அமீர் ஹுசைன்
கடந்த 2022 மார்ச் 26 ஆம் திகதி சனிக்கிழமை மாவனல்லை பெமினிவத்தை என்ற கிராமத்தில் ஏற்பட்ட இடிமின்னல் தாக்கம் காரணமாக 25 பேரளவில் காயமடைந்து மாவனல்லை வைத்தியசாலையில் அனுமதிக்கப்பட்ட சம்பவம் அனைவரையும் அதிர்ச்சியில் ஆழ்த்தியுள்ளது.
அன்றைய தினம் மாலை 4.00 மணியளவில் பெமினிவத்தை மையவாடியில் ஜனாஸா நல்லடக்கம் ஒன்றில் ஈடுபட்டுக் கொண்டிருந்தவா;களையேஇவ்வாறு இடி மின்னல் தாக்கியுள்ளது.
சம்பவம் நடந்த அந்த மாலைப் பொழுதில் அந்த பகுதி எங்கும் வானம் கறுத்து கரு முகிழ்கள் சூழ்ந்திருந்தது. மழை வரும் என்பதற்கான அறிகுறிகளே அதிகமாக காணப்பட்டன. ஆனாலும் இடியுடன் கூடிய மழை வரலாம் என்று யாரும் எதிர்பார்க்கவில்லை. ஜனாசா நல்லடக்கம் நிறைவடையும் தறுவாயில் பெமினிவத்தை மஸ்ஜிதுல் ஹுதா ஜும்ஆ பள்ளிவாசலின் பிரதம கதீப் முஹம்மத் பௌசுல் அமீர் துஆ பிரார்த்தனை நடாத்திக் கொண்டிருந்தார். அப்போதுதான் திடீரென கண்களால் பார்க்க முடியாத அளவிற்கு அபரிமிதமான வெளிச்சத்தோடு ஒளிக் கீற்றுடன் தீப்பிழம்பு போன்ற ஒன்று அந்த பிரதேசத்தை அதிர வைக்கும் சப்தத்துடன் தாக்கியதை உணா;ந்ததாக அங்கிருந்தவா;கள் பலரும் தெரிவிக்கின்றனர்.
அப்பிரதேசத்தை ஊடறுத்துச் சென்ற இடி மின்னல் காரணமாக அயலில் இருந்த தென்னை மரம் மிக மோசமான முறையில் சேதமடைந்து இருந்ததை அவதானிக்க முடிந்தது. அந்த தீப்பிழம்பு போன்ற பிரகாசம் பலமான ஓசையுடன் மையவாடியை ஊடறுத்தபோது, அங்கு குழுமியிருந்த சுமார் 50 – 60 பேர் மையவாடி நிலத்தில் தூக்கி எறியப்பட்டது போன்று சிதறுண்டு வீழ்ந்துள்ளனர்.
இந்த சம்பவம் நிகழ்ந்ததை அறிந்ததும் உடனடியாக மையவாடிக்குச் சென்றிருந்தவர்களின் உறவினர்கள் ஸ்தலத்திற்கு ஓடோடிச் சென்று வாகனங்களை வரவழைத்து நிலத்தில் வீழ்ந்து கிடந்த காயப்பட்டவர்களை விரைந்து சென்று மாவனல்லை வைத்தியசாலையில் அனுமதித்தனர். காயமடைந்தவர்களை வைத்தியசாலைக்கு கொண்டு செல்வதில் அகில இலங்கை ஜனாஸா சங்கத்தின் கேகாலை மாவட்ட கிளை மற்றும் மாவனல்லை பொலிசார் உட்பட பலரும் ஒத்துழைத்தனர்.
சுமார் 25 பேரளவில் சிகிச்சைக்காக அனுமதிக்கப்பட்ட போதும் நான்கு பேரைத் தவிர ஏனையோருக்கு பாரியளவில் காயங்கள் ஏற்பட்டிருக்கவில்லை. தற்போது ஒருவர் மாத்திரமே சிகிச்சை பெற்று வருகின்றார். உயிராபத்து ஏற்படும் அளவிற்கு எவருக்கும் காயம் ஏற்பட்டிருக்கவில்லை என்பதை மாவனல்லை வைத்தியசாலை வைத்தியர்கள் உறுதிப்படுத்திய பின்னர் சிகிச்சையளித்து காயப்பட்டவர்களை வீடுகளுக்கு செல்ல அனுமதித்தனர்.
காயமடைந்த நிலையில் வைத்தியசாலையில் அனுமதிக்கப்பட்டவர்களில் சிலருக்கு ஒருவிதமான அதிர்ச்சியால் உடல் பலவீனமடைந்தது போன்று உணர்வதாக இந்த இடி மின்னல் தாக்கத்தினால் நேரடியாக பாதிக்கப்பட்டவர்கள் கூறினர். உடம்பில் மின்சாரம் பாய்ந்தது போன்றும் கை, கால்கள் மற்றும் புலன் உறுப்புக்கள் செயலிழந்து இருப்பது போன்ற உணர்வு இருப்பதாக காயப்பட்ட பாடசாலை மாணவர் ஒருவர் கூறினார். அந்த சந்தர்ப்பத்தில் தாம் அந்த இடத்திலே மரணித்துவிட்டதாகவே உணர்ந்ததாகவும் அவர் கூறினார். ஆனாலும் பாரிய பாதிப்புகளின்றி உயிர் பிழைத்தமையானது இறைவனின் மாபெரும் அருளே தவிர வேறு இல்லை என்றார்.
காயமடைந்து வைத்தியசாலையில் இருந்து வீடு திரும்பியுள்ள மாவனல்லை நகரத்தில் வர்த்தக நிலையம் ஒன்றை நடத்தும் ஒருவர் கூறுகையில், “அந்த சந்தர்ப்பத்தில் நான் தூக்கி எறியப்பட்டேன். நிலத்தில் விழுந்ததோடு என்ன நடந்தது என்று எனக்கு தெரியாது. நான் மரணித்து விட்டதாகவே உணர்ந்தேன். ஆனாலும் பின்னர் உயிர் பிழைத்ததென்பது இறைவன் எங்கள் மீது கொண்ட கருணை என்றே கருத வேண்டும்” என்றார்.
இந்த சம்பவம் தொடர்பாக மாவனல்லை பொலீஸ் நிலைய பொறுப்பதிகாரி லசந்த கலு ஆரச்சி தெரிவிக்கையில் “இந்த ஜனாஸா நல்லடக்கம் நடைபெற்றுக் கொண்டிருந்த சந்தர்ப்பத்தில் அங்கிருந்த ஒரு சிலர் அந்த ஜனாஸா நல்லடக்க நிகழ்வை கையடக்க தொலைபேசி ஊடாக வீடியோ பதிவு செய்து கொண்டிருந்ததாக சம்பவத்தால் காயமடைந்து ஆஸ்பத்திரியில் அனுமதிக்கப்பட்டிருந்த ஒருவர் தெரிவித்தார். அத்துடன் அந்த இடத்தில் கப்ரு தோண்டுவதற்காக கொண்டு சென்ற மண்வெட்டி மற்றும் அலவாங்கு போன்ற உபகரணங்கள் இருந்தமையும் மின்னல் தாக்கத்திற்கு காரணமாக இருக்கலாம்” என்று தொவித்தார்.
பெமினிவத்தை கிராமம் மாவனல்லையில் இருந்து ஹெம்மாதகம வீதி ஊடாக 4 கிலோ மீட்டர் தொலைவில் அமைந்திருக்கின்ற சிறிய ஊராகும்.
கடும் மழை பெய்கின்ற சந்தர்ப்பங்களில் நீர் நிலைகள், பரந்த வெளிகளில், மரங்களுக்கு அருகில் அல்லது பாதுகாப்பற்ற முறையில் இலத்திரனியல் உபகரணங்களை பயன்படுத்தும் போது இந்த இடி மின்னல் தாக்கம் ஏற்படுகின்றன. பிரமாண்டமான கட்டிடங்களையும் இடி மின்னல் தாக்குகின்றது. அதனால் மாடிகளைக் கொண்ட கட்டிட நிர்மாணங்களின் போது மின்னல் தாக்கத்தில் இருந்து பாதுகாப்பு பெறுவதற்கான ‘இடி தாங்கி’ கருவி பொருத்தப்படுவது அவசியம் என அரசாங்கம் கட்டுப்பாடும் விதித்திருக்கின்றது.
இடி, மின்னல் ஏற்படும்போது வெளியிடங்களில் நிற்பது பாதுகாப்பற்றதாகும். இடி, மின்னலுக்கான வாய்ப்புகள் உள்ள போது உடனடியாக கட்டிடங்களின் உட்புறம் சென்று விட வேண்டும். மின்னல் தோன்றியதைத் தொடர்ந்து இடி ஏற்படும். இதனை மனதில் கொண்டு நாம் செயற்பட வேண்டும்.
மழை நேரங்களில் ஏற்படும் இடி மின்னல் தாக்கத்தில் இருந்து பாதுகாப்பு பெறுவதற்காக வானிலை அவதான நிலையம் அடிக்கடி மக்களுக்கு அறிவுறுத்தல்களை வழங்குகிறது. அவற்றைப் பின்பற்றி நடப்பதும் இவ்வாறான அனர்த்தங்களிலிருந்து நம்மைப் பாதுகாக்க நிச்சயம் உதவும்.- Vidivelli