எச்.எம்.எம்.பர்ஸான்
“எனக்கு மூனு வயசுலயே கண்பார்வை இல்லாம போனதாம். அந்த குறைபாடு எனக்கு ஏழு வயசுலான் தெரிய வந்திச்சு. எனக்கு வந்த அம்மை நோய்தான் கண்பார்வை இழந்ததுக்கான காரணம் என்டு எங்க உம்மாவும், வாப்பாவும் சொன்னாங்க” என தனது கதையை கூற ஆரம்பிக்கிறார் கலீல் றகுமான்.
கோறளைப்பற்று மேற்கு ஓட்டமாவடி பிரதேச செயலகப் பிரிவுக்குட்பட்ட காவத்தமுனை துறையடி வீதியில் வசித்து வருபவர்தான் கலீல் றகுமான். அவருக்கு இப்போது 49 வயதாகிறது. திருமணம் முடித்துள்ள இவருக்கு இரு ஆண் பிள்ளைகளும் இருக்கிறார்கள்.
இரண்டு கண்களினதும் பார்வையை இழந்த போதிலும் மின்சாரப் பொருட்களை பழுது பார்த்துக் கொடுக்கும் தனது திறமை மூலம் அனைவரையும் ஆச்சரியப்பட வைக்கிறார் கலீல் றகுமான்.
“கண் பார்வையை அல்லாஹ் எடுத்துக் கொண்டாலும் என்னை அவன் கைவிடவில்லை. எனது பிரார்த்தனைகளுக்கு அவன் விடை அளித்துள்ளான்” என மிகவும் மகிழ்ச்சியுடன் தனது கதையைக் கூறத் தொடங்கினார் அவர்.
“நான் சின்ன வயசுல இருக்கும் போதே மின்சாரப் பொருட்களை கழற்றி பூட்டுவன். மின் உபகரணங்கள பழுது பார்க்கும் என்ட நெருங்கிய கூட்டாளி ஒருவர் எனக்கு இந்த விசயத்தில பெரிதும் உதவி வழங்கினாரு. அவருகிட்ட கேட்டு கேட்டு தான் இந்த வேலய பழகிக் கொண்டன்.
நமக்கு கண் பார்வை தெரியாது என்டு வீட்டுக்குள்ளேயே முடங்கிக் கிடந்தா அது ரொம்பவும் கஷ்டமா போய்விடும். அல்லாஹ் எனக்கு புத்திக் கூர்மைய தந்திருக்கான் என்டு நினைக்கும் போது எனக்கு ரொம்பவே சந்தோஷம்.
நான் இப்ப செய்ற வேலைக்கு முன்பு ஓடாவி வேல செஞ்சிருக்கன். அதுல கோழிக் கூடு, தில்லக் குத்தி போன்ற சாமான்களையும் சமைக்க பழகி இருக்கன். அதற்கு பிறகுதான் பழுதாகின மின் உபகரணங்கள சமைக்கிற வேலய பழகி அத என்ட தொழிலாக செஞ்சி வாரன்.
இந்த தொழில நான் பதினாறு வருசமா செஞ்சி வாறன். இந்த தொழில நான் ஆரம்பத்துல பழகக்க கொஞ்சம் கஷ்டமாத்தான் இருந்திச்சு. பல முற எனக்கு கரண்டும் அடிச்சு இருக்கு. இருந்தும் நான் இந்த தொழில விட்டுக் கொடுக்கல.
பழுதாகின சாமான்களை கண்டு பிடிக்க எனக்கிட்ட மீட்டர் ஒன்று இருக்கு. அத மின் உபகரணங்களில வைக்கும் போது சத்தம் கேட்கும். அத வெச்சி நான் என்ட வேலய லேசாக்கிக் கொள்வன்.
நான் கேஸ் குக்கர், ரைஸ் குக்கர், வொஷிங் மெஷின், ஐயன் பொக்ஸ், பேன், ஹீட்டர், தண்ணி மோட்டர் போன்ற சாமான்களை பழது பார்த்து கொடுப்பன்.
நான் பழுது பார்த்துக் கொடுக்கும் சாமான்கள் நல்லாவே வேலை செய்கின்றன. யாரும் வந்து குறை கூற மாட்டார்கள். நான் உத்தரவாதத்துடன் தான் பழுது பார்த்து கொடுப்பேன்.
பழுதடைந்த பொருட்களை திருத்துவதற்கு எனக்கு ஒரு நாள் போதும். அத அல்லாஹ்வின் உதவியோடு செய்து முடிப்பேன்.
பார்வை இல்ல என்டதுக்காக நான் என்டைக்கும் யாருக்கும் தொல்லை கொடுக்க விரும்புறல்ல. என்ட எல்லா வேலைகளையும் நானே செஞ்சி முடிப்பன். என்னால சாப்பாடும் சமைக்க முடியும். வீட்டுல கூடுதலாக நான்தான் சாப்பாடு சமைக்கிற. வீட்டுல இருக்கிற வேலைகளை நான் முடிஞ்ச வரயில செஞ்சி முடிப்பன்.
என்ட மன வெளிச்சம், கைகள் இது இரண்டாலயும்தான் நான் தைரியமாக இயங்கிட்டு இருக்கன். எனக்கு கண் பார்வை இல்லையென்று அலட்டிக்கிறயும் இல்ல. அதப்பத்தி யோசிக்கிறயும் இல்ல. அப்படி யோசிக்கிறதால நாம இழந்தத்த பெற முடியாதே.
சில சமயம் தூங்கினா கனவு காணுவன். அந்த கனவுல பழுதான ஒரு பொருள எப்படி திருத்தணும் என்று எனக்கு விளங்கும். காலையில எழும்பி அதன்படியே சரியான முறையில அந்த வேலைய செஞ்சி முடிக்கும்போது எனக்கு ரொம்பவும் சந்தோசமாக இருக்கும்.
நான் சின்ன வயசில இருக்கும் போது அல்லாஹ்கிட்ட அடிக்கடி துஆ கேட்பன். யாருக்கும் அடிமை இல்லாத, நிம்மதியான ஒரு தொழிலையும், நல்ல மனைவியையும் தா என்று. அல்லாஹ் என்ட ஆசய நிறைவேத்தியுள்ளான்.
நானே உழைச்சி வீடு காட்டித்தான் கல்யாணம் முடிச்ச. கண்பார்வை இல்ல என்டு என்ட மனைவி என்ன ஒதுக்கி பாக்குறதில்ல. நாங்க எப்போதும் சந்தோசமாகத்தான் இருக்கம். எனக்கு ரெண்டு ஆண் மக்கள் இருக்காங்க.
நான் எப்போதும் நேர்மையாகத்தான் வேல செஞ்சி வாரன். அதுலான் பரகத் இருக்கு. யாரையும் ஏமாத்தி வேல வெஞ்சா அது நல்லமில்ல.
சிலர் பொருட்கள் வேல செய்யல என்டு கொண்டு வருவாங்க. ஆனால் அதுல ஒரு வயர்தான் அறுந்திருக்கும். அத திருத்திக் கொடுத்துட்டு நான் காசி வான்குறல்ல. ஏன் என்றா நான் கஷ்டப்பட்டு வேல செய்யணும் கஷ்டப்பட்டால்தான் காசி வாங்குவன். பொய்ய சொல்லி ஒருபோதும் காசு வாங்க மாட்டன்.
ஒரு தடவ ஒரு வீட்டுக்கு போயிருந்தன். அங்க வொஷிங் மெஷின் பழுது எண்டாங்க. அத செக் பண்ணி பார்த்தன் மோட்டார் மாத்தனும் போல இருந்திச்சு. மோட்டார் மாத்தனும் காசு கூட வரும் போல இருக்கு பரவா இல்லயா என்டு கேட்டன். அவங்களும் ஒகே பரவாயில்ல என்டாங்க. மிசின வீட்ட ஏத்தி அனுப்புங்க என்டு சொன்னன். அனுப்பினாங்க. அத வீட்ட வெச்சி செக் பண்ணி பார்த்தன். மோட்டார் பழுதாகல்ல, அதுல சின்ன பழுது ஒன்டுதான் இருந்திச்சு. அத சமச்சி வெச்சிட்டன். அத எடுக்க வந்தாங்க. மோட்டார மாத்தின என்டு நினச்சிட்டு அவங்க எனக்கு கூட காசி தந்தாங்க. நான் அவங்கள ஏமாத்தாம விசயத்த சொல்லிட்டு செஞ்ச வேலைக்கு மட்டும்தான் காச வாங்கினன். நான் ஏன் இத சொல்றன் என்டா நம்மள அவங்க பாக்காட்டியும் அல்லாஹ் நம்மள பாத்துட்டு இருக்கான். நாம எப்பவுமே நேர்மையாக உழைக்கனும் அதுலதான் பரகத் இருக்கு” என தனது கதையால் நம்மை மென் மேலும் ஆச்சரியப்பட வைக்கிறார் கலீல் றகுமான்.
பார்வை இருந்தும் உடலில் பலமிருந்தும் உழைக்காது, நேர்மையற்று செயற்படும் பல மனிதர்களுக்கு நிச்சயம் கலீல் றகுமானின் வாழ்க்கையே ஒரு முன்மாதிரிதான்.
“ இந்த தொழிலை நான் இன்னும் மேம்படுத்த விரும்புறன். அதுதான் என்ட ஆச. அதற்கு பொருளாதார சிக்கல்தான் முக்கிய காரணமா இருக்கு. பொருளாதாரம் இருக்குமென்டா இதுல இருந்து நான் இன்னும் முன்னேறுவேன்” என தன்னம்பிக்கையுடன் கூறுகிறார் அவர். கலீல் றகுமானின் தொழில் மேம்பட நீங்களும் கைகொடுக்க விரும்பினால் அவரை தொடர்பு கொள்ளலாம். : 0752281398
- Vidivelli