உயிர்த்த ஞாயிறு ஜனாதிபதி ஆணைக்குழு விசாரணை அறிக்கையை முழுமையாக வெளியிட்டால் சூத்திரதாரி யார் என தெரிந்துகொள்ளலாம்
பல பாகங்கள் மறைக்கப்பட்டுள்ளன என்கிறார் அப்துல் ஹலீம்
(வத்துகாமம் நிருபர்)
உயிர்த்த ஞாயிறு தின தாக்குதல் தொடர்பான ஜனாதிபதி விசாரணை ஆணைக்குழுவின் அறிக்கை முழுமையாக வெளியிடப்பட்டால் அதன் சூத்திரதாரி யார் என்பது அம்பலமாகும் என கண்டி மாவட்ட ஐக்கிய மக்கள் சக்தியின் பாராளுமன்ற உறுப்பினர் எம்.எச்.அப்துல் ஹலீம் தெரிவித்தார்.
அத்துடன், உயிர்த்த ஞாயிறு தாக்குதல் தொடர்பாக வெளியிடப்பட்ட அறிக்கையின் சில பாகங்கள் மட்டுமே வெளியிடப்பட்டுள்ளது. அதுவும் நாம் போராடிப் பெற்றவை. ஆனால் பல பாகங்கள் இன்னும் வெளியிடப்பட வில்லை. அதில் இரகசியம் இருப்பதாகக் கூறுகின்றனர். அங்குதான் உண்மை உள்ளது. சூத்திரதாரி பற்றி அதில்தான் உள்ளது என்றார்.
கண்டி மாவில்மடயிலுள்ள அவரது அலுவலகத்தில் இடம் பெற்ற ஊடக சந்திப்பின்போதே இவ்வாறு குறிப்பிட்டார்.
அவர் மேலும் தெரிவிக்கையில், பொருட்களின் விலையை கட்டுப்படுத்த அரசினால் முடியாதுள்ளது. நுகர்வோர் பாதுகாப்பு அதிகார சபையால் எதனையும் மேற்கொள்ள முடியாத நிலை ஏற்பட்டுள்ளது.
கடந்த ஆட்சியில் அமைச்சராக இருந்த லக்ஸ்மன் கிறியல்ல பூரணப்படுத்திய மத்திய அதிவேக வீதியின் ஒரு சில கிலோ மீட்டர்கள் மட்டும் அபிவிருத்தி செய்து விட்டு அவர்களே முழுப் பாதையையும் அபிவிருத்தி செய்ததாக கூக்குரலிடுகின்றனர்.
கடந்த ஆட்சியில் அமைச்சராக விருந்த சம்பிக்க ரணவக்க பல்வேறு சிரமங்களுக்கு மத்தியில் கண்டி பஸ்தரப்பிட திட்டத்தை முன் எடுத்தார். இன்று பொதுஜன முன்னணியே அதனை செய்து முடித்துள்ளதாக பெருமை அடிக்கின்றனர்.
விவசாய அமைச்சர் பதவி ஏற்ற போது கூறினார் ஒரு அரிசி மணி கூட வெளி நாட்டில் இருந்து இறக்குமதி செய்யப்படமாட்டாது. அப்படி இறக்குமதி செய்தால் நான் அமைச்சர் பதவியை மட்டுமல்ல அரசியலில் இருந்தே வெளியேறுவேன் என்றார். இன்று மியன்மாரில் இருந்து அரசி இறக்குமதி செய்ய நடவடிக்கை மேற்கொள்ளப்பட்டுள்ளது. விவசாய அமைச்சர் வாய்மூடி மௌனம் காத்து வருகிறார்.
நல்லாட்சியில் நடந்த நல்ல விடயங்கள் பலருக்கு தற்போது மறந்து விட்டது. நாம் ஆட்சிக்கு வந்ததும் உடனடியாக பெற்றோல், எரிவாயு மற்றும் அத்தியாவசியப் பொருட்கள் பலவற்றின் விலைகளைக் குறைத்தோம். தற்போதைய ஆட்சியாளர்கள் பதவிக்கு வந்ததும் தமது நண்பர்களுக்கு உதவி செய்யவும் தரகுப்பணம் பெற்றுக்கொள்ளவுமே தமது வேலைத்திட்டங்களை மேற்கொண்டனர். இதனால் நாடு வங்குரோத்து நிலைக்கு மாறியுள்ளது.
ஜனாதிபதி இது வரை செய்த ஆக்கப்பணிகள் ஒன்றும் இல்லை. எனவே அடுத்த மூன்று வருடத்தில் சகல வாக்குறுதிகளையும் நிறைவேற்றுவதாகக் கூறுகின்றார். இதுவரை நித்திரையில் இருந்து தற்போது விழித்தவர் போல் உரையாற்றுகிறார். எதிர் காலத்தில் நடக்கும் தேர்தல்களில் நாம் அமோக வெற்றி ஈட்டுவோம். தற்போதைய ஆட்சி இயல்பாகவே வீழ்ச்சி அடையும்.
உயிர்த்த ஞாயிறு தாக்குதல் தொடர்பாக வெளியிடப்பட்ட அறிக்கையின் சில பாகங்கள் மட்டுமே வெளியிடப்பட்டுள்ளன. அதுவும் நாம் போராடிப் பெற்றவை. ஆனால் பல பாகங்கள் இன்னும் வெளியிடப்பட வில்லை. அதில் இரகசியம் இருப்பதாகக் கூறுகின்றனர். அங்குதான் உண்மை உள்ளது. சூத்திரதாரி பற்றி அதில்தான் உள்ளது. முஸ்லிம்ளை பழிவாங்கும்நோக்கமே இன்று முஸ்லிம் மையங்களை கொரோனா என்று கூறி கிழக்கு மாகாணத்திற்கு எடுத்துச்செல்கின்றனர். கொரோனா அடக்கம் செய்வதால் பரவுவதில்லை என்றார்.-Vidivelli