(ஏ.ஆர்.ஏ.பரீல்)
தற்போது காலாவதியாகியுள்ள பள்ளிவாசல்களின் நிர்வாக சபைகளின் பதவிக்காலம் வக்பு சபையினால் மறு அறிவித்தல் வரை நீடிக்கப்பட்டுள்ளது. அத்தோடு புதிய நிர்வாக சபைகளைத் தெரிவு செய்வதற்கான அனுமதி மறு அறிவித்தல் வரை தற்காலிகமாக இடைநிறுத்தி வைக்கப்பட்டுள்ளது.
இவ்விவகாரம் தொடர்பில் முஸ்லிம் சமய பண்பாட்டலுவல்கள் திணைக்களத்தின் பணிப்பாளர் இப்றாஹிம் அன்ஸார் அனைத்து பள்ளிவாசல்களின் நம்பிக்கையாளர்கள் பொறுப்பாளர்களுக்கு கடிதங்களை அனுப்பி வைத்துள்ளார்.
2022.02.10 ஆம் திகதியிடப்பட்ட MRCA/W/1/2/2022 எனும் இலக்கமுடைய கடிதத்தில் மேலும் தெரிவிக்கப்பட்டுள்ளதாவது ‘இலங்கை வக்பு சபையின் கீழ் பதிவு செய்யப்பட்டுள்ள அநேகமான பள்ளிவாசல்களது நம்பிக்கையாளர்களின் நியமனக் காலம் முடிவடைந்துள்ளதுடன் புதிய நம்பிக்கையாளர் சபையினைத் தெரிவு செய்வதற்கான அனுமதியினை வழங்குமாறு பள்ளிவாசல் நம்பிக்கையாளர்கள் /பொறுப்பாளர்களினால் தொடர்ச்சியாக வேண்டுகோள் விடுக்கப்படுகின்றன.
எனினும் தற்போது நாட்டில் கொவிட் 19 கட்டுப்பாடுகள் காரணமாக மத ஸ்தலங்களில் ஒன்று கூடுவோரின் எண்ணிக்கை வரையறுக்கப்பட்டுள்ள துடன் பள்ளிவாசல்களில் ஜும்ஆத் தொழுகை தவிர்ந்த வே-று எவ்வித கூட்டு செயற்பாடுகளுக்கோ,அல்லது பொதுக்கூட்டங்களுக்கோ சுகாதார தரப்பினரால் அனுமதி வழங்கப்படாத காரணத்தினால்,புதிய நம்பிக்கையாளர் சபையினைத் தெரிவு செய்வதற்கான அனுமதி மறு
அறிவித்தல்வரை இலங்கை வக்பு சபையினால் தற்காலிகமாக இடைநிறுத்தப்பட்டுள்ளதுடன் அனுமதி கிடைத்தவுடன் நம்பிக்கையாளர் தெரிவு தொடர்பாக தங்களுக்கு அறியத்தரப்படும் என்பதனை அறியத்தருகின்றேன்.
எனவே 1956 ஆம் ஆண்டில் 51 ஆம் இலக்க வக்பு சட்டம், 1962 ஆம் ஆண்டின் 21 ஆம் இலக்க வக்பு திருத்தச்சட்டம் மற்றும் 1982 ஆம் ஆண்டின் 33 ஆம் இலக்க வக்பு திருத்தச்சட்டம் ஆகியவற்றின் சரத்து 14 (3) இன் பிரகாரம் புதிய நம்பிக்கையாளர் சபையினைத் தெரிவு செய்து இலங்கை வக்பு சபையினால் நியமனம் வழங்கப்படும்வரை தற்போதுள்ள நம்பிக்கைப் பொறுப்பாளர்களே பள்ளிவாசல் பரிபாலனத்துக்கு பொறுப்புடையவர்கள் என்பதனை கவனத்திற் கொள்ளுமாறு கேட்டுக்கொள்ளப்படுகின்றீர்கள்.
இது தவிர நிதி நிருவாக மோசடி மற்றும் ஒழுக்கக் கேடான விடயங்களில் ஈடுபட்டுள்ளதாக உறுதிப்படுத்தப்பட்ட நிருவாகங்களுக்குப் பதிலாக தற்காலிகமாக ‘விசேட நம்பிக்கையாளர்கள்’ வக்பு சபையின் அனுமதியுடன் நியமிக்கப்படுவார்கள் எனவும் கடிதத்தில் குறிப்பிட்டுள்ளது.- Vidivelli