மாவனெல்லையில் நடந்தது என்ன?

வெடிபொருட்கள் திருடப்பட்டமை, புத்தர் சிலை கண்ணாடிகள் சேதமாக்கப்பட்ட சம்பவங்களின் உண்மை பின்னணி

By vidivelli On Jan 9, 2021

எம்.எப்.எம்.பஸீர்

மாவனெல்லை. சர்ச்சைகளுக்கும், சந்தேகங்களுக்கும் இன்று பெயர்போன இடமாக பலரால் காரணமின்றியே அடையாளப்படுத்தப்பட்டுவிட்டது. குறிப்பாக 2019 ஏப்ரல் 21 தாக்குதல்களுக்கு முன்னைய புத்தர் சிலை உடைப்புகள், தாக்குதல்களுடன் தொடர்புடைய பிரதான அடிப்படைவாத நடவடிக்கைகளை முன்னெடுக்க தளமாக பயன்படுத்தப்பட்டமை போன்றன இன்று மாவனெல்லையை வேறு கண்கொண்டு பார்க்கும் நிலையை பலரிடம் உருவாக்கிவிட்டுள்ளது. எனினும் உண்மை அவ்வாறல்ல.

இந்த பின்னணியிலேயே, கடந்த டிசம்பர் மாதம் மீளவும் மாவனெல்லை பேசுபொருளாக வந்தது.மாவனெல்லை பிரதேசத்தில் அமைந்துள்ள கற்பாறைகளை உடைக்கும் ஒரு இடத்தில் இருந்து பெருமளவு வெடிபொருட்கள் காணாமல் போனமை தொடர்பிலான சம்பவம் நாடு முழுதும் அவதானத்தை ஏற்படுத்தியது.

அந்த சம்பவத்தை தொடர்ந்து, அதன் உண்மை வெளிப்பட முன்னரே, மாவனெல்லை பகுதியில் இரு வேறு பிரதேசங்களில் புத்தர் சிலைகளின் கண்ணாடி மறைப்புகள் சேதமாக்கப்பட்ட விடயங்கள் பதிவாகின. இது இன்னும் அதிர்ச்சியை ஏற்படுத்தியது.

இந்த சம்பவம் பதிவானதும், பெரும்பாலானவர்கள், இவ்விரு சம்பவங்களையும் முடிச்சுப் போட்டே பார்க்கலாயினர். ஏனெனில், இதற்கு முன்னரான அனுபவங்களும் சிங்கள ஊடகங்களின் பிரசாரமும் அவர்களை அப்படி பார்க்கச் செய்தது எனலாம்.

இதனால் பிரதேசத்தில் முஸ்லிம்களுக்கும், சிங்களவர்களுக்கும் இடையிலான உறவில் விரிசல்கள் ஏற்படலாம் என்ற அச்ச நிலை அதிகரித்தது. எனினும் ஈற்றில், இவ்விரு சம்பவங்களும் ஒன்றுடன் ஒன்று தொடர்புபடாத சம்பவங்கள் எனவும் அடிப்படைவாதம், பயங்கரவாதத்துடன் தொடர்பில்லாத சம்பவங்கள் எனவும் பொலிஸார் 10 நாட்களுக்குள்ளேயே சான்றுகள், சந்தேக நபர்களின் விபரங்களுடன் நாட்டுக்கு அறிவித்தனர்.

வெடி பொருள் திருட்டு சம்பவம்:

கடந்த 2019 டிசம்பர் மாதம் 22 ஆம் திகதி இரவு, மாவனெல்லை – ஹிங்குல, மொல்லியகொட பகுதியில் இயங்கும் கல்லுடைக்கும் குவாரி ஒன்றிலிருந்து வெடிக்க வைக்க பயன்படுத்தப்படும் ஒரு தொகை உபகரணங்கள் காணாமல் போயிருந்தன. குறித்த கல் குவாரியின் உரிமையாளர் மறு நாள், டிசம்பர் மாதம் 23 ஆம் திகதி மாவனெல்லை பொலிஸில் முறையிட்டிருந்தார். இதற்கமைய விசாரணைகள் ஆரம்பிக்கப்பட்டன.

விசாரணைகள் ஆரம்பிக்கப்பட்டு 24 மணி நேரத்தில், மாவனெல்லை பொலிஸார், குறித்த கல்குவாரியில் சேவையாற்றும் ஊழியர் ஒருவரை இது தொடர்பில் சந்தேகத்தில் கைது செய்தனர். பேராதெனிய பகுதியைச் சேர்ந்த அவரை, மாவனெல்லை பொலிசார் விசாரணை செய்யும் போது, இந்த சம்பவம் தொடர்பிலான விசாரணைகள் பொலிஸ் மா அதிபர் சந்தன விக்ரமரத்னவால், சி.ஐ.டி.க்கு பாரப்படுத்தப்பட்டது.

குறித்த கல் குவாரியிலிருந்து, அமோனியா நைட்ரேட் 15 கிலோ, வேட்டர் ஜெல் 6 ( 750 கிராம்), வெடிக்க வைக்க பயன்படுத்தப்படும் நூல் ( டெட்டனேடர் தண்டு) 35 மீட்டர் , டெட்டனேடர் 20, கல்லுடைக்கும் பீம் 5 ஆகியவையே காணாமல் போயிருந்தன.

கடந்த 2019 ஏப்ரல் 21 தாக்குதல்களின் போது குண்டு தயாரிக்க, இத்தகைய வெடி பொருட்களின் சேர்க்கையே பயன்படுத்தப்பட்டிருந்ததால், இந்த விடயம் தொடர்பில் பரவலாக பலரும் பேச ஆரம்பித்ததன் பின்னணியில் விசாரணைகள் சி.ஐ.டி.யிடம் கையளிக்கப்பட்டன.

இதனையடுத்து சி.ஐ,.டி.யின் பிரதானி பிரதிப் பொலிஸ் மா அதிபர் பிரசாத் ரணசிங்க, பணிப்பாளர் சிரேஷ்ட பொலிஸ் அத்தியட்சர் நிசாந்த சொய்ஸா ஆகியோர் இந்த விசாரணைகளுக்கு யாரை நியமிப்பது என பொலிஸ் மா அதிபரின் உத்தரவை அடுத்து ஆலோசிக்கலாயினர்.

இந் நிலையில், ஏப்ரல் 21 தாக்குதல்களுக்கு முன்னர், கடந்த 2018 டிசம்பர் மாதம் மாவனெல்லையில் பதிவான புத்தர் சிலை தகர்ப்பு, அதனை தொடர்ந்து அவ்விசாரணைகளின் பலனாக வனாத்துவில்லுவில் வெடிபொருட்களை கைப்பற்றிய பின்னணியில் சஹ்ரான் செயற்படுவதை கண்டறிந்த வெற்றிகரமான விசாரணைகளை முன்னெடுத்த பிரதான பொலிஸ் பரிசோதகர் மாரசிங்கவிடம் அவ்விசாரணைகளை கையளிக்க சி.ஐ.டி.யின் உயர் அதிகாரிகள் தீர்மானித்தனர்.

அதன் பிரகாரமே பிரதான பொலிஸ் பரிசோதகர் மாரசிங்க தலைமையிலான 5 சி.ஐ.டி. குழுக்கள் மாவனெல்லைக்கு உடனடியாக அனுப்பப்பட்டன. அங்கு சென்ற குறித்த சி.ஐ.டி. குழு , முதலில் மாவனெல்லை பொலிஸார் கைது செய்திருந்த கல் குவாரி ஊழியரையும் தமது பொறுப்பில் எடுத்ததுடன் மேலதிக விசாரணைகளை, பல்வேறு சாட்சியங்களை மையபப்டுத்தி பல கோணங்களில் முன்னெடுக்கலாயினர்.

புத்தர் சிலைகளின் கண்ணாடி மறைப்புக்கள் சேதமாக்கப்பட்ட சம்பவம்:

இந்த விசாரணைகள் இடம்பெற்றுக்கொண்டிருக்கும் போதே, அதே மாவனெல்லை ஹிங்குல பகுதியில் கொழும்பு கண்டி வீதியில் அமைந்துள்ள புத்தர் சிலையொன்றின் பாதுகாப்புக்காக போடப்பட்ட கண்ணாடி கடந்த 29 ஆம் திகதி அதிகாலை அடையாளம் தெரியாத நபர்களால் சேதமாக்கப்பட்டிருந்தது.

அத்துடன் அச்சம்பவத்துக்கு ஒரு சில நாட்களுக்கு முன்னர் அலுத்நுவர பகுதியில் உள்ள புத்தர் சிலையொன்றின் பாதுகாப்புக்காக போடப்பட்ட கண்ணாடியும் அடையாளம் தெரியாத நபர்களால் சேதமாக்கப்பட்டுள்ளதாக பிரதேசவாசிகள் பொலிஸாருக்கு அதனை தொடர்ந்து அறிவித்திருந்தனர்.

இந்த சிலை சேதப்படுத்தல் விடயங்கள் தொடர்பில் சப்ரகமுவ மாகாண சிரேஷ்ட பிரதிப் பொலிஸ் மா அதிபர் பிரியந்த வீரசூரியவின் உத்தரவுக்கு அமைய, அவரின் நேரடி கட்டுப்பாட்டில் கேகாலை சிரேஷ்ட பொலிஸ் அத்தியட்சரின் ஆலோசனையில் மாவனெல்லை பொலிஸ் பொறுப்பதிகாரியின் கீழான குழுவும், கேகாலை மாவட்ட குற்றத் தடுப்புப் பிரிவினரும் தீவிர விசாரணைகளை ஆரம்பித்தனர்.

இரு சம்பவங்களுக்கும் தொடர்பா?

இந் நிலையில் வெடி பொருள் காணாமல் போனமை, தொடர்ந்து வந்த நாட்களில் புத்தர் சிலைகளின் கண்ணாடி மறைப்புக்கள் சேதப்படுத்தப்பட்டமை உண்மையில் பலருக்கு கடந்த 2019 ஏப்ரல் 21 தாக்குதல்களுக்கு முன்னரான சம்பவங்களை ஞாபகப்படுத்தியது. இதனால் இவ்விரு சம்பவங்களும் ஒன்றுடன் ஒன்று தொடர்புபட்டதா? யாரால் எப்படி செய்யப்பட்டன என்பதை வெளிப்படுத்த தீவிர அறிவியல்சார் தடயங்களை மையப்படுத்திய விசாரணைகள் தொடர்ந்தன.

வெளிப்பட்ட உண்மை:

குற்றப் புலனாய்வுத் திணைக்களத்தின் பிரதான பொலிஸ் பரிசோதகர் மாரசிங்க தலைமையிலான குழுவினர் முன்னெடுத்த விசாரணைகளில், இவ்விரு சம்பவங்களும் ஒன்றுடன் ஒன்று தொடர்புபட்டது அல்ல என்பதற்கான ஆதாரங்கள் கிடைத்துள்ளதுடன், வெடிபொருள் காணாமல் போனமை ஒரு திருட்டு சம்பவம் என வெளிப்படுத்தப்பட்டுள்ளது.

கல் குவாரி ஊழியர் ஒருவர் அந்த வெடிபொருட்களை திருடி மற்றொரு கல் குவாரியுடன் தொடர்புபட்டவர்களுக்கு விற்பனை செய்துள்ளமை அவ்விசாரணைகளில் தெரியவந்துள்ளது. 2021 வருடம் ஆரம்பிக்கும் போது அத்தனை தகவல்களையும் வெளிப்படுத்திக்கொண்ட மாரசிங்க தலைமையிலான சி.ஐ.டி. குழு, சரியாக முதலாம் திகதி இந்த திருட்டுடன் தொடர்புடைய அனைத்து சந்தேக நபர்களையும் கைது செய்து, இது அடிப்படைவாத, பயங்கரவாத செயற்பாடு இல்லை என்பதையும் ஒரு திருட்டு சம்பவம் மட்டுமே என்பதையும் நிரூபித்தது.

திருடப்பட்ட வெடி பொருட்கள் அனைத்தும் பேராதெனிய பகுதி வீடொன்றில் பதுக்கி வைக்கப்பட்டிருந்த நிலையில் அவையும் மீட்கப்பட்டன. இந்த திருட்டுடன் பேராதெனிய பகுதியைச் சேர்ந்த மூவர் (மாவனெல்லை பொலிஸார் கைது செய்து சி.ஐ.டி.யில் ஒப்படைத்தவருடன் சேர்த்து), பிலிமதலாவை பகுதியைச் சேர்ந்த ஒருவர் இவ்வாரு கைது செய்யப்பட்டனர். 49 வயதான துஷான் பின்னகொல்ல, 36 வயதான சுகத் வீரசிங்க, 21 வயதான சுகத் கிம்ஹான ஆகியோர் சி.ஐ.டி.யினரால் இந்த திருட்டு தொடர்பில் கைது செய்யப்பட்டதுடன், சரத் பண்டார என்பவர் மாவனெல்லை பொலிஸாரால் கைது செய்யப்பட்டு சி.ஐ.டி.யிடம் ஒப்படைக்கப்பட்டிருந்தார்.

இந்த நால்வரும் மாவனெல்லை நீதிவான் நீதிமன்றில் ஆஜர் செய்யப்பட்டு தற்போது விளக்கமறியலில் வைக்கப்பட்டுள்ளனர். இவர்களுக்கு எதிராக திருட்டு தொடர்பில் தண்டனை சட்டக் கோவையின் கீழும், வெடிபொருட்கள் கட்டளைச் சட்டத்தின் கீழும் நடவடிக்கை எடுக்கப்படவுள்ளதாக பொலிஸ் சட்டப் பிரிவின் பிரதானி பொலிஸ் பேச்சாளர் பிரதிப் பொலிஸ் மா அதிபர் அஜித் ரோஹன கூறினார்.

புத்தர் சிலை கண்ணாடி மறைப்புக்களை சேதப்படுத்தியது யார்?

மாவனெல்லை பகுதியின் இரு வேறு இடங்களில் புத்தர் சிலைகளை சுற்றி அமைக்கப்பட்டிருந்த கண்ணாடிகள் அடையாளம் தெரியாதோரால் சேதமாக்கப்பட்ட சம்பவம் தொடர்பில் முன்னெடுக்கப்பட்ட விசாரணைகளில் சந்தேக நபர் ஒருவர் கைது செய்யப்பட்டதன் ஊடாக குறித்த சம்பவங்கள் தொடர்பிலும் கடந்த 4 ஆம் திகதி மர்மம் துலக்கப்பட்டது. கேகாலை – மினுவன்கமுவ பகுதியில் வைத்து இந்த கண்ணாடி மறைப்புக்கள் சேதமாக்கப்பட்ட விடயம் தொடர்பில் சந்தேக நபர் கேகாலை மாவட்ட குற்றத் தடுப்புப் பிரிவின் சிறப்புக் குழுவினரால் கைது செய்யப்பட்டார்.

30 வயதுடைய கேகாலை பகுதியைச் சேர்ந்த பிரியந்த சம்பத் குமார என்ற நபரே இவ்வாறு கைது செய்யப்பட்டிருந்தார். முன்னெடுக்கப்பட்ட விசாரணைகளில், குறித்த சம்பவங்கள் அடிப்படைவாத அல்லது பயங்கரவாத பின்னணியோ தொடர்புகளோ அற்றது என உறுதியாகியுள்ளதாக இது தொடர்பில் கருத்து தெரிவித்த பிரதிப் பொலிஸ் மா அதிபர் அஜித் ரோஹன கூறினார்.

கைது செய்யப்பட்ட சந்தேக நபர் போதைப் பொருளுக்கு அடிமையானவர் என தெரியவந்துள்ளது. அது தொடர்பிலான தேவைகளுக்கு பணம் தேடும் முயற்சியில் ஹிங்குல புத்தர் சிலை அருகே காணப்பட்ட 60 ரூபா பணத்தை திருடும் போது, அப்புத்தர் சிலையின் கண்ணாடி மறைப்புக்கு சேதம் ஏற்பட்டதாக சந்தேக நபர் பொலிஸ் விசாரணைகளில் கூறியுள்ளார்.

சிலை சேதப்படுத்தல் விடயங்கள் தொடர்பில் சப்ரகமுவ மாகாண சிரேஷ்ட பிரதிப் பொலிஸ் மா அதிபர் பிரியந்த வீரசூரியவின் உத்தரவுக்கு அமைய, அவரின் நேரடி கட்டுப்பாட்டில் கேகாலை சிரேஷ்ட பொலிஸ் அத்தியட்சரின் ஆலோசனையில் மாவனெல்லை பொலிஸ் பொறுப்பதிகாரியின் கீழான குழுவும், கேகாலை மாவட்ட குற்றத் தடுப்புப் பிரிவினரும் தீவிர விசாரணைகளை ஆரம்பித்தனர்.

சம்பவங்கள் பதிவான இடங்களுக்கு அரச இரசாயன பகுப்பாய்வாளர்கள் அழைக்கப்பட்டு, அவை பகுப்பாய்வு செய்யப்பட்டன. 2019 ஏப்ரல் 21 தாக்குதல்களுக்கு முன்னரும் இவ்வாறான புத்தர் சிலைகள் மீதான கல் வீச்சு தாக்குதல்கள் இடம்பெற்றிருந்தமையும், மாவனெல்லை, ஹிங்குல பகுதியில் கொழும்பு கண்டி வீதியில் அமைந்துள்ள புத்தர் சிலை அப்போதும் அடிப்படைவாதிகளின் இலக்காக இருந்திருந்தமையும், இந்த கல்வீச்சு தாக்குதல்கள் குறித்து சிங்கள, முஸ்லிம் சமூகங்களிடையே பல்வேறு அச்சங்களை தோற்றுவித்தன.

இந் நிலையில் குறித்த சம்பவம் தொடர்பிலும் தீவிர விசாரணைகள் ஆரம்பிக்கப்பட்டதுடன், பிரதேசத்தின் சி.சி.ரி.வி. உள்ளிட்ட அறிவியல் தடயங்கள் தனிப் பொலிஸ் படை கொண்டு ஆராயப்பட்டன.

இந் நிலையிலேயே, அறிவியல் தடயங்களை வைத்து முன்னெடுக்கப்பட்ட விசாரணைகளுக்கு அமைய கடந்த 4 ஆம் திகதி இரவு சந்தேக நபர், கேகாலை மாவட்ட குற்றத் தடுப்புப் பிரிவினரால் கைது செய்யப்பட்டிருந்தார்.

அவரிடம் முன்னெடுக்கப்பட்ட விசாரணைகளில், அளுத் நுவர பகுதியில் புத்தர் சிலையுடன் இருந்த உண்டியலை உடைத்து திருடியமை, ஹிங்குல புத்தர் சிலையின் கண்ணாடி மறைப்புக்கு சேதம் விளைவித்தமை, அதே தினம், ஹிங்குல தேவாலயம் ஒன்றின் உண்டியலை உடைத்து திருடியமை போன்ற குற்றங்களின் மர்மமும் துலக்கப்பட்டுள்ளது.

பேராதனை வைத்தியசாலைக்கு தான் சிகிச்சை பெற சென்று அங்கு அதிக நேரம் காத்திருந்து ஹிங்குல பகுதிக்கு வருகை தந்ததாகவும், அப்போது நேரம் இரவு 11.50 அளவில் இருக்கும் எனவும் சந்தேக நபர் பொலிஸ் விசாரணைகளில் கூறியுள்ளார். அப்போது அப்பகுதியில் எவரும் இருக்கவில்லை என தெரிவித்துள்ள சந்தேக நபர், புத்தர் சிலையுடன் காணப்பட்ட பணத்தை திருட முற்பட்ட போது அதன் கண்ணாடி மறைப்புக்கு சேதம் ஏற்பட்டதாகவும் அங்கிருந்த 60 ரூபா பணத்தை தான் திருடிச் சென்றதாகவும் ஒப்புதல் வாக்குமூலமளித்துள்ளார்.

எவ்வாறாயினும், சந்தேக நபரின் வாக்கு மூலத்துக்கு அமைய, அவர் அங்கு வந்த பஸ் வண்டி, பின்னர் எங்கு எவ்வாறு சென்றார் உள்ளிட்ட விடயங்களை வெளிப்படுத்தவும் மேலதிக விடயங்களை ஆராயவும் விஷேட விசாரணைகள் தொடர்கின்றன. சந்தேக நபர் தற்போது விளக்கமறியலில் வைக்கப்பட்டுள்ளமையும் குறிப்பிடத்தக்கது. – Vidivelli