– யாழ் அஸீம் –
“பொங்கு கலை கடலில் மூழ்கி முத்துக் குளித்தீர்
பூபாளம் கீழ்த்திசையும் வெளுக்க உமது
சங்கொலியில் கேட்குதம்மா ! அகதி வாழ்வில்
சருகாக அலைந்தாலும் துயரம் மாறி
திங்களினைக் கண்ட அல்லி போலச் சிரித்து
தெளிந்த நீரைத் தேடும் மான் கூட்டமானீர்!
தங்கத்தாய் மண்ணுமது நினைவுத் தடத்தில்
தொடர்ந்து வீச்சில் பயணிக்க நீவிர் வாழ்க!..
கலாசார அலுவல்கள் திணைக்களத்தின் நிகழ்ச்சித் திட்டத்துக்கு அமைவாக, யாழ்ப்பாணப் பிரதேசத்தின் கலை மேம்பாட்டுக்கு அரும்பணியாற்றிய மறைந்த கலைஞர், எழுத்தாளர், ஊடகவியலாளர் மீரா லெப்பை லாபீர் அவர்களின் கலைச்சேவையைப் பாராட்டி “கலைக்குரிசில்” விருது வழங்கி கௌரவித்து வழங்கிய வாழ்த்துப் பாமாலையின் ஒரு பகுதியே மேலுள்ள மகுட வாசகங்களாகும்.
கடந்த 23.08. 2021 அன்று எம்மை விட்டும் பிரிந்த எழுத்தாளர், ஊடகவியலாளர், சமூக சேவையாளர், நல்லிணக்கச் செயற்பாட்டாளர், கலாபூஷணம் மீரா லெப்பை லாபீர் அவர்களின் இழப்பு ஈடுசெய்ய முடியாததாகும். கலைப் பணியோடு சமூகப் பணியையும் இரு கண்களாக போற்றிச் சேவையாற்றிய ஒரு நல்ல மனிதனை யாழ் மண் இழந்து நிற்கிறது.
யாழ்ப்பாணம் ஐந்து சந்தியில் அமைந்திருந்த பிலவ்ஸ் ஹோட்டளையும், பிளவ்ஸ் கிரீம் ஹவுஸையும் அறியாத யாழ் மக்கள் எவரும் இருக்க மாட்டார்கள். பிளவ்ஸ் ஹோட்டளை லாபிர் அவர்களுடைய தந்தை அல்ஹாஜ் மீராலெப்பை அவர்களும், பிளவ்ஸ் கிறீம் ஹவுஸை லாபிர் அவர்களும் சிறப்பாக நடாத்தி வந்தனர். இதன் காரணமாக எழுத்தாளர் லாபிர் அவர்களை பிளவ்ஸ் லாபிர் என்றே யாழ் மக்கள் அன்புடன் அழைத்து வந்தனர்.
அல்ஹாஜ் ஸாஹிப் மரைக்கார், மீரா லெப்பை ஆயிஷா தம்பதிகளின் தவப் புதல்வனாக 01. 04.1949 இல் பிறந்த லாபீர், தனது ஆரம்பக் கல்வியை யாழ் மஸ்ற உத்தீன் பாடசாலையிலும், பின்னர் க.பொ.த உயர்தரம் வரை வைத்தீஸ்வரக் கல்லூரியிலும், உயர் வணிகக் கல்வியை கொக்குவில் தொழில் நுட்பக் கல்லூரியிலும் கற்றார்.
லாபீர் வர்த்தகத் துறையில் ஈடுபட்டாலும், இளம் வயதிலிருந்தே கலைத்துறையிலும் நாட்டம் கொண்டவராக செயற்பட்டார். 1972ஆம் ஆண்டு “ஒளி” என்னும் சஞ்சிகையை வெளியிட்டு நீண்ட காலமாக நடாத்தி வந்தார். கலை நிகழ்ச்சிகள், நாடகங்களின் அமைப்பாளராகவும், செயற்பாட்டு கலை இலக்கியத் துறையில் நீண்ட காலம் சேவையாற்றினார். சமூகப் பற்றுடன் சமூக முன்னேற்றத்தையும் இலக்காகக் கொண்டு செயற்பட்ட லாபீர் அவர்கள் கொழும்பில் இருந்து வெளிவந்த “பாமிஸ்” சஞ்சிகையை பொதுமக்களுக்கு அறிமுகப்படுத்தி விழிப்புணர்ச்சியை ஏற்படுத்த முயன்றார். இதன் காரணமாக அவர் பல பிரச்சினைகளையும் எதிர்நோக்க நேரிட்டது.
1990ஆம் ஆண்டு ஒக்டோபர் மாத இறுதியில் வட மாகாணத்திலிருந்து முஸ்லிம்கள் வெளியேற்றப்பட்ட வேளை மாவனல்லைக்கு இடம்பெயர்ந்து பல வருடங்கள் அங்கு வாழ்ந்து வந்தார். மாவனல்லை சாஹிராக் கல்லூரி, ஆயிஷா சித்திக்கா பதுரியாக் கல்லூரி நிகழ்வுகளையும் அங்குள்ள கலை நிகழ்ச்சிகளையும் பத்திரிகைகளுக்கு அனுப்பி இடம்பெயர்ந்த வேளையிலும் ஊடகப் பணி புரிந்தார்.
வடமாகாண முஸ்லிம்கள் மீண்டும் தம் சொந்த மண்ணுக்கு மீளகுடியேறக் கூடிய சூழ்நிலை ஏற்பட்டபோது, ஆரம்ப கட்டத்திலேயே தாயக மண்ணுக்கு மீண்டும் குடியேறினார். லாபிர் அவா;கள் சிறந்ததொரு ஊடகவியலாளர், எழுத்தாளர் என்பதையும் தாண்டி சிறந்த முறையில் உபசரிக்கும் பண்பினைக் கொண்டவர். செய்தி சேகரிப்புக்காகவும் கலை நிகழ்வுகளுக்காகவும் யாழ் செல்லும் எழுத்தாளர்கள், ஊடகவியலாளர்கள், கலைஞர்களில் லாபிர் அவர்களின் உதவியையும் ஒத்துழைப்பையும் பெறாதவர்கள் குறைவு எனக் கூறலாம். அவர்கள் யாரையும் முக்கியமான இடங்களுக்கு அழைத்துச் செல்வதுடன் தேவையான தகவல்களைத் தொகுப்பதற்குப் பொருத்தமான நபர்களை அடையாளம் காட்டி உதவுவதை அவருடைய முக்கிய பணியாகக் கொண்டிருந்தார்.
மேலும் லாபிர் அவர்கள் யாழ் மண்ணிலுள்ள இலக்கியம் சார் அமைப்புகளுடனும் இனங்கள், மதங்களுக்கான இடையிலான நல்லிணக்கத்தை ஏற்படுத்தும் சர்வோதயா இயக்கம் போன்ற அமைப்புகளுடனும் நல்லுறவை ஏற்படுத்தி அதற்காக கடுமையான உழைப்பை மேற்கொண்டார். வடக்கிலிருந்து முஸ்லிம்கள் வெளியேற்றப்பட்ட பின் ஏற்பட்ட கசப்புணர்வை மாற்றி தமிழ், முஸ்லிம் உறவை மீளக் கட்டியெழுப்பியதில் லாபிர் அவர்களுடைய பங்களிப்பு போற்றத்தக்கதாகும். அத்துடன் அவருடைய தந்தையின் பெயரால் பிளவ்ஸ் ஹாஜியார் பவுண்டேஷன் எனும் அமைப்பை உருவாக்கி பல சமூகப்பணிகளை ஆற்றி வந்தார். வறிய மாணவா;களுக்கான நிதியுதவி, விதவைகளுக்கான நிதியுதவி, இடர் காலங்களில் உலர் உணவு வழங்குதல், வைத்திய முகாம்களை ஏற்பாடு செய்தல், உயர்கல்விக்கான நிதி உதவி போன்ற பல சமூக நலத் திட்டங்களை நிறைவேற்றுவதில் முன்னின்று உழைத்தார்.
யாழ் மானிப்பாய் வீதி முஹதீன் ஜும்மாப் பள்ளிவாசலின் நம்பிக்கையாளர் சபையின் தலைவராக சேவையாற்றியதுடன், யாழ்/கிளிநொச்சி முஸ்லிம் சம்மேளனத்தின் உப செயலாளராகவும் செயற்பட்டார். யாழ் ஒஸ்மானியா கல்லூரியில் அஹதிய்யா பாடசாலையை ஆரம்பித்த ஸ்தாபர்களில் ஒருவராக இருப்பதுடன் அகில இலங்கை முஸ்லிம் வாலிப சம்மேளனத்தின் யாழ் மாவட்ட அமைப்பாளராகவும் செயற்பட்டு வந்துள்ளார்.
விடிவெள்ளி பத்திரிகையின் ஆரம்ப காலத்திலிருந்தே செய்தியாளராகக் கடமையாற்றிய லாபிர் அவர்கள் இப்பத்திரிகையுடன் நெருக்கமான தொடர்பை கொண்டிருந்தார். குறிப்பாக யாழ். மண்ணில் விடிவெள்ளி பத்திரிகையின் விற்பனையை விஸ்தரிப்பதிலும் புதிய வாசகர்களை உருவாக்குவதிலும் அவர் அதிக ஈடுபாடு கொண்டிருந்தார். யாழ்ப்பாணத்தில் மீளக்குடியேறி வாழும் முஸ்லிம்களின் பிரச்சினைகளை தொடர்ந்தும் செய்திகளாக வெளியிடுவதில் அவர் அக்கறையுடன் செயற்பட்டார். மேலும் நவமணி, வீரகேசரி, தினமுரசு, தமிழ் மிரர், எங்கள் தேசம் என்பவற்றின் செய்தியாளராகவும் கடமையாற்றிய லாபிர் அவர்கள் ஸ்ரீலங்கா முஸ்லிம் மீடியா போரத்தின் யாழ் மாவட்ட இணைப்பாளராக பல வருடங்கள் சேவையாற்றியமை குறிப்பிடத்தக்கதாகும்.
அன்னாரது கலை, இலக்கியப் பணிகளுக்காக 2013ஆம் ஆண்டு கலாசார அலுவல்கள் திணைக்களத்தால் “கலாபூஷணம்” பட்டம் வழங்கி கௌரவிக்கப்பட்டார். தெலுங்கு காங்கிரஸ் அமைப்பின் மூலமாக “தேசகீர்த்தி”, மலையக கலை கலாசார சங்கத்தால் “தேசசக்தி”, அகில இன நல்லுறவு ஒன்றியத்தால் “தேசகீர்த்தி”, கண்டி இரத்தின தீபம் அமைப்பால் “ஊடகச் சுடர்”, யாழ் கொட்டடி சனசமூக நிலையத்தால் “நிழல் படத் தாரகை” ஆகிய கௌரவ விருதுகளைப் பெற்ற லாபிர் அவர்களுக்கு யாழ் கலாசார அலுவல்கள் திணைக்களத்தால் “கலைக்குரிசில்” விருது வழங்கப்பட்டது. பட்டங்கள், விருதுகள் பல பெற்றப்போதும் ஆரவாரமின்றி அமைதியுடனும் தன்னடக்கத்துடனும் கருமமாற்றும் அவரது தன்மை காரணமாகவே லாபிர் அவர்கள் எம் நெஞ்சில் நிறைந்து நிற்கிறார்.
லாபீர் அவர்களின் கலை, இலக்கிய, சமூகப் பணிகளுக்கு உற்ற துணையாகவிருந்த அவரது மனைவி ரலீனா மற்றும் பிள்ளைகளான ரவ்ஸானா, ராஜிதா, சன்ஹார் ஆகியோருக்கும் அவரது குடும்பத்தாருக்கும் அல்லாஹ் பொறுமையையும் மன உறுதியையும் வழங்குவானாக!
மேலும் அன்னாருடைய இலக்கிய சமூகப் பணிகளைப் பொருந்திக் கொள்வதுடன் அவருடைய பாவங்களை மன்னித்து மேலான பிர்தௌஸ் என்னும் சுவனத்தை வழங்குவானாக!- Vidivelli