முஸ்லிம் சமய பண்பாட்டலுவல்கள் திணைக்களம் இயங்கி வரும் 9 மாடிக்கட்டிடத்துக்கு புத்தசாசன சமய விவகாரங்கள் மற்றும் கலாசார அமைச்சும் அதன் கீழுள்ள திணைக்களங்கள் மற்றும் நிறுவனங்களும் இடமாற்றம் செய்யப்படவுள்ளன.இவ்வாரம் நடைபெற்ற அமைச்சரவைக் கூட்டத்தின்போது இதற்கான அங்கீகாரத்தை அமைச்சரவை வழங்கியுள்ளது.
தற்போது புத்தசாசன, சமய மற்றும் கலாசார விவகாரங்கள் அமைச்சு மற்றும் அதன் கீழுள்ள திணைக்களங்கள், நிறுவனங்கள் என்பன பல இடங்களில் இயங்கி வருகின்றன. அதனால் அமைச்சு மற்றும் குறிப்பிட்ட திணைக்களங்கள், நிறுவனங்களை ஒரு கட்டிடத்தில் நிர்மாணிப்பதற்கான தேவை எழுந்துள்ளது. அதற்காக கொழும்பு 10, டீ.ஆர். விஜயவர்தன மாவத்தையில் முஸ்லிம் சமய பண்பாட்டலுவல்கள் திணைக்களத்திற்காக தற்போது நிர்மாணிக்கப்பட்டுவரும் 9 மாடிகளைக் கொண்ட கட்டிடம் பொருத்தமானதென அடையாளங் காணப்பட்டுள்ளது.
அதற்கமைய குறித்த கட்டிடம் மற்றும் குறித்த காணியை புத்தசாசன, சமய மற்றும் கலாசார விவகாரங்கள் அமைச்சுக்குப் பெற்றுக் கொள்வதற்கும் புத்தசாசன, சமய மற்றும் கலாசார விவகாரங்கள் அமைச்சு மற்றும் அதன் கீழுள்ள நிறுவனங்களையும் குறித்த கட்டிடத்தில் தாபிப்பதற்கும் பிரதமர் மஹிந்த ராஜபக் ஷ அமைச்சரவைப் பத்திரத்தைச் சமர்ப்பித்திருந்தமை குறிப்பிடத்தக்கது.
முஸ்லிம் சமய பண்பாட்டலுவல்கள் திணைக்களம் 2017 ஆம் ஆண்டு தற்போது இருக்கும் புதிய கட்டிடத்துக்கு இடமாற்றம் செய்யப்பட்டது. 9 மாடிகளைக்கொண்ட இக்கட்டிடத்தின் மூன்று மாடிகளை மாத்திரமே தற்போது முஸ்லிம் சமய பண்பாட்டலுவல்கள் திணைக்களம் பயன்படுத்தி வருகிறது. அத்தோடு ஏனைய 3 மாடிகளில் கேட்போர் கூடம் அமைந்துள்ளது. எஞ்சிய மூன்று மாடிகளின் நிர்மாணப் பணிகளே தற்போது நடைபெற்று வருகின்றன.- Vidivelli