விடிவெள்ளிக்கு இரண்டு விருதுகள்!
இலங்கை பத்திரிகை ஸ்தாபனமும் இலங்கை பத்திரிகை ஆசிரியர்கள் சங்கமும் இணைந்து நடாத்திய 2019 மற்றும் 2020 ஆம் ஆண்டுகளுக்கான ஊடக அதியுயர் விருது வழங்கும் விழாவில் விடிவெள்ளி பத்திரிகை இரண்டு விருதுகளை வென்றுள்ளது.
கொழும்பு, ஹில்டன் ஹோட்டலில் நேற்று முன்தினம் மாலை நடைபெற்ற இந் நிகழ்வில் 2020 ஆம் ஆண்டுக்கான விசேட நிலைமைகளில் செய்தித் தேடலுக்கான பேராசிரியர் கைலாசபதி நினைவு விருதினை விடிவெள்ளி பத்திரிகையின் சுயாதீன ஊடகவியலாளர் ஏ.எம். றிப்தி அலி பெற்றுக் கொண்டார்.
அத்துடன் 2020 ஆம் ஆண்டுக்கான சிறந்த பத்திரிகை வடிவமைப்புக்கான சிறப்புச் சான்றிதழ் விருதினை விடிவெள்ளி பத்திரிகையின் பக்க வடிவமைப்பு அணி சார்பில் செ. கலைச்செல்வி பெற்றுக் கொண்டார். இதே விருதினை சண்டே டைம்ஸ் பத்திரிகையும் பகிர்ந்து கொண்டமை குறிப்பிடத்தக்கது.
இலங்கை பத்திரிகை ஆசிரியர் சங்கமும் இலங்கை பத்திரிகை ஸ்தாபனமும் இணைந்து வருடாந்தம் நடாத்தும் சிறந்த ஊடகவியலாளர்களுக்கான விருது வழங்கும் விழாக்களில் கடந்த காலங்களிலும் விடிவெள்ளி பல விருதுகளை வென்றுள்ளமை குறிப்பிடத்தக்கதாகும்.
கடந்த 2010 மற்றும் 2011 ஆம் ஆண்டுகளில் சிறந்த இளம் ஊடகவியலாளருக்கான சான்றிதழ் விருதை விடிவெள்ளி ஊடகவியலாளர் எஸ்.என்.எம். சுஹைல் பெற்றுக் கொண்டார்.
2011 ஆம் ஆண்டு சிறந்த பக்க வடிவமைப்புக்கான சான்றிதழ் விருதும் விடிவெள்ளிக்கு கிடைக்கப் பெற்றது.
அதேபோன்று 2012 ஆம் ஆண்டு சிறந்த பத்தி எழுத்தாளருக்கான விருதை விடிவெள்ளி ஊடகவியலாளர் ஏ.ஆர்.ஏ.பரீல் பெற்றுக் கொண்டார்.
2016 ஆம் ஆண்டு சிறந்த செய்தி இணையத்தளத்திற்கான சிறப்புச் சான்றிதழ் விருதும் விடிவெள்ளிக்கு கிடைக்கப் பெற்றது.
2018 ஆம் ஆண்டு சிறந்த பக்க வடிவமைப்புக்கான விருதும் சிறந்த செய்தி இணையத்தளத்திற்கான சிறப்புச் சான்றிதழ் விருதும் விடிவெள்ளிக்கு கிடைக்கப் பெற்றது. இந் நிலையிலேயே 2020 ஆம் ஆண்டுக்கான விருது வழங்கும் நிகழ்விலும் விடிவெள்ளி இரண்டு விருதுகளை வென்று சாதனை படைத்துள்ளது.
2008 ஆம் ஆண்டு நவம்பர் 6 ஆம் திகதி இலங்கை முஸ்லிம்களின் முதன்மைக் குரலாக ஆரம்பிக்கப்பட்ட விடிவெள்ளி வார பத்திரிகை கடந்த 14 வருடங்களாக இலங்கை முஸ்லிம்களின் முதன்மைக்குரலாக பிரகாசித்து வருகின்றமை குறிப்பிடத்தக்கது.- Vidivelli