(ஏ.ஆர்.ஏ.பரீல்)
சுகாதார அமைச்சு மற்றும் புத்தசாசன, மதவிவகார அமைச்சு வெளியிட்டுள்ள சுற்று நிருபங்கள், கொவிட் 19 வழிகாட்டல்களுக்கு அமைவாகவே பள்ளிவாசல்களில் கூட்டுத்தொழுகைகள், கூட்டாக குர்ஆன் ஓதுதல், நிக்காஹ் வைபவங்கள் தடைசெய்யப்பட்டுள்ளன.
இது தொடர்பாக அனைத்து பள்ளிவாசல் நிர்வாகங்களுக்கும் அறிவிக்கப்பட்டுள்ளது. மீறும் பள்ளிவாசல் நிர்வாகங்களுக்கு எதிராக நடவடிக்கை எடுக்கப்படும் என வக்பு சபையின் தலைவர் சட்டத்தரணி சப்ரி ஹலீம்தீன் விடிவெள்ளிக்குத் தெரிவித்தார்.
அவர் தொடர்ந்தும் விபரிக்கையில் ‘இந்தக் கட்டுப்பாடுகள் பள்ளிவாசல்களுக்கு மாத்திரமல்ல, பன்சலைகளுக்கும், கோயில்களுக்கும், ஆலயங்களுக்கும் அமுலாகும்’. சிலர் இக்கட்டுப்பாடுகள் பள்ளிவாசல்களுக்கு மாத்திரம் தான் என பிரசாரம் செய்வதில் எந்த உண்மையுமில்லை. சுகாதார அமைச்சு வெளியிட்டுள்ள கொவிட் 19 வழிகாட்டல்கள் அடங்கிய PA/DDGPHS 11/3/ COVID/ 2020 Sub 6/4 எனும் இலக்க 30.09.2021 ஆம் திகதிய சுற்று நிருபத்தில் 26 ஆம் பிரிவில் இவ்விபரம் தெளிவாக குறிப்பிடப்பட்டுள்ளது. இதன் அடிப்படையிலே புத்தசாசன மற்றும் மதவிவகாரங்களுக்கான அமைச்சு பள்ளிவாசல்களில் ஒரே நேரத்தில் 25 பேர் கூட்டாக அல்லாது தனித்து சுகாதார வழிகாட்டல்களைப் பின்பற்றி தொழ முடியும்என சுற்றுநிருபம் வெளியிடப்பட்டுள்ளது.
இதன் அடிப்படையில் மறு அறிவித்தல் விடுக்கப்படும் வரை பள்ளிவாசல்களில் ஜும்ஆ தொழுகை, ஜமா அத்தாக ஐவேளை தொழுகை, குர்ஆன் மஜ்லிஸ்,நிக்காஹ் மஜ்லிஸ் மற்றும் ஜனாஸா தொழுகைகள் இடம் பெறமுடியாது.
ஏற்கனவே பள்ளிவாசல்களுக்கு வழங்கப்பட்டுள்ள வழிகாட்டல்களும் அமுலில் இருக்கும். அதாவது பள்ளிவாசல்களில் வுழுசெய்யும் பகுதி மூடப்பட்டிருக்கவேண்டும். தொழுகைக்காக வருபவர்கள் தொழுகை விரிப்பு எடுத்துவரல் வேண்டும். ஒரு மீற்றர் சமூக இடைவெளி பேணப்படவேண்டும். மாஸ்க் அணிந்திருக்க வேண்டும்.
வக்பு சபையின் உத்தரவுக்கமைய இது தொடர்பில் முஸ்லிம் சமய பண்பாட்டலுவல்கள் திணைக்களம் அனைத்து பள்ளிவாசல் நிர்வாகங்களுக்கும் சுற்று நிருபமொன்றினை அனுப்பி வைத்துள்ளது. சுற்று நிருபத்தை நிர்வாகங்கள் கண்டிப்பாக பின்பற்றவேண்டும்.
சமூகத்தையும், நாட்டையும், நாட்டு மக்களையும் கொவிட் 19 இலிருந்து பாதுகாப்பதற்கு முஸ்லிம்கள் ஒத்துழைக்க வேண்டும் என்றும் அவர் கூறினார்.- Vidivelli