(ஏ.ஆர்.ஏ.பரீல்)
‘ஒரே நாடு – ஒரே சட்டம்’ தொடர்பாக நியமிக்கப்பட்டுள்ள ஜனாதிபதி செயலணிக்கு எதிராக எதிர்ப்புகள் வலுவடைந்து வருவதுடன் கண்டனங்களும் வெளியிடப்பட்டு வருகின்றன.
தமிழ்பேசும் சிறுபான்மைக்கட்சிகள், அகில இலங்கை ஜம் இய்யத்துல் உலமா சபை, தேசிய சூரா கவுன்ஸில், ஸ்ரீ லங்கா முஸ்லிம் கவுன்ஸில் மற்றும் அகில இலங்கை வை.எம்.எம்.ஏ. உட்பட சிவில் சமூக அமைப்புகள் எதிர்ப்பு வெளியிட்டுள்ளன. இதே வேளை சட்டத்தரணிகள் சங்கம் ஜனாதிபதி செயலணி நியமனம் முறையற்றது என ஜனாதிபதி கோத்தாபய ராஜபக்ஷவுக்கு கடிதம் ஒன்றினை அனுப்பி வைத்துள்ளது.
தமிழ் பேசும் சிறுபான்மை கட்சிகள் ஸ்ரீ லங்கா முஸ்லிம் காங்கிரஸின் தலைவரும் பாராளுமன்ற உறுப்பினருமான ரவூப் ஹக்கீமின் தலைமையில் நேற்று முன்தினம் யாழ்ப்பாணத்தில் ஒன்று கூடி இச்செயலணி நாட்டு மக்களிடையே இன,மத பிரிவினையை ஏற்படுத்தக் கூடிய ஆபத்தினைக் கொண்டுள்ளதால் இந்நியமனத்தை வன்மையாகக் கண்டிப்பதாகவும், இச்செயலணி ரத்துச் செய்யப்பட வேண்டும் எனவும் தீர்மானம் நிறைவேற்றியுள்ளது.
இச்சந்திப்பில் ஸ்ரீ லங்கா முஸ்லிம் காங்கிரஸ், தமிழீழ விடுதலை இயக்கம், தமிழ் முற்போக்கு கூட்டணி, தமிழ் மக்கள் விடுதலைக் கழகம், தமிழ் மக்கள் கூட்டணி, ஈழமக்கள் புரட்சிகர விடுதலை முன்னணி, தமிழ் தேசிய கூட்டணி என்பனவற்றின் தலைவர்களும் முக்கியஸ்தர்களும் கலந்து கொண்டிருந்தனர்.
இக்கட்சிகளின் இரண்டாம் கட்ட சந்திப்பு அடுத்து வரும் இரு வாரங்களில் இடம்பெறவுள்ளது.
இதே வேளை அகில இலங்கை மக்கள் காங்கிரஸும் இச்செயலணியை வன்மையாகக் கண்டித்துள்ளதுடன் எதிர்ப்பும் வெளியிட்டுள்ளது. நீதிமன்றினால் குற்றவாளியாகக் காணப்பட்டு சிறைத்தண்டனை அனுபவித்த, இனவாதியான ஞானசார தேரர் இச்செயலணியின் தலைவராக எவ்வா-று பதவி வகிக்க முடியும்? என அக்கட்சியின் தவிசாளர் அமீர் அலி கேள்வியெழுப்பியுள்ளார்.
அகில இலங்கை ஜம் இய்யத்துல் உமலா சபை, தேசிய சூரா கவுன்ஸில் உட்பட சிவில் சமூக அமைப்புகள் எதிர்த்து கூட்டறிக்கை வெளியிட்டுள்ளன.
இதேவேளை, நீதியமைச்சின் செயற்பாடுகளை மேற்பார்வை செய்யும் வகையிலான ‘ஒரே நாடு ஒரே சட்டம்’ தொடர்பான ஜனாதிபதி செயலணியின் நியமனமானது, முறையற்றது என்பதுடன் சட்டமியற்றுதல் தொடர்பில் ஏற்றுக்கொள்ளப்பட்ட பொறிமுறைக்குப் புறம்பானதாகும். என சட்டத்தரணிகள் சங்கம் ஜனாதிபதிக்கு அனுப்பிவைத்துள்ள கடிதத்தில் குறிப்பிட்டுள்ளது.- Vidivelli