முஸ்லிம் சேவையில் நிலவும் குறைபாடுகள் தீர்க்கப்படும்
முஸ்லிம் மீடியா போரம் மாநாட்டில் ஊடக அமைச்சர் டலஸ் உறுதியளிப்பு
(ஏ.எல்.எம்.சத்தார், ஏ.ஆர்.ஏ.பரீல்)
இலங்கை ஒலிபரப்புக் கூட்டுத்தாபன முஸ்லிம் சேவையில் பணிப்பாளர் ஒருவர் நியமிக்கப்படாமை உள்ளிட்ட பலதரப்பட்ட குறைபாடுகளுக்கு விரைவில் தீர்வினைப் பெற்றுக் கொடுப்பேன் என ஊடகத்துறை அமைச்சர் டலஸ் அழகப்பெரும தெரிவித்தார்.
ஸ்ரீலங்கா முஸ்லிம் மீடியா போரத்தின் 25 ஆவது பேராளர் மாநாடு கொழும்பு அல்-ஹிதாயா கல்லூரியின் பஹார்தீன் கேட்போர் கூடத்தில் கடந்த சனிக்கிழமை காலை போரத்தின் தலைவர் என்.எம். அமீன் தலைமையில் நடைபெற்றது.
அதில் பிரதம அதிதியாக கலந்து கொண்டு உரையாற்றும் போதே அமைச்சர் மேற்கண்டவாறு உறுதியளித்தார்.
இந் நிகழ்வில் போரத்தின் தலைவர் என். எம். அமீன் உரையாற்றுகையில், முன்னாள் கல்வி அமைச்சர் கலாநிதி பதியுதீன் மஹ்மூத், இலங்கை ஒலிபரப்புக் கூட்டுத்தாபன முஸ்லிம் சேவைக்கென நேரம் ஒதுக்கிக் கொடுத்தார். பின்னர் முன்னாள் ஆளுநர் மர்ஹூம் அலவி மௌலானாவினால் மேலும் நேரம் ஒதுக்கிக் கொடுக்கப்பட்டது. இன்று தினமும் 6 மணித்தியாலங்கள் முஸ்லிம் சேவை இடம்பெறுகிறது. ஆனால் ஐந்து பேரே இச்சேவையில் பணிக்கு அமர்த்தப்பட்டிருக்கிறார்கள்.
முஸ்லிம் வர்த்தகர்களால் பல மில்லியன் ரூபா நிதி அனுசரணை இச்சேவைக்காக வழங்கப்படுகிறது.
இந்நிலையில் இதர சேவைகளுக்குப் போன்று முஸ்லிம் சேவைக்கும் பணிப்பாளர் ஒருவர் அமர்த்தப்பட வேண்டியது அவசியமாகும் என்றார்.
ஊடக அமைச்சர் தனது உரையில் இதற்கு பதிலளிக்கும் போது மேலும் கூறியதாவது, நான் ஊடக அமைச்சராக பதவியேற்ற மறுதினமே நீதி அமைச்சர் அலி சப்ரி மற்றும் பாராளுமன்ற உறுப்பினர் எஸ்.எம். மரிக்கார் ஆகியோர் தொலைபேசி ஊடாக என்னைத் தொடர்பு கொண்டு முஸ்லிம் சேவை இடைநிறுத்தப்பட்ட தகவலைச் சொன்னார்கள். உடனே செயலில் இறங்கிய நான், பிறிதொரு கல்வி நிகழ்ச்சி ஒன்றுக்காக முஸ்லிம் சேவை நேரம் பெறப்பட்டாலும் கூட, அதனை நிறுத்தி விட்டு முஸ்லிம் சேவைக்கு மீண்டும் அதனை வழங்க வழி வகுத்துக் கொடுத்தேன் என்றார்.
இந் நிகழ்வில் அமைச்சர் டலஸ் அழகப்பெரும தொடர்ந்தும் உரையாற்றுகையில்,
அரசாங்கத்தின் கொள்கை ஊடக தணிக்கை அல்ல. ஒழுங்குபடுத்தல் மற்றும் சீராக்கலே. ஊடகம் மற்றும் தொடர்பாடல் நெருப்பினைப் போன்றது. அதனை சரியான முறையில் பிழையின்றி பயன்படுத்தினால் பெரும் நன்மைகள், பயன்கள் கிடைக்கும். தவறான முறையில் பயன்படுத்தினால் அழிவுகளே ஏற்படும்.
தவறான அரசியல் மற்றும் தவறான ஊடக பயன்பாடு காரணமாகவே சகோதர மக்களை சந்தேகத்துடன், வைராக்கியத்துடனும் நோக்கும் நிலைமை உருவானது. இதனால் சகோதர மக்கள், சகோதர சமூகம் வேதனைகளுக்குள்ளானது, பிளவுகள் ஏற்பட்டன என்பதை கவலையுடன் ஏற்றுக் கொள்ள வேண்டியுள்ளது.
இலங்கை பல் இன, பல் மத, பல் கலாசாரங்களைக் கொண்ட நாடாகும். இவ்வாறான நாட்டில் நல்லிணக்கம், சகவாழ்வு மற்றும் சகோதரத்துவம், ஒற்றுமை என்பனவற்றுக்காக இலங்கை முஸ்லிம் மீடியா போரம் ஆற்றி வந்துள்ள சேவைகள் அளப்பரியன.
நாம் ஒன்றாக எழுந்திருக்க வேண்டுமேயன்றி பிளவுபட்டு கீழே வீழ்ந்து விட இடமளிக்கக் கூடாது. இவ்வாறு நாம் இலங்கையைப் பாதுகாத்துக்கொள்ள வேண்டுமென்றால் நாம் எம்மிடையே பொறுமை, புரிந்துணர்வு, ஒற்றுமை என்பவற்றைக் கடைப்பிடிக்க பழகிக் கொள்ள வேண்டும்.
இலங்கையின் கல்வி முறைமை சிறந்த சிங்கள, தமிழ், முஸ்லிம் மக்களை உருவாக்குகிறது. என்றாலும் சிறந்த இலங்கையர்களை உருவாக்குவதில்லை. உலக வரலாறு முழுவதிலும் மனித முன்னேற்றத்துக்கும், மனித உரிமைகளுக்கும் முஸ்லிம் உலகம் அளித்த பங்களிப்புகள் ஒப்பற்றவை. உமர் கையாம் போன்ற பல்துறை கலைஞர்கள் எழுதிய நூல்கள் மற்றும் லெபனான் நாட்டவர் கலீல் ஜிப்ரான், காலித் ஹுசைன் போன்ற இலக்கியவாதிகளின் படைப்புகள் மற்றும் விஞ்ஞானிகளின் கண்டுபிடிப்புகள் பற்றி நாம் ஏன் பேசாமலிருக்கிறோம். இந்து அரபி எண்களை உலகுக்கு வழங்கியவர் யார்?
எமது நாட்டை எடுத்துக்கொண்டால் நாமறிந்த அரசியல்வாதி பதியுதீன் மஹ்மூத். அமைச்சராகவிருந்து இலங்கையின் கல்வித்துறைக்கு எத்தகைய மேலான பங்களிப்புக்களைச் செய்துள்ளார்.? ரி.பி. ஜாயா, அலவி மௌலானா என்போர் இலங்கையர் என்ற அடையாளத்துக்காக எவ்வளவு பாரிய பங்களிப்பினைச் செய்துள்ளார்கள். தற்போதைய அமைச்சர் அலிசப்ரி தற்காலத்துக்கோர் உதாரண புருஷராவார்.
ஊடகவியலாளர்கள் மற்றும் தொடர்பாடல்களில் ஈடுபடுவோர் என்ற வகையில் எங்களுக்கு பாரிய பொறுப்புகள் வழங்கப்பட்டுள்ளன. இன்று உலகின் கருத்தினை வெளியிடும் மேடை ஊடகமே.
கருத்து சுதந்திரம் என்பது ஏனையோர் ஏற்றுக் கொண்டாலும், ஏற்றுக் கொள்ளாவிட்டாலும் எவ்வித அழுத்தங்களுக்கும் அடிபணியாது தங்கள் கருத்தினை வெளியிடுவதற்கு உள்ள ஜனநாயக உரிமையாகும். இந்த உரிமையைப் பாதுகாத்துக் கொள்வது எமது பொறுப்பாகும்.
ஜனாதிபதி கோத்தாபய ராஜபக்ஷ உட்பட தற்போதைய அரசாங்கத்தினதும், ஊடக அமைச்சரான எனதும் கொள்கை தணிக்கையல்ல ஒழுங்குபடுத்தலே. இன்று உங்களுக்கு கருத்துச் சுதந்திரம் இல்லாமற் போனால், அச்சுதந்திரம் நாளை எனக்கும் இல்லாமற் போகலாம் என்றார்.
நிகழ்வில் இந்திய பாராளுமன்ற உறுப்பினர் நவாஸ் கனி கௌரவ அதிதியாகக் கலந்து கொண்டார். கலாநிதி எம்.சி. ரஸ்மின் விசேட உரை நிகழ்த்தினார்.
இதன்போது, இலங்கையில் பணிபுரியும் ஊடகவியலாளர்கள் எதிர்நோக்கும் தொழில் ரீதியான சவால்கள் குறித்து முஸ்லிம் மீடியா போரத்தினால் முன்னெடுக்கப்பட்ட ஆய்வறிக்கையும் வெளியிட்டு வைக்கப்பட்டது. அத்துடன் ஊடக நிறுவனங்கள் மற்றும் ஊடகவியலாளர்களின் தகவல்கள் அடங்கிய விபரக் கொத்தும் வெளியிட்டு வைக்கப்பட்டது.
புதிய நிர்வாக சபை தெரிவு
இரண்டாவது அமர்வில் புதிய நிர்வாக சபைத் தெரிவு இடம்பெற்றது. புதிய தலைவராக சிரேஷ்ட பெண் ஒலிபரப்பாளர் புர்கான் பீ இப்திகார் தெரிவு செய்யப்பட்டார். செயலாளராக ஊடகவியலாளர் எம்.ஜே. பிஷ்ரின் முஹம்மத், பொருளாளராக சிரேஷ்ட ஊடகவியலாளர் சிஹார் அனீஸ் ஆகியோர் தெரிவாகினர். புதிய செயற்குழுவும் இதன்போது தெரிவு செய்யப்பட்டமை குறிப்பிடத்தக்கது.
(படங்கள் : எஸ்.எம்.சுரேந்திரன்,
ஏ.எஸ்.எம்.ஜாவித்)
- Vidivelli