நாட்டின் பொருளாதார நெருக்கடி மார்ச் மாதத்தில் மிக மோசமான கட்டத்தை அடையும் என அமைச்சர் ஒருவர் அண்மையில் எதிர்வுகூறியிருந்தார். அதன் அறிகுறிகள் பெப்ரவரி மாத இறுதியிலேயே தெரிய ஆரம்பித்துள்ளன.
நாட்டின் இயக்கமே எரிபொருளிலேயே தங்கியுள்ளது. ஆனால் நாட்டை சுமுகமாக கொண்டு செல்வதற்குத் தேவையான எரிபொருள் நம்மிடம் இல்லை. அதனைப் பெற்றுக் கொள்ளத் தேவையான அந்நியச் செலாவணி மத்திய வங்கியிடம் இல்லை என்பதே இதற்கான காரணமாகும். வெளிநாடுகளிலிருந்து இலங்கைக்கு எரிபொருளை ஏற்றி வரும் பல கப்பல்கள் தற்போது இலங்கைக்கு வெளியே காத்து நிற்கின்றன. இலங்கை உரிய பணத்தைச் செலுத்தினால் எரிபொருள் கிடைக்கும். இன்றேல் முழு நாடும் ஸ்தம்பித்து நிற்கும்.
எரிபொருள் நெருக்கடி காரணமாக நாட்டில் தினமும் நான்கரை மணி நேரத்திற்கு மின்சாரத்தைத் துண்டிக்க வேண்டி ஏற்பட்டுள்ளது. அடுத்து வரும் நாட்களில் 7 மணி நேரத்திற்கு மின் துண்டிப்பு இடம்பெறும் என ஊடகங்கள் செய்தி வெளியிட்டுள்ளன. மறுபுறம் போதுமான எரிபொருள் இன்மையால் பல இடங்களில் எரிபொருள் விநியோக நிலையங்கள் மூடப்பட்டுள்ளன. இதனால் போக்குவரத்துச் சேவை பாதிக்கப்பட்டுள்ளது. பல நூற்றுக் கணக்கான தனியார் பஸ் சேவைகள் இடைநிறுத்தப்பட்டுள்ளன. முச்சக்கர வண்டி சாரதிகளும் சேவையில் ஈடுபட முடியாத நிலைக்குத் தள்ளப்பட்டுள்ளனர். எரிபொருளின் விலை அண்மையில்தான் அதிகரிக்கப்பட்ட நிலையில் மேலும் விலை அதிகரிக்க வேண்டும் என எரிசக்தி அமைச்சர் கோரிக்கை விடுத்திருக்கிறார்.
நீண்ட நேர மின்துண்டிப்பானது மக்களை பாரிய சிரமத்தில் ஆழ்த்தியுள்ளது. உயர்தரப் பரீட்சை நடைபெற்றுக் கொண்டுள்ள நிலையில் மின் துண்டிக்கப்படுவதானது மாணவர்களின் கல்வியை வெகுவாகப் பாதித்துள்ளது. இது அவர்களது எதிர்காலத்தையே பாதிக்கும் செயற்பாடாகும். கொவிட் 19 நெருக்கடிக்குப் பின்னர் நாட்டில் வியாபாரத்துறை சற்று முன்னேறி வருகின்ற நிலையில் மின்துண்டிப்பானது பலத்த சவால்களைத் தோற்றுவித்துள்ளது. இதனால் வர்த்தக நடவடிக்கைகள் பாதிக்கப்பட்டுள்ளன. இது சுற்றுலாத் துறையையும் வெகுவாகப் பாதிக்கும்.
நாட்டின் பொருளாதார நெருக்கடி நிலை கைமீறிச் சென்று கொண்டிருக்கின்ற நிலையில் அதிலிருந்து மீள்வதற்கான வழிகளைத் தோடாது மேலும் மேலும் நாட்டை சிக்கலுக்குள் தள்ளுகின்ற செயற்பாடுகளையே அரசாங்கம் முன்னெடுத்து வருகின்றமை கவலைக்குரியதாகும்.
நாட்டின் அந்நியச் செலாவணி கையிருப்பை அதிகரிக்கிறோம் என்ற போர்வையில் வெளிநாடுகளிடமிருந்து தினம் தினம் அரசாங்கம் ஆயிரக் கணக்கான மில்லியன் டொலர்களைக் கடனாகப் பெற்று வருகிறது. பல அமைச்சர்கள் அரபு நாடுகளுக்கு அடிக்கடி சென்று கடன் கோரிக்கைகளை முன்வைத்து வருகின்றனர். அதுபோல நிதியமைச்சர் பசில் ராஜபக்ச விரைவில் மீண்டும் இந்தியா செல்லவுள்ளதாக அறிக்கைகள் கூறுகின்றன. இலங்கையின் அயல் நாடு என்ற வகையில் நெருக்கடியான நிலைமைகளில் இந்தியா எப்போதுமே கை கொடுத்து வந்துள்ளது. தற்போதும் கூட இலங்கையை பொருளாதார நெருக்கடியிலிருந்து மீட்பதற்காக பாரிய முதலீடுகளில் ஈடுபடத் தயாராகவுள்ளதாக இந்திய வெளிவிவகார அமைச்சர் ஜெய்ஷங்கர் நேற்று அறிவித்துள்ளார்.
சர்வதேச நாடுகளின் உதவியும் ஒத்துழைப்புமின்றி இந்த நெருக்கடியிலிருந்து இலங்கையினால் வெளிவர முடியாது என்பது திண்ணம். எனினும் இலங்கையின் வெளிவிவகாரக் கொள்கைகள் சர்வதேச நாடுகளின் நட்பை ஈர்க்கும் வகையில் இல்லை என்பதே கவலைக்குரியதாகும். சர்வதேச நாணய நிதியத்தின் உதவியை நாடுமாறு நாட்டின் பல்வேறு தரப்பினரும் ஆலோசனை வழங்கியும் கூட இதுவரை அது தொடர்பில் சாதகமான நகர்வுகளைக் காண முடியவில்லை. இலங்கையின் சமகால பொருளாதார நிலைமை தொடர்பான அறிக்கை எதிர்வரும் 25 ஆம் திகதி வொஷிங்டனில் முன்வைக்கப்படவுள்ளது. அதனை அடிப்படையாகக் கொண்டுதான் இலங்கை விவகாரம் குறித்து அந்நிதியம் தீர்மானங்களை எடுக்கும். எனினும் சர்வதேச நாணய நிதியத்தின் நிபந்தனைகளுடன் இலங்கை எந்தளவு இணங்கிச் செல்லும் என்பதிலேயே அதன் சாதக பாதகங்கள் தங்கியுள்ளன.
இந்த சமகால நெருக்கடியிலிருந்து வெளிவருவதற்கான எந்தவித திட்டங்களோ கொள்கைகளோ அரசாங்கத்திடம் இல்லை என்பது தெளிவாகத் தெரிகிறது. அவற்றை வகுப்பதற்கான ஆற்றலும் அறிவும் கொண்டவர்கள் அரசாங்க தரப்பில் இல்லை என்பதும் இப்போது நிரூபணமாகியுள்ளது. ‘வியத்மக’ எனும் புத்திஜீவிகள் தம்முடன் இருப்பதாகவும் நாட்டை வளர்ச்சிப் பாதையில் கொண்டு செல்வதற்கான தூர நோக்கான திட்டங்கள் உள்ளதாகவும் கூறி பெரும்பான்மை மக்களை ஏமாற்றியே இந்த அரசாங்கம் ஆட்சிக்கு வந்தது. ஆனால் இன்று வியத்மக எனும் அமைப்பின் முகவரியே இல்லாது போயுள்ளது. அதில் இணைந்திருந்த பல புத்திஜீவிகள் அரசாங்கத்தின் தவறான கொள்கைகள் காரணமாக விலகிச் சென்றுள்ளனர்.
இந் நிலையில் அரசாங்கம் ஆளும் தரப்பு, எதிர்த்தரப்பு எனும் வேறுபாடுகளைப் புறந்தள்ளி நாட்டின் முன்னேற்றத்திற்குப் பங்களிக்க விரும்புகின்ற சகல புத்திஜீவிகளையும் ஒன்றிணைத்து கொள்கைகளை வகுத்து நடைமுறைப்படுத்த முன்வர வேண்டும்.
எவ்வாறாயினும் அடுத்து வரும் நாட்கள் நிச்சயம் இருள்மிக்கதாகவே அமையப் போகின்றன என்பதே பெரும் கவலை தரும் செய்தியாகவுள்ளது. எல்லாம் வல்ல இறைவன் இலங்கையையும் அதன் மக்களையும் பாரிய நெருக்கடிகளிலிருந்து காப்பாற்றுவானாக.- Vidivelli