய நடவடிக்கைகள் எடுக்கப்படவில்லை என்பதுதான் கவலையோடு சொல்ல வேண்டிய உண்மை.
சுருக்கமாக சொல்வதென்றால், இந்த தாக்குதலால் உயிரிழந்த, காயமடைந்த, பாதிக்கப்பட்டவர்களுக்கு நியாயம் என்பது கனவாகிப் போயுள்ளது. எனினும் அவர்கள் தொடர்ச்சியாக நியாயத்துக்காக போராடுகின்றனர்.
‘இலங்கையில், மிகவும் மோசமான முறையில் இடம்பெற்ற தாக்குதலை எம்மால் மறக்க முடியாது. இன்று ஆட்சியதிகாரத்தில் இருக்கும் அரசாங்கம் அன்று தேர்தலில் களமிறங்கும்போது, தாக்குதல் சம்பவத்தை முழுமையாக பயன்படுத்திக்கொண்டது. இந்த பேரழிவிற்கு பின்னால் பாரிய சதித்திட்டம் இருக்கலாம் என அப்போது புலப்பட்டது. சதித்திட்டம் தீட்டியவர்கள் யார் என்பது தொடர்பில் தற்போது தெளிவாகின்றது. அந்த சதித்திட்டக்காரர்களுக்கு ஆட்சியை கைப்பற்ற முடியும், ஆனால் ஆட்சியை பாதுகாத்துக்கொள்ள முடியாது. கடவுளின் சாபம் அவர்களுக்கு கிடைத்துள்ளது. ஆட்சியை கைப்பற்றினால் மாத்திரம் போதுமானதல்ல, அரசாங்கத்தை சரியாக நிர்வகித்து அதனை பயன்படுத்த அவர்களுக்கு தெரியாது. ஜனாதிபதி ஆணைக்குழுவினால் வழங்கப்பட்ட பரிந்துரைகளில் அநேகமானவற்றை நடைமுறைப்படுத்தாது, முஸ்லிம் மக்கள் மீது குற்றச்சாட்டை சுமத்தி , தாக்குதலின் பின்னால் இருந்த அனைத்து சக்திகளையும் மறைப்பதற்கு நடவடிக்கை எடுக்கப்பட்டுள்ளது’ என நீர்கொழும்பு – கிரீன்ஸ் வீதியில் இடம்பெற்ற எதிர்ப்பு ஆர்ப்பாட்டத்தில் கொழும்பு பேராயர் கர்தினால் மல்கம் ரஞ்சித் ஆண்டகை அண்மையில் தெரிவித்திருந்தார்.
இந்த கருத்துக்களில் அடங்கியுள்ள விடயங்கள், இன்று முழு இலங்கை மக்களும் நம்புகின்ற, சந்தேகிக்கின்ற ஒரு நியாயமான விடயமாகும். விசாரணையாளர்கள், சட்ட அமுலாக்க பிரிவினர் அரசியல் காரணங்களுக்காகவோ அல்லது வேறு காரணங்களுக்காகவோ இது குறித்து கண்டும் காணாமலும் செயற்பட்டிருந்தாலும் கூட, மக்கள் நீதிமன்றில் இந்த தாக்குதல்களின் பின்னணியில் மறைகரமாக அரசாங்கம் செயற்பட்டதாக தீர்ப்பெழுதப்பட்டதாகிவிட்டது.
அதனால் தான், இன்று பொருளாதார நெருக்கடிக்கு மத்தியில் நாடெங்கும் நடக்கும் ஆர்ப்பாட்டத்தில், அரசாங்கத்துக்கு எதிரான பதாதைகளில், தானாக ஒன்று சேர்ந்த மக்கள் உயிர்த்த ஞாயிறு தின தாக்குதல்கள் தொடர்பில் அரசாங்கத்தை நோக்கி, குறிப்பாக ஜனாதிபதி கோத்தாபய ராஜபக்ஷவை நோக்கி விரல் நீட்டும் பதாதைகளை ஏந்தியுள்ளனர்.
இவ்வாறான நிலையில், அண்மையில் (கடந்த 12 ஆம் திகதி ) செய்தியாளர்களிடம் பேசிய பாதுகாப்பு செயலர் கமல் குணரத்ன, ‘சிங்கள பெளத்தர் ஒருவரை நாட்டின் ஜனாதிபதியாக்க 8 முஸ்லிம்கள் தமது உயிரை துறப்பார்களா?’ என கேள்வி எழுப்பியதுடன் உயிர்த்த ஞாயிறு தாக்குதலுக்கான காரணம், அதற்காக தேவாலயங்கள், ஹோட்டல்கள் ஏன் தெரிவு செய்யப்பட்டன என்பதற்கு, பயங்கரவாதி சஹ்ரான் ஹஷீம் தாக்குதலுக்கு முன்னர் வெளியிட்ட ஒளிப்பதிவின் செம்மைப்படுத்தப்பட்ட இருவெட்டு ஒன்றினை முன் வைத்து பதிலளித்தார்.
தான் அரசியல் பேச விரும்பவில்லை என இதன்போது குறிப்பிட்ட பாதுகாப்பு செயலர், உயிர்த்த ஞாயிறு தாக்குதலின் பின்னணியில், தற்போதைய ஜனாதிபதியை ஆட்சிக்கு கொண்டு வருவதற்கான எந்த தேவையும் இருக்கவில்லை என குறிப்பிட்டதுடன், 2018 ஆம் ஆண்டில் இடம்பெற்ற உள்ளூராட்சி மன்ற தேர்தலின் முடிவுகளிலேயே, தற்போதைய அரசாங்கத்துக்கு பெரும் ஆதாரவு இருப்பது உணரப்பட்டதாக கூறினார்.
உண்மையில் அரசியல்வாதிகளுக்கு ( ஜனாதிபதி உட்பட) எதிராக மக்கள் நீதிமன்றம் முன்வைக்கும், உயிர்த்த ஞாயிறு தாக்குதலின் பின்னணியில் ஆட்சியைக் கைப்பற்றும் தேவை இருந்தது எனினும் காரணிக்கு, அரசியல்வாதிகளே மெளனமாக பதிலளிக்காமல் இருக்கையில், அரச அதிகாரியான பாதுகாப்பு செயலர் பதிலளிக்க முந்தியடிப்பது ஏன்? அவர் தனியாக வராமல், சுயாதீன விசாரணை தரப்பாக செயற்பட வேண்டிய பொலிஸ் திணைக்களத்துக்கு தலைமை தாங்கும் பொலிஸ் மா அதிபர் சந்தன விக்ரமரத்ன, குற்றவியல் விவகாரங்களுக்கு பொறுப்பான சிரேஷ்ட பிரதிப் பொலிஸ் மா அதிபர் அஜித் ரோஹன, பயங்கரவாத தடுப்பு மற்றும் விசாரணைப் பிரிவின் பணிப்பாளர் பிரசன்ன அல்விஸ் ஆகியோருடன் பொது மக்கள் பாதுகாப்பு அமைச்சின் செயலரையும் இணைத்துக் கொண்டிருந்தார்.
சுயாதீன விசாரணைகள் ஊடாக, தாக்குதலின் பின்னணியை, மறைகரத்தை கண்டுபிடிப்பதை விடுத்து, சிறு பிள்ளைத்தனமாக தாக்குதலின் பின்னணியில் அரசியல் தேவை இருக்கவில்லை என நிரூபிக்க இந்த அரச அதிகாரிகள் கூட்டம் முட்டி மோதிக்கொள்வது ஏன் என்பதை ஆராயும் போதே, தாக்குதலின் பின்னணியில் இருக்கும் சதி தொடர்பில் புதிதாக ஒன்றையும் கூற வேண்டியதில்லை.
இந்த மிலேச்சத்தனமான தாக்குதல் நடந்து 3 வருடங்கள் பூர்த்தியடையும் நிலையில், ஒருவர் கூட தாக்குதல்கள் தொடர்பில் தண்டிக்கப்படவில்லை. விசாரணையின் கோணம் கூட சரியாக நடக்கிறதா என்பது தொடர்பில் நாளுக்கு நாள் சந்தேகங்களே அதிகரிக்கின்றன.
உயிர்த்த ஞாயிறு தின தாக்குதல் தொடர்பில் மொத்தமாக 735 பேர்கைது செய்யப்பட்டனர். அவர்களில் 196 பேர் தற்போதும் விளக்கமறியலில் உள்ளனர்,493 பேர் பிணையில் விடுவிக்கப்பட்டுள்ளனர். 29 பேர் தொடர்ந்தும் சி.ஐ.டி.யினரின் பொறுப்பில் தடுப்புக்காவலில் வைக்கப்பட்டுள்ளனர். இவ்வாறான நிலையில் இதுவரை 81 பேருக்கு எதிராக மட்டுமே கம்பஹா, கொழும்பு, கண்டி, குருணாகல், புத்தளம் நுவரெலியா, மட்டக்களப்பு மற்றும் கேகாலை மேல் நீதிமன்றங்களில் 27 வழக்குகள் தொடரப்பட்டுள்ளன. அந்த 27 வழக்குகளிலும் முன் வைக்கப்பட்டுள்ள குற்றச்சாட்டுக்கள் 25753 ஆகும்.
இந்த மொத்தமான புள்ளி விபரத்தில், தற்போதைய அரசாங்கம் ஆட்சிக்கு வந்த பிறகு உயிர்த்த ஞாயிறு தின தாக்குதல்கள் தொடர்பில் என்ன செய்துள்ளது என்பதை பிரித்தும் பார்க்கலாம். அப்படி நோக்கும்போது ஆட்சியில் உள்ள அரசாங்கம் ஆட்சிக்கு வந்த பிறகு, அதாவது 2019.11.16 ஆம் திகதியின் பின்னர் கைது செய்யப்பட்ட சந்தேக நபர்களின் எண்ணிக்கை 170 ஆகும். அவர்களில் 45 பேர் விளக்கமறியலில் உள்ளனர். 13 பேரிடம் தடுப்புக் காவலில் விசாரணை நடக்கிறது. 30 பேர் பிணையில் விடுவிக்கப்பட்டுள்ளனர். 6 பேருக்கு எதிராக வழக்குத் தொடரப்பட்டுள்ளது. இதனைவிட, கைது செய்யப்பட்ட மொத்த சந்தேக நபர்களில், வெளிநாடுகளில் இருந்த பயங்கரவாத மற்றும் அடிப்படைவாத செயற்பாடுகளுடன் தொடர்புடைய 52 பேரும் அடங்குகின்றனர். இவர்கள் ஐக்கிய அரபு அமீரகம், கட்டார், சவூதி அரேபியா, பாகிஸ்தான் ஆகிய நாடுகளில் இருந்தே அழைத்து வரப்பட்டனர்.
அத்துடன் இதுவரை, இந்த தாக்குதலுடன் தொடர்புடையவர்களின்365 மில்லியன் ரூபா பெறுமதியான அசையும், அசையா சொத்துக்கள் அரசுடமையாக்கப்பட்டுள்ளன. அத்துடன் 165 மில்லியன் ரூபா பணமும் அரசுடமையாக்கப்பட்டுள்ளது. இதற்கு மேலதிகமாக, இந்த தாக்குதலுடன் தொடர்புபட்டதாக சந்தேகத்தில் 68 நபர்கள், தடைசெய்யப்பட்டவர்களின் பட்டியலில் இணைக்கப்பட்டுள்ளனர்.
இவையே விசாரணைகளின் சாராம்சம். எனினும் இந்த விசாரணைகளில் அமெரிக்காவின் எப்.பி.ஐ. நிறுவனம், இத்தாக்குதல் தொடர்பில் விசாரித்த ஜனாதிபதி விசாரணை ஆணைக்குழு உள்ளிட்ட பல தரப்புக்களால் பல சந்தர்ப்பங்களில் கோடிட்டு காட்டப்பட்ட, சஹ்ரானின் கும்பலுக்கும் உளவுப் பிரிவினருக்கும் இடையிலான தொடர்பு, முன்னாள் தேசிய உளவுச் சேவை பணிப்பாளர் நிலந்த ஜயவர்தன உள்ளிட்ட சிரேஷ்ட பொலிஸ் அதிகாரிகள் பலரின் அசமந்த போக்கு, முன்னாள் ஜனாதிபதி மைத்திரிபால சிறிசேனவின் வகிபாகம், உயிர்த்த ஞாயிறு தின தொடர் தற்கொலை குண்டுத் தாக்குதல்கள் தொடர்பான விசாரணைகளில் தொடர்ந்து மர்மமாக உள்ள, நீர்கொழும்பு – கட்டுவாப்பிட்டி தேவாலயத்தில் தாக்குதல் நடாத்திய மொஹம்மது ஹஸ்தூன் எனும் குண்டுதாரியின் மனைவியான புலஸ்தினி மகேந்ரன் எனும் சாராவுக்கு என்ன நடந்தது என்பது குறித்த விடயம், தற்கொலை தாக்குதலுக்கு முன்னர் காத்தான்குடி, வவுணதீவு பகுதிகளில் நடந்த பல குற்றச் செயல்கள் மற்றும் படுகொலைகள் தொடர்பிலான விசாரணைகளை குழப்பும் படியாக உளவுச் சேவை அதிகாரிகள் செயற்பட்டமை போன்ற விடயங்கள் இன்றளவும் எந்த விசாரணைகளும், முன்னேற்றங்களும் இன்றி கிடப்பில் இருப்பது நீதி, நியாயம் தொடர்பில் பாரிய சந்தேகங்களை தோற்றுவிக்கிறது. அத்துடன் அவ்வாறு அவ்விடயங்களில் உள்ள சந்தேகங்களை நிவர்த்தி செய்ய சரியான விசாரணைகள் இடம்பெறாமல் இருப்பது, உயிர்த்த ஞாயிறு தின தாக்குதல்களின் பின்னணியில் மறை கரம் ஒன்று இருப்பதையும், இந்த விடயத்தில் தற்போதைய ஜனாதிபதி, அரசாங்கம் தொடர்பில் மக்கள் எழுப்பும் சந்தேகத்தினையும் மேலும் பலப்படுத்துவதாகவே அமைந்துள்ளது.- Vidivelli