காதி நீதிமன்ற கட்டமைப்பை இல்லாதொழிக்கும் அமைச்சரவை தீர்மானத்தை மறுபரிசீலிக்க கோரிக்கை
காதிநீதிபதிகள் போரம், சிவில் சமூக அமைப்புகள் பாராளுமன்ற உறுப்பினர்களை சந்தித்து பேச்சு
(ஏ.ஆர்.ஏ.பரீல்)
காதி நீதிமன்ற கட்டமைப்பை இல்லாதொழிக்கும் அமைச்சரவை தீர்மானத்தை எதிர்த்து காதி நீதிபதிகள் போரம், சிவில் சமூக அமைப்புகள் மற்றும் உலமாக்கள் முஸ்லிம் பாராளுமன்ற உறுப்பினர்களுடன் பேச்சுவார்த்தைகளை நடத்தி வருகின்றனர்.
காதி நீதிபதிகள் போரம் அண்மையில் ஸ்ரீலங்கா முஸ்லிம் காங்கிரஸ் தலைவரும், பாராளுமன்ற உறுப்பினருமான ரவூப் ஹக்கீமை அவரது காரியாலயத்தில் சந்தித்து பேச்சு வார்த்தை நடத்தியது. 20ஆவது திருத்தத்திற்கு ஆதரவு வழங்கி வாக்களித்த ஸ்ரீ லங்கா முஸ்லிம் காங்கிரஸின் பாராளுமன்ற உறுப்பினர்களின் ஒத்துழைப்பினை இவ்விவகாரத்தில் பெற்றுக்கொள்வதென பேச்சுவார்த்தையின்போது தீர்மானிக்கப்பட்டது.
காதிநீதிமன்ற கட்டமைப்பை பாதுகாப்பதற்கு ஸ்ரீ லங்கா முஸ்லிம் காங்கிரஸ் தனது முழு ஆதரவினையும் வழங்கும் என அதன் தலைவர் பாராளுமன்ற உறுப்பினர் ரவூப் ஹக்கீம் தெரிவித்தார்.
அத்தோடு காதிநீதிபதிகள் போரத்தின் உபதலைவர் இப்ஹாம் யெஹ்யாவின் தலைமையிலான காதிநீதிபதிகள் குழுவினர் பாராளுமன்ற உறுப்பினர் முஜிபுர் ரஹ்மானையும் அவரது காரியாலயத்தில் சந்தித்து கலந்துரையாடினார்கள்.
முஸ்லிம் விவாக, விவாகரத்து சட்டம் தொடர்பான தெளிவுகளை எதிர்கட்சித் தலைவர் சஜித் பிரேமதாச, தமிழ் தேசிய கூட்டமைப்பின் பாராளுமன்ற உறுப்பினர் ஏம்.ஏ. சுமந்திரன் மற்றும் மக்கள் விடுதலை முன்னணியின் தலைவர் அநுரகுமார திசாநாயக்க ஆகியோருக்கு வழங்கி அவர்களது ஒத்துழைப்புகளைப் பெற்றுக்கொள்ளுமாறு பாராளுமன்ற உறுப்பினர் முஜிபுர் ரஹ்மான் காதிநீதிபதிகள் போரத்தின் பிரதிநிதிகளை வேண்டிக் கொண்டார்.
தற்போது சட்டவரைபு திணைக்களத்துக்கு அனுப்பி வைக்கப்பட்டிருக்கும் காதிநீதிமன்ற கட்டமைப்பை இல்லாமற் செய்யும் சட்டமூலம் பாராளுமன்றுக்கு சமர்ப்பிக்கப்படுவதற்கு முன்பே அதனை அமைச்சரவை மீளப்பெற்-றுக்கொள்ளும் வகையிலான அழுத்தங்களை முன்னெடுக்குமாறும் அவர் ஆலோசனை வழங்கினார்.
அகில இலங்கை ஜம்மிய்யத்துல் உலமா சபையும் சூம் தொழிநுட்பம் ஊடாக நீதியமைச்சர் அலிசப்ரியுடன் கூட்டமொன்றினை நடாத்தி தனது நிலைபாட்டினை தெளிவுபபத்தியுள்ளது. இந்நிகழ்வில் சுமார் 60 உலமாக்கள் கலந்து கொண்டனர்.
காதிநீதிபதிகள் போரமும் முஸ்லிம் சிவில் சமூக அமைப்புகளும் அமைச்சரவையின் அமைச்சர்களை சந்தித்து காதிநீதிமன்ற கட்டமைப்பின் அவசியம் பற்றி தெளிவுபடுத்தும் ஏற்பாடுகளை மேற்கொண்டுள்ளன.-Vidivelli