எம்.ஐ.அப்துல் நஸார்
ஆப்கானிஸ்தானை தலிபான்கள் பொறுப்பேற்றதைத் தொடர்ந்து அங்கு ஏலவே நிலவிய மனிதாபிமான நெருக்கடி நிலை மேலும் மோசமடைந்துள்ளது. முக்கியமான வெளிநாட்டு உதவிகள் நிறுத்தப்பட்டுள்ளதால் மில்லியன் கணக்கான ஆப்கானியர்கள் பட்டினியை எதிர்கொண்டுள்ளனர்.
ஏற்கனவே பல தசாப்தங்களாக போரினால் பாதிக்கப்பட்ட ஒரு நாட்டில் தலிபான்கள் கைப்பற்றிய சில மாதங்களுக்குப் பின்னர் ஆப்கானிஸ்தான் மக்கள் பெரும் நெருக்கடியில் சிக்கிக் கொண்டிருப்பதையும், பட்டினியை எதிர்கொள்வதையும் அங்கிருந்து வரும் செய்திகள் உறுதிப்படுத்துகின்றன. இது தவிர, சுகாதாரப் பாதுகாப்பு கட்டமைப்பு வீழ்ச்சியடைந்து வருவதோடு ஊதியங்களும் வீழ்ச்சியடைந்து வருகின்றன.
முப்பத்தெட்டு மில்லியன் மக்களைக் கொண்ட ஆப்கானிஸ்தான், கடந்த ஆகஸ்ட் மாதத்தில் தலிபான்கள் ஆட்சிக்கு வருவதற்கு முன், வெளிநாட்டு உதவியை பெரிதும் நம்பியிருந்தது. தற்போது தலிபான்கள் அதிகாரத்தைக் கைப்பற்றியுள்ளதால் சர்வதேசம் பில்லியன் கணக்கான டொலர்கள் உதவியை நிறுத்தியுள்ளதோடு நிவாரணப் பணிகளுக்குத் தடையை ஏற்படுத்தும் விதமாக பொருளாதாரத் தடைகளையும் விதித்துள்ளது.
எனினும் ஆப்கானுக்கான உதவிகளை அதிகரிக்குமாறு அமெரிக்காவையும் ஏனைய நாடுகளையும் ஐ.நா அதிகாரிகள் வலியுறுத்துகின்றனர். ஆனால் தற்போது ஆப்கானிஸ்தான் தலிபான்களின் கட்டுப்பாட்டில் இருப்பதால் உதவிகளை வழங்க முடியாத நிலையை அந்த நாடுகள் எதிர்கொள்கின்றன.
‘பரந்துபட்ட ஆப்கானிஸ்தானுக்கான எந்தவொரு உதவியும் தலிபான்களின் அதிகாரத்தைப் பலப்படுத்தும் அதேவேளை அவர்களின் நடத்தையின் மீது செல்வாக்கு செலுத்தும் காரணிகளை பலவீனப்படுத்தும்’ என ஆப்கானிஸ்தானுக்கான முன்னாள் அமெரிக்க தூதர் பி. மைக்கேல் மெக்கின்லி வெளிவிவகார அமைச்சுக்கு எழுத்து மூலம் அறிவித்துள்ளார்.
தலிபான்கள் ஆட்சிக்கு வந்த பின்னர்தான் மனித உரிமை மீறல்கள் அதிகரித்துள்ளன. அவர்களால் டசின் கணக்கான மக்களுக்கு பகிரங்க மரணதண்டனை வழங்கப்பட்டுள்ளது. ஊடகவியலாளர்கள் மற்றும் செயற்பாட்டாளர்களுக்கு எதிரான அச்சுறுத்தல்கள் அதிகரித்துள்ளன, பெண் பிள்ளைகள் பாடசாலைக்குச் செல்வது குறைவடைந்துள்ளது, அத்தோடு பெண்கள் மீதான கட்டுப்பாடுகள் கடுமையாக்கப்பட்டுள்ளன.
பொருளாதாரத் தடைகளை மீறாத வகையில் ஒரு வருடத்திற்கு மனிதாபிமான உதவிகளை வழங்க ஐ.நா பாதுகாப்புச் சபை அண்மையில் இணங்கியது. ஆனால் பரவலாக ஏற்படவுள்ள பேரழிவை தவிர்ப்பதற்கு மேலும் அதிக உதவிகள் வழங்கப்பட வேண்டும் என ஆய்வாளர்கள் தெரிவிக்கின்றனர்.
உணவின்றித் தவிப்பு
உலக உணவுத் திட்டத்தின் கருத்தின் பிரகாரம், ஆப்கானிஸ்தானில் 2 சதவீதத்தினர் மட்டுமே போதுமான உணவைப் பெறுகின்றனர். மேலும் இந்த குளிர் காலத்தில் கடுமையான பட்டினி நிலைமை ஏற்படக் கூடும் என ஐக்கிய நாடுகள் சபை எச்சரிக்கை விடுத்துள்ளது. மூன்று மில்லியனுக்கும் அதிகமான குழந்தைகள் ஊட்டச்சத்து குறைபாட்டால் பாதிக்கப்பட்டுள்ளனர்.
பட்டினி தொடர்பான நெருக்கடிக்கு பல்வேறு காரணிகள் அடித்தளமாகக் காணப்படுகின்றன. மாவு மற்றும் அரிசி போன்ற உணவுப் பொருட்களுக்கான விலைகள் மிகவும் உயர்வடைந்துள்ளன, கடுமையான வறட்சியினால் நாட்டின் பெரும்பாலான பகுதிகளில் பயிர்கள் அழித்துள்ளதுள்ளன, மேலும் பல சவால்கள் காரணமாக எல்லை தாண்டிய உதவிகள் நிறுத்தப்பட்டுள்ளன. நிலைமை சீரடையவில்லையாயின் இவ்வருடம் ஆப்கானிஸ்தானில் பஞ்சம் ஏற்படக்கூடும் என உணவு மற்றும் விவசாய அமைப்பு எச்சரித்துள்ளது.
அதிகரித்து வரும் வறுமை
கிட்டத்தட்ட ஒவ்வொரு ஆப்கானிய குடிமகனும் 2022 ஆம் ஆண்டின் நடுப்பகுதியில் வறுமையில் வாழும் நிலை ஏற்படலாம் என ஐக்கிய நாடுகள் அபிவிருத்தித் திட்டம் தெரிவித்துள்ளது. இது வெளிநாட்டு உதவி நிறுத்தப்பட்டதன் ஒரு விளைவாகும். தலிபான்கள் அரசாங்கத்தைப் பொறுப்பேற்றுக் கொள்வதற்கு முன்னர், ஆப்கானிஸ்தான் அரசாங்கத்தின் செலவினங்களில் நான்கில் மூன்று பங்கு சர்வதேசத்தின் மானியங்களால் ஈடுசெய்யப்பட்டது. அந்த நிதி இல்லாமல் போனதால், ஆசிரியர்கள், நீதிமன்ற ஊழியர்கள் என அரசாங்கப் பணிகளில் ஈடுபடும் பல்லாயிரக்கணக்கானோருக்கு பல மாதங்களாக சம்பளம் வழங்கப்படவில்லை.
உலக நிதி அமைப்பில் இருந்தும் ஆப்கானிஸ்தான் துண்டிக்கப்பட்டுள்ளது. ஆப்கான் மத்திய வங்கிக்கு சொந்தமான 9 பில்லியன் டொலர் சொத்துக்களை அமெரிக்கா முடக்கியுள்ளது, எனவே மீள்பெறுகை கோரிக்கைகளை பூர்த்தி செய்ய வங்கியிடம் போதுமான திரவ நிதி இல்லை. ஆப்கானிஸ்தான் பொருளாதாரம் 30 சதவீதம் வரை சுருங்கக்கூடும் என சர்வதேச நாணய நிதியம் மதிப்பிட்டுள்ளது.
சரிந்து வரும் சுகாதாரக் கட்டமைப்பு
முந்தைய அரசாங்கத்தின் கீழ், ஆப்கானிஸ்தானின் சுகாதாரப் பாதுகாப்புக் கட்டமைப்பு வெளிநாட்டு உதவிகளில் தங்கியிருந்தது. அவை இல்லாததனால், வைத்தியசாலைகளில் மருந்து மற்றும் பொருட்களுக்கு பற்றாக்குறை காணப்படுகின்றது. ஆரம்ப பராமரிப்பு சேவைகள் மூடப்படும் நிலைக்கு தள்ளப்பட்டுள்ளன, மேலும் மருத்துவ ஊழியர்களுக்கு வழக்கமாக வழங்கப்படும் சம்பளம் கிடைக்கவில்லை, அவர்கள் விரைவில் வேலைக்கு வருவதை நிறுத்தலாம் என்ற கவலை வெளியிடப்பட்டுள்ளது.
வயிற்றுப்போக்கு, கோவிட்-19, மலேரியா, அம்மை மற்றும் போலியோ ஆகியவற்றின் பரவலை ஆப்கானிஸ்தான் எதிர்கொள்ளும் நிலையிலேயே இந்த நிலைமை ஏற்பட்டுள்ளது.
2021 ஆம் ஆண்டின் இறுதியில், உலக சுகாதார அமைப்பு (WHO) மற்றும் ஐக்கிய நாடுகள் சிறுவர் நிதியம் (UNICEF) ஆகியவை 2022 ஆம் ஆண்டின் நடுப்பகுதியில் நாடு முழுவதும் இரண்டாயிரத்திற்கும் மேற்பட்ட சுகாதாரப் பாதுகாப்பு வசதிகளை ஏற்படுத்த போதுமான நிதியைப் பெற்றன. ஆனால் பெரும்பாலான வைத்தியசாலைகளில் கொவிட்-19 நோயாளிகள் இருந்ததன் காரணமாக ஆயிரத்துக்கும் மேற்பட்ட வசதிகள் எற்படுத்தப்படாமல் விடுபட்டுப்போயின.
வீட்டை விட்டு வெளியேறுதல்
2021 இல், சுமார் ஏழு இலட்சம் பேர் தங்கள் வீடுகளை விட்டு ஆப்கானிஸ்தானின் ஏனைய பகுதிகளுக்கு செல்ல வேண்டிய கட்டாயம் ஏற்பட்டது. அவர்கள் ஏற்கனவே நாட்டிற்குள் இடம்பெயர்ந்த மூன்று மில்லியனுக்கும் அதிகமான மக்களுடன் இணைந்தனர். மோதல்கள், வறுமை மற்றும் வறட்சி ஆகியவற்றிலிருந்து தப்பி, நூற்றுக்கணக்கான குடும்பங்கள் தலைநகர் காபூலை வந்தடைந்தன, அங்கு பலர் உறவினர்களுடன் அல்லது குறைந்த விலையில் அறைகளை வாடகைக்கு எடுத்து வாழ்கின்றனர்.
ஆப்கானிஸ்தானை ஆக்கிரமித்ததன் மூலம், பிரிட்டனும் அமெரிக்காவும் அவர்களால் முடித்துவைக்க முடியாத சண்டையைத் தொடங்கினர். பின்னர் அங்கிருந்து பீதியுடன் வெளியேறிய அவர்கள் மற்றொரு பேரழிவுக்கு வித்திட்டுள்ளனர். இந்த மூன்றாவது பேரழிவைத் தடுக்க வேண்டும் என்றால், அவர்கள் பட்டினியால் வாடும் ஆப்கானிஸ்தான் மக்களுக்கு தாராளமாக உதவ விரைந்து செயற்பட வேண்டும்.-Vidivelli