காதி நீதிமன்ற முறையை இல்லாதொழிப்பது தொடர்பில் அமைச்சரவை எடுத்துள்ள தீர்மானம் பலத்த சர்ச்சையை தோற்றுவித்துள்ளது. இது தொடர்பில் சூடான வாதப்பிரதிவாதங்கள் சமூகத்தில் மேலெழுந்துள்ளன. சமூக வலைத்தளங்களில் இது தொடர்பில் இரு கருத்துகளுக்கு ஆதரவானவர்களும் பல்வேறு கருத்துக்களை முன்வைத்து தமக்குள் முரண்பட்டுக் கொள்வதை காணமுடிகிறது. நவீன தொழில்நுட்பங்களை பயன்படுத்தி இது தொடர்பில் ஏராளமான கூட்டங்களும் கலந்துரையாடல்களும் நடந்து வருகின்றன.
1950ஆம் ஆண்டுக்குப் பின்னர் முஸ்லிம் தனியார் சட்டம் திருத்தப்படாதுள்ள நிலையில் அதில் பல்வேறு குறைபாடுகள் உள்ளதாக பல தசாப்தங்களாக சுட்டிக்காட்டப்படுகின்றமை உண்மையே. இதனால்தான் 2009 ஆம் ஆண்டு அப்போதைய நீதி அமைச்சர் மிலிந்த மொரகொடவினால் நீதியரசர் சலீம் மர்சூப் தலைமையில் ஒரு குழு நியமிக்கப்பட்டது. இக்குழு பல்வேறு இழுபறிகளுக்குப் பின்னர் 2018ஆம் ஆண்டு சுமார் ஒன்பது வருடங்களின் பின்னர் தனது அறிக்கையை அப்போதைய நீதியமைச்சர் தளதா அத்துகோரளவிடம் கையளித்தது. இருந்த போதிலும் இக் குழுவில் அங்கம் வகித்த மற்றொரு சாரார் ரிஸ்வி முப்தி தலைமையில் வேறொரு அறிக்கையை நீதியமைச்சரிடம் கையளித்ததன் காரணமாக அதனை அப்போதைய அரசாங்கம் நடைமுறைப்படுத்துவதில் பாரிய சிக்கல்கள் எழுந்தன.
உலமா சபையினர் அன்றே விட்டுக் கொடுப்புடன் நடந்திருப்பின் இன்று இந்த விவகாரம் இவ்வளவு தூரம் இழுபறிப்பட்டிராது. அன்று சிறிய சிறிய விடயங்களுக்காக சண்டை பிடித்ததன் காரணமாக இன்று ஒட்டுமொத்த காதி நீதிமன்ற கட்டமைப்பையே பறிகொடுக்க வேண்டிய நிலை ஏற்பட்டுள்ளது என்பதையும் இந்த இடத்தில் சுட்டிக்காட்ட விரும்புகிறோம்.
இந்நிலையில்தான் தற்பொழுது ஆளும் பொதுஜன பெரமுன அரசாங்கத்தின் அமைச்சரவை காதி நீதிமன்ற முறையை முற்றாக இல்லாதொழிப்பதற்கும் பலதாரமணத்தை இலங்கையில் தடை செய்வதற்கும் தீர்மானத்திருப்பதாக அறிவித்துள்ளது. இது தொடர்பில் நீதி அமைச்சர் அலி சப்ரி அமைச்சரவையின் நிலைப்பாட்டுக்கு சார்பாக நின்று தெரிவித்து வரும் கருத்துக்கள் முஸ்லிம் சமூகத்தை கவலையில் ஆழ்த்தியுள்ளன. “அமைச்சரவையின் தீர்மானத்தை என்னால் எதிர்க்க முடியாது. நான் மாத்திரமே அமைச்சரவையில் அங்கம் வகிக்கும் ஒரே முஸ்லிம்” என அவர் பல இடங்களில் கூறிவருகிறார்.
உண்மையில் அமைச்சரவை நியாயமான ஆய்வுகளின் பின்னர் இந்தத் தீர்மானத்திற்கு வந்திருப்பின் அது பற்றி சிந்திக்க முடியும். எனினும் அமைச்சரவையில் இருக்கின்ற பெரும்பான்மையானோர் முஸ்லிமல்லாதவர்கள் என்ற வகையில் அவர்கள் இந்த விடயத்தை எவ்வாறு விளங்கிக் கொண்டு இந்த பாரதூரமான தீர்மானத்திற்கு வந்திருக்கிறார்கள் என்ற கேள்வி எழுகிறது. சில சிங்கள தொலைக்காட்சிகளில் வெளியிடப்பட்ட காதி நீதிமன்றம் தொடர்பான தவறான பிரசாரங்களை அடிப்படையாகக் கொண்டே அமைச்சரவையில் உள்ள பெரும்பாலான அமைச்சர்கள் இந்த தீர்மானத்துக்கு வந்திருப்பார்கள் என்பதை அனுமானிக்க முடிகிறது.
உண்மையில் தற்போதைய அரசாங்கம் இந்த விவகாரத்தில் முஸ்லிம்களை தமக்கிடையே மோதவிட்டு வேடிக்கை பார்ப்பதாகவே தெரிகிறது. இதில் அரசாங்கத்தின் நோக்கங்கள் எவ்வாறிருப்பினும் முஸ்லிம் சமூகம் மிக நிதானமாகவே அணுக வேண்டியுள்ளது. கடந்த பல தசாப்தங்களாக சர்ச்சைக்குள்ளான இந்த விடயத்தில் சம்பந்தப்பட்ட தரப்புகள் விட்டுக் கொடுப்பதன் மூலமே ஒரு இணக்கப்பாட்டை எட்ட முடியும். மாறாக தொடர்ந்து முரண்பட்டுக் கொள்வது சமூகத்தை மென்மேலும் பிளவுபடுத்தவும் பலவீனப்படுத்தவுமே வழிவகுக்கும்.
‘ஒரே நாடு ஒரே சட்டம்’ என்ற கோஷம் தேர்தல் பிரசாரத்திற்கு பொருத்தமானதாக உள்ளபோதிலும் அது நடைமுறைக்கு சாத்தியமற்றதாகும். இலங்கை பல இனங்களை, மதங்களைப் பின்பற்றுகின்ற, பல மொழிகளைப் பேசுகின்ற மக்கள் வாழ்கின்ற நாடு என்றவகையில் அவர்களை அவர்களது தனித்துவமான சட்டங்கள் மூலம் ஆள்வதே பொருத்தமானதாகும். அனைவரையும் ஒரே சட்டத்தின் கீழ் கொண்டு வருவது என்பது பெரும் சவாலை உண்டுபண்ணும். எனவேதான் இந்த விடயத்தில் அரசாங்கம் மிகவும் பொறுப்புடன் நடந்து கொள்கின்ற அதேநேரம் முஸ்லிம்கள் தரப்பில் இதனை மென்மேலும் ஒரு பிரச்சினையாக பூதாகரப்படுத்திக் கொண்டிராது அவசரமாக ஒரு முடிவுக்கு வரவேண்டியது அவசியமாகும்.
குறிப்பாக நீதி அமைச்சர் அலி சப்ரி அவர்கள் இந்த விடயத்தில் முஸ்லிம் சமூகத்தில் தற்போது எழுந்துள்ள பல்வேறு அபிப்பிராயங்களையும் சமூகத்தின் அபிலாசைகளையும் கவனத்தில் கொண்டு ஒரு சிறந்த ஒரு தீர்மானத்தை எட்ட வேண்டியது காலத்தின் தேவையாகும். காதி நீதிமன்றக் கட்டமைப்பை ஒழிக்காது, அதிலுள்ள குறைபாடுகளை நிவர்த்தி செய்வதே பொருத்தமானதொரு தீர்வாக அமையும். எனவேதான் அமைச்சரவை தனது தீர்மானத்தை மீள்பரிசீலனை செய்ய வேண்டும். இதனை ஒரு அரசியல் விவகாரமாக மாற்றாது முஸ்லிம் சமூகத்தின் நலன்சார்ந்த விவகாரமாக அணுக வேண்டியதே சம்பந்தப்பட்ட சகல தரப்பினரதும் கடப்பாடாகும் என்பதையும் வலியுறுத்த விரும்புகிறோம்.-Vidivelli