அசாத் சாலியின் உடல் நிலை பாதிப்பு ஆபத்து நேர்ந்தால் சி.ஐ.டி.யே பொறுப்பு
சி.ஐ.டி.பிரதானி, பணிப்பாளர், பொறுப்பதிகாரிக்கு சட்டத்தரணி கடிதம்
(எம்.எப்.எம்.பஸீர்)
மேல் மாகாண முன்னாள் ஆளுநர் அசாத் சாலியின் உடல் நிலை பாதிக்கப்பட்டுள்ளதாகவும், தடுப்புக் காவலில் உள்ள அவருக்கு உடனடியாக உரிய சிகிச்சைகள் வழங்கப்படாது ஏதும் பாதிப்புக்கள் ஏற்படுமாக இருப்பின் அதற்கு சி.ஐ.டி.யினரே பொறுப்புக் கூற வேண்டும் என அவரது சட்டத்தரணி கௌரி சங்கரி தவராசா அறிவித்துள்ளார். சி.ஐ.டி.யின் பிரதானி பிரதிப் பொலிஸ் மா அதிபர் பிரசாத் ரணசிங்க, பணிப்பாளர் சிரேஷ்ட பொலிஸ் அத்தியட்சர் ரொஹான் பிரேமரத்ன மற்றும் பொறுப்பதிகாரி ஜயந்த பயாகல ஆகியோருக்கு விஷேட கடிதம் ஊடாக சிரேஷ்ட சட்டத்தரணி கௌரி சங்கரி தவராசா இதனை அறிவித்துள்ளார்.
தடுப்புக் காவலில் உள்ள அசாத் சாலியின், மனைவியின் அறிவுறுத்தலுக்கு அமைய, சிரேஷ்ட சட்டத்தரணி கௌரி சங்கரி தவராசா இந்த கடிதத்தை அனுப்பி வைத்துள்ளார்.
உயிர்த்த ஞாயிறு தாக்குதல்கள் குறித்த விசாரணைகளுக்காக அசாத் சாலி கைது செய்யப்ப்ட்டு தடுத்து வைக்கப்பட்டுள்ள நிலையில் அவரது கைது மற்றும் தடுத்து வைப்புக்கு எதிராக உயர் நீதிமன்றில் கடந்த ஏப்ரல் 5 ஆம் திகதி அடிப்படை உரிமை மீறல் மனுவொன்று அசாத் சாலி சார்பில் தாக்கல் செய்யப்பட்டுள்ளது.
இவ்வாறான பின்னணியில் மேலதிக விசாரணைக்காக குற்றப் புலனாய்வு திணைக்களத்தினர் 2021 ஆம் ஆண்டு மார்ச் மாதம் 19ம் திகதி பாதுகாப்பு அமைச்சரான ஜனாதிபதியிடம் பயங்கரவாதத் தடைச் சட்டத்தின் 9(1) பிரிவின் கீழ் தடுப்புக் காவல் உத்தரவைப் பெற்று குற்றப் புலனாய்வு திணைக்களத்தில் அசாத் சாலியை தடுத்து வைத்து விசாரணைக்கு உட்படுத்தியுள்ளதாகவும் மனுவில் குறிப்பிடப்பட்டுள்ளது.
அரசியலமைப்பின் உறுப்புரைகளை மீறுவதாக அசாத் சாலியின் கைது அமைந்துள்ள நிலையில், பாதுகாப்பு அமைச்சரின் தடுப்புக் காவல் உத்தரவு சட்டவலுவற்றதென தீர்ப்பறிவிக்குமாறும் இடைக்கால தடை உத்தரவு வழங்கி கைதியான அசாத் சாலியை விடுதலை செய்யும்படியும் இம்மனு ஊடாக கோரப்பட்டுள்ளது.
இவ்வாறான பின்னணியிலேயே குறித்த மனுவின் பிரதிவாதிகள் மூவருக்கு, அசாத் சாலிக்கு உரிய சிகிச்சையளிக்காது அவருக்கு ஏதும் பாதிப்பு ஏற்பட்டால் சி.ஐ.டி.யே பொறுப்புக் கூற வேண்டும் என்ற அவசர கடிதம் அனுப்பப்பட்டுள்ளது.- Vidivelli