உயிர்த்த ஞாயிறு தாக்குதல்களைத் தொடர்ந்து முஸ்லிம்களுக்கு எதிராக தொடர்ந்த நெருக்குவாரங்கள் தற்போது புதிய வடிவத்தை எடுத்துள்ளன. இதுவரை முஸ்லிம்களை வெளிப்புற சக்திகள் மூலம் சீண்டி வந்த தரப்பினர், தற்போது முஸ்லிம்களுக்கு மத்தியிலேயே கருத்து முரண்பாடுகளைத் தோற்றுவிப்பதற்கான முயற்சிகளில் இறங்கியுள்ளதை அவதானிக்க முடிகிறது. இந்த சந்தேகத்தை சமூகத்தில் உள்ள பலரும் தற்போது எழுப்பத் தொடங்கியுள்ளனர்.
‘ஒரே நாடு ஒரே சட்டம் செயலணி’ தோற்றுவிக்கப்பட்டதைத் தொடர்ந்து, முஸ்லிம் சமூகத்தின் உள்ளக விவகாரங்களில் இந்த செயலணி தீவிர அக்கறை காட்டுவதைக் காண முடிகிறது. அரசாங்கத்தின் பூரண அனுசரணையோடு இந்த வேலைத்திட்டங்கள் முன்னெடுக்கப்படுகின்றன. குறிப்பாக முஸ்லிம்களுக்குள் நிலவும் தீர்க்க முடியாத பல்வேறு பிரச்சினைகள் இந்த செயலணி மூலம் பூதாகரமாக்கப்படுகின்றன.
உலமா சபையினால் கடந்த காலங்களில் வழங்கப்பட்ட பத்வா, காதி நீதிமன்றங்கள் மீதான விமர்சனம் மற்றும் இஸ்லாம் பாட புத்தகங்களில் திருத்தங்களை மேற்கொள்வதற்கான ஏற்பாடுகள் என்பவற்றை உதாரணமாகக் குறிப்பிடலாம். எதிர்காலத்தில் மேலும் பல கருத்து முரண்பாட்டுக்குரிய விடயங்கள் சந்திக்குக் கொண்டு வரப்படலாம். இவற்றை முஸ்லிம் சமூகம் எவ்வாறு சாதுரியமாக எதிர்கொள்ளப் போகிறது என்பதே விடை காணப்பட வேண்டிய விடயமாகும்.
ஒரே நாடு ஒரே சட்டம் செயலணியின் தலைவராக ஞானசார தேரர் நியமிக்கப்பட்டதைத் தொடர்ந்து குறித்த செயலணி தொடர்பில் உள்நாட்டிலும் சர்வதேச ரீதியாகவும் பலத்த விமர்சனங்கள் முன்வைக்கப்பட்டன. ஏற்கனவே நாட்டில் இனங்களுக்கு மத்தியில் முரண்பாடுகளையும் வன்முறைகளையும் தோற்றுவிப்பதற்கு முன்னின்ற ஒருவர் எவ்வாறு இவ்வாறானதொரு செயலணிக்குத் தலைமை தாங்கலாம் என்ற கேள்வியை பலரும் முன்வைத்தனர். இன்றும் அதே கேள்விகள் தொடரவே செய்கின்றன. இந்த செயலணிக்கு ஞானசார தேரர் தலைவராக நியமிக்கப்பட்டதன் காரணமாக, அதன் முன் தோன்றி கருத்துக்களை முன்வைக்க முஸ்லிம்கள் முன்வரவில்லை. விரல்விட்டு எண்ணக் கூடிய ஓரிரு முஸ்லிம் அமைப்புகளும் தனி நபர்களுமே இந்த செயலணி முன் பிரசன்னமாகி தமது கருத்துக்களை முன்வைத்தனர். இதனை ஒட்டுமொத்த முஸ்லிம் சமூகத்தினதும் கருத்தாக செயலணி கருத முடியாது.
இதேவேளை இச் செயலணி தொடர்பான முஸ்லிம் சமூகத்தின் சந்தேகங்கள் மற்றும் அதிருப்திகளை வெளிப்படுத்தும் வகையில் ஸ்ரீ லங்கா முஸ்லிம் கவுன்சில் கையெழுத்து வேட்டை ஒன்றையும் ஆரம்பித்துள்ளது. இக் கையெழுத்துக்கள் மகஜர் ஒன்றுடன் இணைக்கப்பட்டு செயலணிக்கு அனுப்பி வைக்கப்படும் என எதிர்பார்க்கப்படுகிறது. இந்த செயலணியை முஸ்லிம்கள் புறக்கணிக்கக் கூடாது என்றும் சந்தர்ப்பத்தைப் பயன்படுத்தி தமது அபிப்பிராயங்களை முஸ்லிம்கள் முன்வைக்க வேண்டும் என்ற கோரிக்கைகளும் ஆங்காங்கே முன்வைக்கப்பட்டு வருவதையும் காண முடிகிறது,
எது எப்படியிருப்பினும் இச் செயலணி முஸ்லிம் சமூகத்திற்கு எதிரான செயலணியாக தன்னை அடையாளப்படுத்திக் கொள்ளக் கூடாது என்பதே எமது கரிசனையாகும்.
முஸ்லிம் சமூகத்துடன் கலந்து பேசி தீர்மானிக்க வேண்டிய விடயங்களை அதிகார பலம் கொண்டு நடைமுறைப்படுத்த முயற்சிக்குமாயின் அது இருக்கின்ற நெருக்கடிகளை மேலும் பூதாகரமாக்கவே வழிவகுக்கும். அதனை விடுத்து, சம்பந்தப்பட்ட தரப்புகளுடன் கலந்துரையாடுவதன் மூலமே பிரச்சினைகளுக்கு தீர்வு காண முற்பட வேண்டும்.
இதற்கப்பால் , முஸ்லிம் சமூகத்தினுள் நீண்ட காலமாக நிலவும் மார்க்க ரீதியான கருத்து முரண்பாடுகளை பயன்படுத்தி சில தீய சக்திகள் குளிர்காய முற்படுவதையும் வெளிப்படையாகவே காண முடிகிறது. டாக்டர் சாபி விடயத்தில் முன்னின்று பொய்களைப் பரப்பியவர்கள் இன்று முஸ்லிம் சமூகத்தின் மனித உரிமைகள் பற்றி பாடம் எடுக்கத் தொடங்கியுள்ளமை வேடிக்கையானது. எவ்வாறு தேர்தலில் வாக்குகளை கொள்ளையடிக்க டாக்டர் சாபியை எதிரியாக காட்டி முஸ்லிம் சமூகத்தையே குற்றவாளிக் கூண்டில் நிறுத்தினார்களோ அதேபோன்றுதான் அடுத்த தேர்தலுக்காகவும் முஸ்லிம் சமூகத்தையே தூண்டி, சீண்டி வேடிக்கை பார்க்கமாட்டார்கள் என்பதற்கு என்ன உத்தரவாதம்?
எனவேதான் முஸ்லிம் சமூகத்தின் அங்கமாகவுள்ள சகல தரப்புகளும் இந்த யதார்த்தத்தை தெளிவாகப் புரிந்து கொள்ள வேண்டும். தமக்கு விரோதமானவர்களைப் பழி தீர்க்கிறோம் என்ற போர்வையில் ஒட்டுமொத்த சமூகத்தையும் அழிவுக்குள் தள்ள களமமைக்க கூடாதென வினயமாக வேண்டுகிறோம்.- Vidivelli