தவ்ஹீத், ஜமாஅதே இஸ்லாமி உட்பட பல முஸ்லிம்
அமைப்புகளுக்கு தடை
உலமா சபையில் சூபி முஸ்லிம்களுக்கு இடமளிக்குக
மத்ரஸாக்களை கண்காணிக்குக
புர்காவுக்கும் தடை
உஸ்தாத் மன்சூரின் நூலை கட்டாயமாக்குக
ரிஷாத் பதியுதீன், அப்துர் ராஸிக், ஹஜ்ஜுல் அக்பர் குறித்து விசாரிக்குக
பொதுபல சேனாவை தடை செய்க
ஞானசார தேரருக்கு எதிராக வழக்கு தொடுக்குக
எம்.எப்.எம். பஸீர்
ஏ.ஆர்.ஏ. பரீல்
உயிர்த்த ஞாயிறு தாக்குதலை தடுத்து நிறுத்தத் தவறியமை தொடர்பில் முன்னாள் ஜனாதிபதி மைத்திரிபால சிறிசேன, முன்னாள் பொலிஸ் மாஅதிபர் பூஜித் ஜயசுந்தர, முன்னாள் பாதுகாப்பு செயலாளர் ஹேமசிறி பர்ணாந்து ஆகியோருக்கு எதிராக வழக்குத் தொடர்வதற்கான குற்றவியல் நடவடிக்கை குறித்து ஆராய சட்டமா அதிபரின் ஆலோசனைகளைப் பெற்றுக் கொள்ளும்படியும் உயிர்த்த ஞாயிறு தாக்குதல் தொடர்பான ஆணைக்குழுவின் அறிக்கையில் பரிந்துரைக்கப்பட்டுள்ளது.
2019 ஏப்ரல் மாதம் 21 ஆம் திகதி நடாத்தப்பட்ட உயிர்த்த ஞாயிறு தாக்குதல்கள் தொடர்பில் ஆராய்ந்த ஜனாதிபதி ஆணைக்குழு தனது அறிக்கையை கடந்த பெப்ரவரி 1 ஆம் திகதி ஜனாதிபதியிடம் கையளித்தது. எனினும் கடந்த மூன்று வாரங்களாக இவ்வறிக்கை பகிரங்கப்படுத்தப்படவில்லை. இதனையடுத்து அறிக்கையை பொது மக்களின் பார்வைக்கு வழங்குமாறு பாராளுமன்ற உறுப்பினர்கள், பேராயர் மல்கம் ரஞ்சித், ஞானசார தேரர் உட்பட பலரும் கோரிக்கைகளை முன்வைத்து வந்தனர். இந் நிலையிலேயே குறித்த அறிக்கையை ஜனாதிபதி செயலகம் கடந்த திங்கட்கிழமை சபாநாயகர் மஹிந்த யாப்பா அபேவர்தனவிடம் கையளித்தது. சபாநாயகர் இவ்வறிக்கையை பாராளுமன்ற நூலகத்தில் எம்.பி.க்களின் பார்வைக்காக வைக்குமாறு உத்தரவிட்டார். இதனையடுத்து இவ்வறிக்கையை எதிர்க்கட்சி பாராளுமன்ற உறுப்பினர்களான ஹரின் பெர்ணான்டோ மற்றும் நிரோஷன் பெரேரா ஆகியோர் உடனடியாக பார்வையிட்டனர். அதுமாத்திரமன்றி அறிக்கையில் உள்ளடங்கியுள்ள சில பக்கங்களை படம்பிடித்து ஹரீன் பெர்ணான்டோ எம்.பி. தனது டுவிட்டரில் பதிவிட்டார். இதனையடுத்தே அதன் உள்ளடக்கங்கள் வெளிவர ஆரம்பித்தன.
- இந்நிலையில் இவ்வறிக்கையில் சிபாரிசு செய்யப்பட்டுள்ள மேலும் பல விடயங்கள் ‘விடிவெள்ளி‘க்கு கிடைக்கப் பெற்றது. அவற்றை இங்கு தொகுத்து தருகிறோம்.
- முன்னாள் ஜனாதிபதி மைத்திரிபால சிறிசேன 2019 ஏப்ரல் 16ஆம் திகதி முதல் 22ஆம் திகதி வரை இந்தியாவுக்கும், சிங்கப்பூருக்கும் சென்ற சந்தர்ப்பத்தில் பாதுகாப்பு அமைச்சுப் பதவிக்கென எந்தவொரு பதில் நியமனமும் வழங்காமை மற்றும் தாக்குதல் தொடர்பில் அறிந்திருந்தும் அவ்வாறு சென்றமை காரணமாக அது சஹ்ரானின் ஐ.எஸ். தாக்குதலுக்கு வழிசமைத்தது. இது அரசியலமைப்புச் சட்டத்தை மீறியுள்ளமை தெளிவாகிறது.
அத்தோடு முன்னாள் பிரதமர் ரணில் விக்கிரமசிங்கவுக்கு எதிராகவும் குற்றப்பத்திரிகை தாக்கல் செய்யப்பட வேண்டும். முன்னாள் ஜனாதிபதியினால் முன்னாள் பிரதமர் ரணில் விக்கிரமசிங்க தேசிய பாதுகாப்பு கவுன்ஸில் கூட்டங்களுக்கு அழைக்கப்படாமை பெருங் குறைபாடாகும். - முன்னாள் ஜனாதிபதி மைத்திரிபால சிறிசேன, முன்னாள் பிரதமர் ரணில் விக்கிரமசிங்கவுக்கும் மேலதிகமாக முன்னாள் பாதுகாப்பு செயலாளர் ஹேமசிறி பர்ணாந்து, முன்னாள் தேசிய உளவுப் பிரிவு பிரதானி சிசிர மெண்டிஸ், முன்னாள் பொலிஸ் மா அதிபர் பூஜித ஜயசுந்தர, அரச புலனாய்வு பிரிவு முன்னாள் பணிப்பாளர் நிலந்த ஜயவர்தன, சிரேஷ்ட பிரதி பொலிஸ் மா அதிபர் நந்தன முனசிங்க ஆகியோருக்கு எதிராகவும் குற்றவியல் பத்திரிகை தாக்கல் செய்யப்பட வேண்டும்.ஜமாஅத்தே இஸ்லாமி அமைப்பு மற்றும் ஜமாஅத்தே இஸ்லாமி மாணவர் அமைப்பு மற்றும் தவ்ஹீத் அமைப்புகள் தடை செய்யப்பட வேண்டும். இந்த அமைப்புகளுக்கெதிராக குற்றப்பத்திரிகை தாக்கல் செய்வதற்காக அவ்வாறான அமைப்புகளின் செயற்பாடுகள் மற்றும் உறுப்பினர்கள் தொடர்பில் ஆழமாக விசாரணைகள் மேற்கொள்ளப்பட வேண்டும்.ஐ.எஸ். அமைப்பு போன்ற அடிப்படைவாத அமைப்புகளை இந்நாட்டில் தடை செய்வதற்காக உரிய சட்டங்கள் இயற்றப்பட வேண்டும்.
- பொதுவான இடங்களில் முகத்தை மறைத்து அணியும் ஆடை தடை செய்யப்பட வேண்டும்.
- பொதுமக்கள் பாதுகாப்பு சட்டத்தின் கீழ் அவசரகால சட்டத்தை அமுல்படுத்தாது இலங்கை இராணுவத்தின் உதவியை பொலிஸார் பெற்றுக் கொள்ளும் வகையில் சட்ட நிலைமை உருவாக்கப்பட வேண்டும்.
- சஹரான், ரிழ்வான், ஸைனி, இல்ஹாம், இன்சாப், ஜெமீல், ஹஸ்துன், முஆத், ஆசாத், முபாரக், நௌபர், மில்ஹான், சாதிக் ஆகியோர் உயிர்த்த ஞாயிறு தாக்குதலுடன் நேரடியாகத் தொடர்புபட்டவர்களாவர்.
- கொழும்பு சினமன் கிரேண்ட் ஹோட்டலில் தற்கொலை குண்டு தாக்குதல் நடத்திய மொஹமட் இப்ராஹிம் இன்சாப் அஹமட் என்பவருக்கு சொந்தமான வெல்லம்பிட்டியில் அமைந்துள்ள செம்பு உலோக தொழிற்சாலைக்கும் முன்னாள் அமைச்சர் ரிசாத் பதியுதீனுக்கும் இடையில் நிலவிய தொடர்புகள் சம்பந்தமாக இலஞ்ச ஊழல் விசாரணை ஆணைக்குழுவுக்கு விசாரணைகள் கையளிக்கப்பட வேண்டியது அவசியமாகும்.
- அனைத்து மதங்களைச் சேர்ந்த சமயத் தலைவர்கள் அடங்கிய ஜனாதிபதி ஆலோசனைக் குழுவொன்று நியமிக்கப்பட வேண்டும். இக்குழுவில் அரசியல்வாதிகள் எவரும் நியமிக்கப்படக் கூடாது.
- சமயங்களின் அடிப்படையில் அரசியல் கட்சிகள் பதிவு செய்யப்படுவது தடை செய்யப்பட வேண்டும். சமயத்தின் பெயர் அரசியல் கட்சிகளுக்கு சூட்டப்படக்கூடாது. அரச சார்பற்ற நிறுவனங்களின் செயற்பாடுகள் கண்காணிக்கப்பட வேண்டும்.
- பாதுகாப்பு அமைச்சு எப்போதும் ஜனாதிபதியின் கீழேயே செயற்பட வேண்டும்.
சமயம் மற்றும் சமயக் கொள்கைகளுடன் கூடிய அரசியல் கட்சிகள் புதிதாக பதிவுசெய்யப்படக்கூடாது. தற்போது வரை பதிவு செய்யப்பட்டுள்ள இவ்வாறான அரசியல் கட்சிகள் தேவையான மாற்றங்களை செய்து கொள்வதற்கு கால அவகாசம் வழங்கப்பட வேண்டும். - 5 வயதுக்கும் 18 வயதுக்கும் உட்பட்ட அனைத்து மாணவர்களும் அங்கீகரிக்கப்பட்ட அரச அல்லது தனியார் நிறுவனங்களில் கல்வி கற்பது கட்டாயமாகும். பிள்ளைகளுக்கு வீட்டில் மாத்திரம் கல்வி போதிக்க முடியாது. சில தற்கொலை குண்டுதாரிகள் தமது பிள்ளைகளுக்கு வீட்டிலேயே கல்வி போதித்ததாக ஆணைக்குழுவுக்கு தகவல்கள் கிடைத்துள்ளன. அனைத்து கல்வி வெளியீடுகளிலும் அடிப்படைவாத சிந்தனைகள் உள்ளனவா என்பதை கண்டறிய சபையொன்று நிறுவப்பட வேண்டும்.
- சிங்கள, தமிழ் மற்றும் ஆங்கில புனித குர்ஆன் பிரதிகள் சமய விவகார அமைச்சினால் அங்கீகரிக்கப்பட்டு வெளியிடப்பட வேண்டும். இதனால் தவறான மொழிபெயர்ப்புகளை முஸ்லிம்களால் தவிர்க்க முடியுமாக இருக்கும்.
- பயங்கரவாத குற்றச் செயல்களுடன் தொடர்புபட்டு தண்டனை வழங்கப்பட்டு, தண்டனை அனுபவித்து விடுதலையாகும் அனைத்து நபர்களும் ஆகக் குறைந்தது 5 வருட காலம் கண்காணிப்பில் இருக்க வேண்டும்.
- அனைத்து சமய நடவடிக்கைகளுக்காகவும் ஒரே அமைச்சே செயற்பட வேண்டும். ஒவ்வொரு சமயத்துக்குமென தனியான திணைக்களங்கள் இருக்கலாம். ஆனால் அவை அனைத்தும் சமய நடவடிக்கைகளுக்கான ஒரே அமைச்சின் கீழேயே இயங்க வேண்டும். இந்த அமைச்சு ஜனாதிபதியின் கீழ் அமைய வேண்டுமென அரசியலமைப்பில் சட்டமாக இயற்றப்பட வேண்டும்.
- அனைத்து அரபு மத்ரஸாக்கள், ஹிப்ழ் குர்ஆன், அரபுக் கல்லூரிகள், அரச நிறுவனங்களினால் கண்காணிக்கப்பட வேண்டும். மத்ரஸாக்களில் சிங்கள மொழிக்கும் தமிழ் மொழிக்கும் முக்கியத்துவம் அளிக்கப்பட வேண்டும்.
- தேசிய ரீதியிலும், மாகாண ரீதியிலும் பாடசாலைகள் மத்தியில் பௌத்த, கிறிஸ்தவ, இந்து, முஸ்லிம் என்று வெவ்வேறாக இயங்காது எதிர்காலத்தில் அனைத்து மாணவர்களும் ஒன்றிணைந்து கற்கும் பாடசாலைகள் அமைய வேண்டும்.
- 15 வயதுக்கு மேற்பட்ட அனைவருக்கும் அனைத்து தகவல்களையும் உள்ளடக்கும் வண்ணம் ‘இலத்திரனியல் சிப்‘ ஒன்று அடங்கிய அடையாள அட்டை வழங்கப்படல் வேண்டும். அதில் உள்ள தகவல்கள் ஒவ்வொரு வருடமும் சரிபார்க்கப்படல் வேண்டும்.
- தேசிய உளவு முகவரகம் ஒன்றினை நிறுவுவது தொடர்பிலான அங்கீகாரம் உள்ள நிறுவனமாக ஜனாதிபதி தலைமையிலான தேசிய பாதுகாப்பு கவுன்சிலே திகழ வேண்டும். தேசிய பாதுகாப்பு கவுன்சிலின் உறுப்பினர்களாக ஜனாதிபதி, பிரதமர், ஜனாதிபதி செயலர், பிரதமரின் செயலர், நிதி அமைச்சின் செயலர், வெளிவிவகார அமைச்சின் செயலர், பாதுகாப்பு செயலாளர், பாதுகாப்பு படைகளின் தலைமை அதிகாரி, முப்படைத் தளபதிகள், தேசிய உளவுத் துறை பிரதானி, பொலிஸ் மா அதிபர், தேசிய உளவுச் சேவை பணிப்பாளர், இராணுவ புலனாய்வுப் பிரிவின் பணிப்பாளர், முப்படைகளின் புலனாய்வுப் பிரிவுகளின் பணிப்பாளர்கள், பயங்கரவாத புலனாய்வுப் பிரிவின் பணிப்பாளர், குற்றப் புலனாய்வுத் திணைக்கள பணிப்பாளர் ஆகியோர் அங்கம் வகிக்க வேண்டும்.
- அடிப்படைவாதத்துக்கு எதிராக சிங்கப்பூரில் அமுலில் உள்ள வேலைத் திட்டம், இலங்கையில் அடிப்படைவாதத்தை தோற்கடிக்க முன்னுதாரணமாகும்.
- பயங்கரவாத செயற்பாடுகள் குறித்த குற்றவாளிகள் தொடர்பில் செயற்பட சட்ட மா அதிபர் திணைக்களத்தில் பிரத்தியேக பிரிவொன்றினை நிறுவுதல் வேண்டும்.
ட்ரோன் கமரா பயன்பாடு உள்ளிட்ட ஆகாய மார்க்கம் முற்றாக அரசினால் மேற்பார்வை செய்யப்படல் வேண்டும். சஹ்ரானின் குழுவினர் 2018 இல் ட்ரோன் கமரா ஒன்றினை கொள்வனவு செய்துள்ளனர். - அகில இலங்கை ஜம் இய்யதுல் உலமா சபை கட்டமைப்பில், சூபி முஸ்லிம்கள் போதுமான அளவு பிரதிநிதித்துவம் பெறுவதை உறுதி செய்ய 2000 ஆம் ஆண்டின் 51 ஆம் இலக்க சட்டத்தை திருத்துதல். சூபி முஸ்லிம்கள் ஜம் இய்யதுல் உலமா சபை கட்டமைப்பில் போதுமான பிரதிநிதித்துவத்தைப் பெறவில்லை என ஆணைக் குழுவுக்கு சாட்சியங்கள் கிடைக்கப் பெற்றிருந்தன.
- அனைத்து மதப் பிரிவினர்களதும், அனைத்து புராதன மத நினைவுத் தலங்கள், பாதுகாக்கப்படல் வேண்டும். இதனை உறுதி செய்ய பொலிஸ் திணைக்களத்தில் விஷேட பிரிவொன்று தேசிய, மாகாண மட்டத்தில் நிறுவப்படல் வேண்டும்.
கறுப்புப் பண சுத்திகரிப்பு சட்டமும் திருத்தப்படல் வேண்டும். - அடிப்படைவாதிகள், பயங்கரவாதிகள் பிரசாரத்துக்காக இணையத்தை பயன்படுத்துவதை தடுக்க, இணைய சேவை வழங்குனர்களுடன் இணைந்து மேற்பார்வை செய்தல், அவ்வாறான இணையத் தளங்களை முடக்குதல் உள்ளிட்ட நடவடிக்கைகளுக்கு தேவையான சட்டங்கள் இயற்றப்படல் வேண்டும்.
- மிஷ்காத் ஆய்வு மையத்தினால் வெளியிடப்பட்டுள்ள, உஸ்தாத் எம்.ஏ.எம். மன்சூர் எழுதிய ‘அல் குர்ஆன் வன்முறையை தூண்டுகிறதா?’ எனும் புத்தகம், நாட்டில் முஸ்லிம் சிறார்களுக்கு குர் ஆனை கற்பிக்கும் நடவடிக்கைகளில் பயன்படுத்த கட்டாயமாக்கப்படல் வேண்டும்.
- ஏனைய அனைத்து மத கல்வி நிறுவனங்களும் (பெளத்தம், கிறிஸ்தவம், இந்து) மத்ரஸாவைப் போன்றே மேற்பார்வை செய்யப்படல் வேண்டும்.
- சமய கல்வி நிறுவங்களில் கற்பிக்கப்படும் பாடத்திட்டமும், மத்ரஸா விடயத்தில் ஆணைக் குழு செய்துள்ள பரிந்துரைகளை ஒத்ததாக, அரசாங்கத்தினால் முன்மொழியப்பட்டதாக அமைதல் வேண்டும்.
- உயிர்த்த ஞாயிறு தாக்குதல்களில் உயிரிழந்த ஒருவர் தொடர்பில் 2 மில்லியன் ரூபாவும் காயமடைந்தவர்களுக்கு 5 இலட்சம் ரூபாவும் நட்டஈடாக வழங்கப்படல் வேண்டும். தற்போதும் நட்ட ஈடு வழங்கப்பட்டிருப்பின் அத்தொகையை கருத்தில் கொள்ளலாம்.
- வெளிநாட்டில் உள்ள பயங்கரவாத சந்தேக நபர்களை நாடு கடத்துவது தொடர்பில் நாடு கடத்தல் சட்ட திட்டங்களை பலப்படுத்த வேண்டும்.
- உயிர்த்த ஞாயிறு தாக்குதல், பயங்கரவாத குற்றங்கள் தொடர்பில் வழக்குகளை விசாரிக்க தனியான மேல் நீதிமன்றை நிறுவுதல். அம்மன்று ஊடாக நாளாந்தம் வழக்குகளை விசாரிக்க வேண்டும். அங்கு சேவைக்கு அமர்த்தப்படும் நீதிபதிகளின் பாதுகாப்பு உறுதிப்படுத்தப்படல் வேண்டும்.
- இலங்கையில் இஸ்லாமிய தேசம் ஒன்றினை உருவாக்குதல் தொடர்பில் செயற்பட்டமை தொடர்பில் ரஷீத் ஹஜ்ஜுல் அக்பர் என்பவருக்கு எதிராக சட்ட நடவடிக்கை எடுப்பது தொடர்பில் சட்ட மா அதிபர் ஆராய்தல் வேண்டும்.
- ராசிக் ரபிக்தீன் அல்லது அப்துல் ராஸிக்கிற்கு எதிராக குற்றவியல் வழக்கொன்றினை தொடுக்க முடியுமா என்பது தொடர்பில் உடனடியாக ஆராய்தல் வேண்டும். 2014 மே 6 ஆம் திகதி அவர் வெளியிட்ட கருத்தை மையப்படுத்தி இந்த பரிந்துரை முன்வைக்கப்பட்டுள்ளது.
- பெளத்தர்கள், இந்துக்கள், கிறிஸ்தவர்கள் மற்றும் முஸ்லிம்களின் மனதில் இலங்கையர்கள் என்ற எண்ணப்பாட்டை வளர்க்க நடவடிக்கை எடுத்தல் வேண்டும். இது பாடசாலைகளில் சிறு வயது முதல் ஆரம்பிக்கப்படல் வேண்டும்.
சிறுபான்மையினர், இலங்கையினர் அல்லர் என்ற உணர்வினை ஏற்படுத்தாமல் இருத்தல் வேண்டும். - பொது பல சேனாவை தடை செய்தல் வேண்டும்.
- Peace TV யை தற்காலிகமாக இலங்கையில் தடை செய்தல் வேண்டும். சிங்கப்பூர், மலேஷியா, பங்களாதேஷ் ஆகிய நாடுகள் தற்போதும் அதனை தடை செய்துள்ளன.
- அடிப்படைவாத மத நிகழ்ச்சிகள் இடம்பெறவில்லை என்பதை உறுதி செய்ய, தொலைக்காட்சிகள், வானொலிகளில் ஒலிபரப்பாகும் அனைத்து மத சார் நிகழ்ச்சிகளினதும் உள்ளடக்கத்தை ஆய்வு செய்தல் வேண்டும்.
- வஹாபிஸத்தைப் பரப்புவதற்காக தௌஹீத் ஜமாஅத்தினால் பயன்படுத்தப்படும் முஹம்மத் பின் அப்துல் வஹாப் என்பவரால் எழுதப்பட்ட கிதாப் அத் தவ்ஹீத் தடைசெய்யப்பட வேண்டும்.
- இப்னு தைமியா, இப்னு அப்துல் வஹாப், அபுல் அஃலா அல் மெளதூதி மற்றும் ஹஸனுல் பன்னா ஆகியோர் வஹாப்வாதத்தின் அறிஞர்கள் என்பதால் அவர்களது கற்பித்தல்கள், வெளியீடுகளை தடை செய்தல் வேண்டும். மலேஷியா, ரஷ்யா, தஜிகிஸ்தான் போன்ற நாடுகள் வஹாப்வாத பிரசாரங்களை தடை செய்துள்ளன. வஹாப்வாதத்தை தடை செய்துள்ள எகிப்து, வஹாப் மற்றும் சலபி அறிஞர்களாக கருதப்படும் அப்துல் வஹாப், இப்னு தைமியா, இப்ன் பாஸ், இப்ன் ஹுதைம், இப்ன் உதைமின் போன்றவர்கள் எழுதிய அனைத்து புத்தகங்களையும் அப்புறப்படுத்த உத்தரவிட்டுள்ளது. ஜோர்தானும் வஹாப்வாத அறிஞர்களின் புத்தகங்களை தடை செய்துள்ளது.
- வஹாப்வாத அமைப்புக்கள் என்பதால், அனைத்து தெளஹீத் அமைப்புக்களும் தடை செய்யப்படல் வேண்டும்.
- முஸ்லிம் இளைஞர் யுவதிகளுக்கு விளையாட்டு மற்றும் பொழுது போக்கு விடயங்களில் ஈர்ப்பு ஏற்படும் விதமாக வேலைத் திட்டம் ஒன்று ஆரம்பிக்கப்படல் வேண்டும். அந்த வேலைத் திட்டம் முஸ்லிம் அரசியல்வாதிகள், மதத் தலைவர்கள் மற்றும் சிவில் அமைப்புக்களின் பங்களிப்புடன் இடம்பெற வேண்டும்.
ஐ.எஸ். உள்ளிட்ட அடிப்படைவாத மதக் குழுக்களை தடை செய்ய சட்டம் கொண்டுவரப்படல் வேண்டும். - 2007 ஆம் ஆண்டின் 56 ஆம் இலக்க சிவில் மற்றும் அரசியல் உரிமைகள் தொடர்பிலான சர்வதேச இணக்கப்பாட்டு சட்டத்தின் கீழ் கலகொட அத்தே ஞானசார தேரருக்கு எதிராக குற்றவியல் வழக்கு தொடுக்க முடியுமா என சட்ட மா அதிபர் பரிசீலிக்க வேண்டும். 2013 பெப்ரவரி 17 ஆம் திகதி மஹரகம, 2014 ஜூன் மாதம் போயா தினமொன்றில் அளுத்கம நகரங்களில் அவர் ஆற்றிய உரைகளை மையப்படுத்தி இதனை ஆராயுமாறு ஆணைக்குழு பரிந்துரைக்கிறது.
ஆணைக்குழுவின் அறிக்கை மற்றும் அது தொடர்பான அரசாங்கத்தின் நடவடிக்கைகள் குறித்த விரிவான தகவல்களை தொடர்ந்தும் விடிவெள்ளியில் எதிர்பாருங்கள். – Vidivelli