நோன்புப் பெருநாள் நடவடிக்கைகளால் புதிய கொத்தணிக்கு இடமளிக்காதீர்
சுகாதார வழிகாட்டல்களை கண்டிப்பாக பின்பற்ற வலியுறுத்துகிறது வக்பு சபை
(ஏ.ஆர்.ஏ.பரீல்)
‘‘நாட்டில் கொவிட் -19 வைரஸ் தீவிரமடைந்துள்ள நிலையில் அரசும், கொவிட் செயலணியும் வைரஸ் பரவலைத் தடுப்பதற்காக பல்வேறு நடவடிக்கைகளை முன்னெடுத்துள்ளது. பள்ளிவாசல்களுக்கும், தொழுகைகளுக்கும், ரமழான் அமல்களுக்கும் கட்டுப்பாடுகள் விதிக்கப்பட்டுள்ளன. முஸ்லிம்கள் சுகாதார அமைச்சு வழங்கியுள்ள வழிகாட்டல்களைப் பின்பற்றத் தவறினால் முஸ்லிம்களால் கொவிட் 19 ரமழான் கொத்தணி உருவானதாக குற்றம் சுமத்தும் வாய்ப்பு உள்ளது’’ என வக்பு சபையின் தலைவர் சட்டத்தரணி சப்ரி ஹலீம்தீன் தெரிவித்தார்.
கொவிட் -19 வைரஸ் தொற்று நோய் தீவிரமடைந்து வருவது தொடர்பில் அவர் தொடர்ந்தும் கருத்துத் தெரிவிக்கையில், புனித ரமழான் மாதம் இன்னும் ஒரு வாரகாலத்தில் நிறைவுற இருக்கிறது.நோன்புப் பெருநாளையும் நாம் எதிர்நோக்கியிருக்கிறோம். இச்சந்தர்ப்பத்தில் முஸ்லிம்களின் செயற்பாடுகள் கண்டிப்பாக கொவிட் 19 வழிகாட்டல்களுக்கு உட்பட்டதாக அமைய வேண்டும்.
முஸ்லிம்கள் நாட்டின் சட்டத்துக்கு கட்டாயமாக அடிபணியவேண்டும் .சுகாதார அமைச்சு விடுத்துள்ள நிபந்தனைகள், கூட்டுத்தொழுகைக்கான தடைகள் எமது சமூகத்தையும், நாட்டு மக்களையும் கொவிட் -19 தொற்றிலிருந்து பாதுகாப்பதற்கே என்பதை நாம் ஒவ்வொருவரும் உணர்ந்து கொள்ள வேண்டும்.
பள்ளிவாசல்களுக்கும், தொழுகைகளுக்கும் விதிக்கப்பட்டுள்ள நிபந்தனைகளும் கட்டுப்பாடுகளும் வக்புசபையினால் மேற்கொள்ளப்பட்ட தீர்மானமல்ல, சுகாதார அமைச்சினால் எமது நலன்கருதி மேற்கொள்ளப்பட்ட தீர்மானமாகும். இஸ்லாம் நாம் நாட்டின் சட்டங்களுக்கு அடிபணிய வேண்டும் என்றே போதித்துள்ளது. நாட்டின் சட்டங்களுக்கும் நிபந்தனைகளுக்கும் அணிபணிந்து நாம் உண்மையான முஸ்லிம்கள் என்பதை நிரூபிக்க வேண்டும்.
நோன்புப் பெருநாள் தினத்திலோ அதற்கு முன்போ நாம் கொவிட்-19 வழிகாட்டல்களை, சுகாதார சேவைகள் பணிப்பாளர் நாயகத்தின் சுற்றுநிருபத்தை மீறிச் செயற்பட்டால் நாம் ரமழான் கொத்தணியை உருவாக்கிவிட்டதாக குற்றம் சுமந்துவார்கள். இதற்காக ஒரு தரப்பினர் காத்திருக்கிறார்கள்.
தற்போது நாட்டில் கொவிட் 19 தொற்று தீவிரமடைந்துள்ளது. பாடசாலைகள், பல்கலைக்கழகங்கள், திரையரங்குகள் மற்றும் பல அரசாங்க நிறுவனங்கள் மூடப்பட்டுள்ளன. போக்குவரத்துச் சேவைகள் மட்டுப்படுத்தப்பட்டுள்ளன. இவ்வாறு அரசாங்கம் முன்னெச்சரிக்கையாக தீர்மானங்களை மேற்கொண்டுள்ளது. இவ்வாறான நிலையில் முஸ்லிம்கள் தமது செயற்பாடுகளில் விழிப்பாக இருக்கவேண்டும். சுகாதார அமைச்சின் வழிகாட்டல்களையும் நிபந்தனைகளையும் எச்சந்தர்ப்பத்திலும் மீறக்கூடாது என்றார்.- Vidivelli